3
Mị ạmina ẹmina ạmi ḍughul etum ḍughul phọ,mị ụmalha ghan ịlo ọpo mị ạphomoghian bọ.
Mị ụwa ghan ni nyọdi kụ mị ụ́miin nyọdi.
2 Mị ụghi ni ayeela ghan sịphe egbogh ẹmha phọ,
arelhe yogh oomo ịbam areten rꞌịdi ekpisi íkputon.
Mị ụwa ni nyọpo mị ạphomoghian bọ,
mị ụwa ni, kụ mị útue ụ́miin.
3 Abukoriom aḍughul phọ rotelhe yogh bọ egbogh ẹmha phọ ụmiin ni ịmi.
Mị upuru ni bịdi, “Nyina ẹmiin ni oye ẹphomoghian phọ ạmi ḍụghum?”
4 Íbia mị ạḍua bọ esi ạbidi, bịn mị ạmiin nyọdi.
Mị ụpham ni nyọdi kụ mị úmeera mun mọ ạḍua
tụtu mị ạsighe nyọdi asiemi kꞌonhiin ạmi,
ẹpe ọkar osoph phọ ụmar bọ ịmi.
5 Iguanaan ịmi, nmạriir aJeruselem;
ikunya esi aḍien ạrunuen ikem ḅịle rꞌizoogh phọ
kụ nyina kéesophoghom ẹphomoghian phọ ayoor.
Ạḍuor dị emuneniom ịraar
Ạnir phọ
6 Ẹphen phọ eeghe dị ẹḍua bọ de ịisaar phọ kụ retu mụdi ẹphuluḅul ạmughi,
dị repur eeḅi eḍu ịnsens rꞌamaa,
ịnsens phọ ịpe abumuul ḍighi phọ robool ghan bọ?
7 ẠSolomon ratu, ọsaany ni sịphe ạgada ọdaam eelhe phọ ọdi;
odiinydi awe ẹgham kụ abukoriom mọ,
ọkaraghi igey awe ẹgham mọ Ịzirel.
8 Oomo phọ ạbidi ạbuo ẹmaar ịlo eenom elhool ẹgham;
bịdi awe dị ẹgham ẹḅeeraan iboom.
Oye ye ạbidi ạḅanaam ni elhool ẹgham,
ogonomaam aloor esi awe lọ kotu ozuom ạbidi ḍughul.
9 Otool Sọlomon ọdaam mọ ologhi ạgada ọdaam eelhe phọ ọdi
dị ọkaam ọkar ogey oreeny.
10 Ịmeremiom mọ okpoghom silva;
loor phọ, ozuom ukpe ịnme dị olhoom gol.
Ẹtolom mọ okpereghiom oodor
dị ạnmariir aJeruselem kụ ọmaar olooghi rꞌẹphomoghian.
11 Nmạriir ạZayon, itu ẹmiin Sọlomon ọdaam mọ.
Ọdi azua eghoony ọdaam eelhe phọ onhiin phọ ọdi azu bọ ẹmhu ọdi
ḍio apinien phọ ọdi,
ḍio ọḅaal ologhi rꞌibo phọ ọdi.