Ẹnaan kụ Ogbogh Ọdaam mọ
96
Ịmooraan ḍimoom ạḍuor Ọmoogh-we phọ;ịmooraan Ọmoogh-we phọ, oomo aḅirini phọ.
2 Ịmooraan Ọmoogh-we phọ kụ eboom nyọdi.
Igbeelom tọrotoro aḍio ooḅi ọghaaph phọ mọ ọdi mụphel iyira.
3 Igbeelom eegu phọ ọdi eleenyemi reelhe,
ịiḍaany phọ ọdi eleenye oomo awe.
4 Ọmoogh-we phọ ạbugh ni iboom kụ ạkpe ni ooseeny iboom;
ọdi ạkpe oghueni opuemi oomo ạrumugh.
5 Ạrumugh oomo ịpheri phọ areelhe phọ eḍighi ịkaaghineen ạrumugh,
kụ ọlo Ọmoogh-we phọ kụ ạlhem sịke phọ.
6 Eegu rꞌigbogh ekoom nyọdi;
ịikpo rꞌẹnighe emuza Otu Ịiḅereghi phọ ọdi.
7 *Iboom Ọmoogh-we phọ, oomo awe sịen ade phọ;
iboom eegu phọ ọdi rꞌigbogh phọ ọdi.
8 Iboom ḍien eegu Ọmoogh-we phọ;
ịsighe ruunmo erumom Otu Ịiḅereghi phọ ọdi.
9 Ikpuḍughian ghisigh Oye Iigbia phọ mem dị ọdi amitiom loor;
ipiigha egbodo ọdi, oomo ade phọ.
10 Ịḅeni ghan oomo areelhe phọ mọ, “Ọmoogh-we phọ kụ ọdaam.”
Ọmaar opighi de phọ kụ emiigh kpis, kụ kótue opoophe.
Ọdi kasoph iiḅi ịiruen kụ ạngo ghan we.
11 Ịmoogh iboh, de rꞌạke.
Ịmaphaan, ọphiiny rꞌoomo ịpe edi bọ ụmuum.
12 Ịmoogh iboh, iizo rꞌoomo ịlo edi loor anyina.
Ireeny phọ edi bọ rụukpua phọ kẹlo ḍịolho iboh,
13 mem dị Ọmoogh-we phọ katu ọda ade phọ.
Ọdi kạdaam reelhe aḅirini phọ
iiḅi ịiruen rꞌegeny ẹphamam.