Oye phọ
5
Mị maḍigh ologhi oghoony ịizupha ạmi,ạnir ẹphomoghian phọ ạmi dị mị kapin,
Mị raakpomoghi maa ạmi rꞌarolho eḍu kịrokiro;
mị rạlaay ghan ẹnuum aḍiowo ạmi rꞌigumogum mọ.
Mị rạpughol ghan miim ạmi kạḅile ạmoophi mạmaam ạnam.
Ạnmariir phọ
Ile, we ẹphomoghian, kụ ẹphughol
tụtu ẹphomoghian ighiigh inyina ịdipho amiim.
Ạḍuor dị emuneniom inya
Ạnir phọ
2 Mị ạmina ni kụ ekpom ạmi ị́naani.
Mị ụmalha ni dị oye ẹphomoghian phọ ạmi rakar eghuugh phọ.
Oye phọ
Mị utu uḍigh, ạnir ẹphomoghian ạmi,
aḍidugh ologhi ạmi, ọkurughozo ạmi.
Ooto mạḅore ẹmhu ạmi,
kụ ạsilaal ạmi megururu loor ooroogh phọ.
Ạnir phọ
3 Mị mạkatanaan ukpe kụ rakori;
mị kạḅile bọ amuuna ika?
Mị maatola ruwol ạmi;
mị kạḅile bọ ạlogh ẹenir ika?
4 Oye ẹphomoghian phọ ạmi ạsighe ḍịghaagh ọdi ạpam eghuugh phọ,
kụ edugh esi ạmi dị ọdi masi sịen.
5 Mị ụnya mọ ọdi aḍigh ologhi otu.
Ạraghaagh ạmi amaa kụ odi,
Ạsunugh ạmi ogbul elho amaa,
ịdipho mị ạpham aani bọ ọkasiom eghuugh phọ.
6 Mị maghughuronaan oye ẹphomoghian phọ ạmi eghuugh phọ,
kụ ọdi magheel.
Ịdi mị ạkar rạwa ghan ọnaghan ẹḍogh phọ ọdi!
Mị ụwa ni nyọdi, kụ mị ụ́miin;
Mị ụmagh ni kụ ịmi ụ́phagharanaan.
7 Abukoriom aḍughul phọ rotelhe bọ ẹmha phọ ụmiin ni ịmi;
bịdi ụgur ri ịmi ọkpoghoron;
abukoriom iikpe oghoony ẹmha phọ ọphaanyi ukpe ozua ạmi.
8 Iguanaan ịmi, nmạriir aJeruselem,
mọ eḍighi ịyaar dị nyina ẹmiin oye ẹphomoghian phọ ạmi,
mọ nyina kẹḅeni ni nyọdi mọ mị madugh loor aḍiboom ạḍiḅeeraan.
Ạnmariir phọ
9 Ạnir dị ạnighe apu oomo ạbunon,
oye ẹphomoghian phọ ạna ạgbatanaan ni oomo ạbueri phọ?
Eeghe rꞌịyaar iikia ịlo ọdi kụ iḍighi bọ kịro
dị yoor koguanaan bọ nyịna?
Ạnir phọ
10 Oye ẹphomoghian phọ ạmi aḍighi ooḅi kụ ạmoogh ịnyaam;
ọdi bịn kụ ooḅi dị ạgbatanaan esi aḍioph ọonir awe.
11 Aghisigh ọdi enaba kụ ạḍorodoro;
ạsilaal ọdi emelemele,
ebil ịdipho ẹghiligho.
12 Ariḍien ọdi ẹnighe ịdipho arukurughozo dị ẹlhel ọgbal aḍikol dị ạmuum rakil,
arukurughozo dị ootolom mạmaam ạnam kụ ẹmeera ọgbal okol ạmuum.
13 Arukpo ọdi ẹnighe ịdipho ịma oghoony
dị ạroogho rꞌịizupha eeḅi eḍu kụ edi.
Ịidoronhu ọdi ẹkigh ịma ạsifalaway
dị ọḅoriom elho amaa.
14 Rạghaagh ọdi ọmaar kụ ọlhem,
kụ ọdi ạlogha ghan sigulu dị ọdamaghiom ịbekulari.
Aḍizu ọdi ẹkigh ọper pẹr oḍu ọoma
dị ọdamaghiom ịnmananmana ịkuta.
15 Ạrugbo ọdi eḍighi sịkool ooḅi ạmabul
dị osereghi ropogh agol.
Ọdi ạmaar ạmeera ịdipho ạraaḅaraph ạLebanon
rꞌạrasaga ạbidi dị eselogh.
16 Ọnhu ọdi ạmen ọkpun;
tọrobo ịyaar ịlo ọdi rịḅeeraan ghan ịmi iboom.
Ịduon kụ ẹdi oye ẹphomoghian phọ ạmi ạrol,
nmạriir phọ aJeruselem.