Ạḍuor oboomiom Ẹnaan
95
Itu ọmoor sụor oboomiom Ọmoogh-we phọ,ọpo ruuko ghan bọ iyira kụ ạḅile bọ ụphel iyira atene.
2 Ọpham ḍịseph oruom pạ aghisigh phọ ọdi,
ọsighe sụor iboh ọmooraan nyọdi,
3 ịdi eḍighi bọ Ọmoogh-we phọ ogbogh ọdaam
dị ạbugh ni iboom apu oomo ạrumugh.
4 Ọdi ạda oomo aḅirini phọ
emiigh riḍiiny dị ẹkel ude kụ esi roogbolom dị ephophogh.
5 Ọdi ạda rịphiiny phọ, ịpe ọdi ạlhem bọ;
rꞌạḍigharaghar ade phọ, ọdi rꞌaloor kụ ạlhem bọ.
6 Itu okpuḍian ọoḅereghi nyọdi,
okpuḍian egbodo Ọmoogh-we phọ ọpo ụlhem bọ iyira.
7 **Ọdi kụ Ẹnaan ayira;
yira kụ awe ọdi;
aḍita iyool-ịga dị ọdi rạngo ghan ịḅal.
Iler rụru ẹnaghan ịpe ọdi ạḅem bọ:
8 *“Kẹ́ḅaar mun ẹmhu, ịdipho ạburude phọ anyina ọḅaar bọ ẹpe Meriba,
ịdipho bịdi ọrol bọ ḍio phọ ạḍiphe ẹpe Masa ẹpe ẹdala phọ.
9 Sịphe phọ bịdi ụdegh bọ ịmi ophogh,
kụ ạri mọmiin ni ịpe mị aḍighinaan bọ bịdi.
10 Esi inyadi ạsia ịpher ịmi ọrolan rꞌawe phọ ạbuphe phọ.
Mị ạḅem mọ, ‘Bụen phọ, pọ eeghe ọdo awe ọḅaar ẹmhu.
Bịdi úmeera ụnaghanan iilogh phọ ạmi’
11 *Kụ ẹghagh ologhi ạmi kụ mị aghunya mọ,
‘Nyina kéḍigh de phọ, sịphe mị mụngo bọ inyina ophooghian.’”