2
Mị oopho ạfalaway eḍum ẹpe Saron,ịma ạfalaway sịphe eḍiiny igbo ạraaḅaraph phọ.
Oye phọ
2 Ịdipho ịma ạfalaway ogbo iiḅurom
ịma ọnyani ạmi ogbo ạnmariir.
Ạnir phọ
3 Mụdi oozin ẹḍara igbo ireeny ẹekpua phọ,
ịdipho kụ ẹdi ọtomaam nyọon ạmi igbo ạbunon awe.
Ịḅeeraan ịmi ọrol esi oogho phọ ọdi,
kụ iimuma ọdi ẹdugh ọnhu ạmi.
4 Ọdi ụpham ịmi arumom otu amugbogh amalhe ọdi
kụ aphoophe ạlagba ẹphomoghian uukpereghiom ịmi.
5 Ḅịle aḅulemiom ịnyaam ạmi ịgbaghaḍineen ạraraar
kụ aḍighi ịdi mị kaamanam kụ ạazaghamian loor ạmi rꞌẹḍara.
Aḍiboom ạḍiḅeeraan medughe loor ạmi.
6 Ạḍighaagh ekeeny ọdi edi eeḍian ẹmhu ạmi
kụ ạḍighaagh elhiom ọdi rịipholion ghan ịmi.
7 Iguanaan ịmi, nmạriir aJeruselem;
ikunya esi aḍien ạrunuen ikem mọ rꞌizoogh phọ
mọ nyina kéesophoghom ẹphomoghian ayoor.
Ạḍuor dị emuneniom ịyal
Ạnir phọ
8 Mị rạnaghan ẹḍogh oye ẹphomoghian ạmi,
Ọdi akiil ẹpe ạraaḅaraph phọ kụ ratu,
kụ rạḅeenyogh roogbolom mọ oru ọteeny ạmi.
9 Oye ẹphomoghian phọ ạmi ạkigh ezoogh,
mụdi onyugheel ọoroogh.
Ạmeera bịn atuman iikpe phọ.
Ọdi aten sịphe eghuugh-ookuugh phọ
kụ rapogh ghan ropogh eghuugh phọ.
10 Oye ẹphomoghian phọ ạmi rụḅaanaan ịmi.
Oye phọ
Tue nụun, ạnir ẹphomoghian ạmi,
Osegbe ạmaka ạmi, ụdaphan ịmi.
11 Arunu memuneen, ọlophia ọ́lhoph mun;
12 ẹpe ịbam ạramha phọ ạsifalaway meenmenan.
Nyịidipho amem ọmoor ạsuor;
rọnaghan sụor arukuru-ghọzo ẹpe eḍum mọ.
13 Iimuma ạfig memiigh rẹḅaal;
ookuugh phọ rapurom eeḅi eḍu ịizughum avain.
Tue nụun, ạnir ẹphomoghian ạmi,
ọnyani ologhi ạmi, ụdaphan ịmi.
14 Nạ ạkigh ọkurughozo dị ạaghian
ịbaay asighiigh
Ḍighi pạ mị ụmiin ịma aghisigh phọ ạna
kụ ạnaghan ịma ẹḍogh phọ ạna.
15 Siphi rụukpa-ako phọ, ịbam ạruukpa-ako phọ,
ọbo bịdi kẹpue oghoony ịizupha avain phọ ịpe mẹemanam bọ.
Ạnir phọ
16 Oye ẹphomoghian ạmi ọlo ạmi kụ mị ọlo ọdi.
Ọdi rạngo ghan ịḅal ḍita ịnam mọ ọdi igbo ịma ạsifalaway phọ
17 tụtu ookuugh ạḍiroor amiigh oghugh
kụ ufiri phọ aḍigh ighu.
Tigheel, osegbe ạmasini ạmi, mụdi ezoogh,
mụdi elephiri ezoogh ẹpe ạraaḅaraph phọ aBeter.