Ẹnaan kụ Oogboom Ịiruen oomo awe.
94
Ọmoogh-we, nạ kụ Ẹnaan dị rạliom ghan we;ḍeenaan ophin ologhi phọ ạna.
2 Nạ kụ oogboom ịiruen oomo awe;
ḅetenu ạngo bụphe ophoophe bọ loor ịlo ẹkpianaan bịdi.
3 Kꞌạpur amem kụ ẹdi awe ẹkaraph eḍighinom kọmoogh ghan bọ ọḅaal ologhi?
Kꞌạpur-aḍio, Ọmoogh-we?
4 Kꞌạpur amem kụ ẹdi awe ạsipioghom kọḅaar ghan bọ ẹmhu
kụ oobagaam ịkaraph phọ ạbidi?
5 Bịdi ọozighiḍi weye phọ ạna, Ọmoogh-we;
bịdi ọgbiphoghom we dị oḍighi bụo ạna.
6 Bịdi ọze rukpukele ạnmariir rꞌạbunyigo,
kụ ọḅaram ruuruen dị odi sịphe ade phọ ayira.
7 Bịdi ọḅem mọ, “Ọmoogh-we phọ iyoor ụ́miin;
Ẹnaan phọ Ịzirel ípogh ị́logh elegh.”
8 We ạmi, uḍighi ika kụ nyina eḍighi ighiil aruwelologhi?
Kꞌạpur amem kụ nyina ẹtuugha?
9 Ẹnaan kụ ẹlhem reḅeri — ọdi kátue ạnaghan ḍụghum?
Ọdi ạlhem riḍien ayira — ọdi kạ́miin ḍụghum?
10 Ọdi ạḅaaghiom reelhe — ọdi bịdi kạ́liom ḍụghum?
Ọdi kụ ọtughemia oomo awe — ọdi mạar ólhegheri ḍụghum?
11 *Ọmoogh-we phọ alegheri ni ịlo bịdi rọotughian;
ọdi alegheri ni rigbiom ạbidi mọ oopho ni bịn.
12 Ọmoogh-we, ọpo eeghe ọḅaal ologhi dị odianaan oye dị nạ kụ aromoghiom,
ọpo nạ ạtughemi bọ ologh phọ ạna.
13 Nạ ạngo nyọdi ophooghian esi ariiḍio ịiḅaghami
tụtu oguph ooni osiphom awe ẹkaraph eḍighinom ịyaar.
14 Ọmoogh-we phọ kạ́ḅitonaan weye ọdi;
ọdi kạ́bile ạ́ḍua we dị oḍighi bụo ọdi.
15 Iiḅi ịiruen phọ kẹḅile ẹtol sịphe aruutu ịiruen,
ḅịle oomo awe aruukuan kọmeeraam ni.
16 Ạnhian kụ ụmeeraam ịmi mem mọ mị eenan bọ rꞌawe ẹkaraph eḍighinom ịyaar?
Ạnhian kụ uḍighan ịmi mem mọ mị eenan bọ rꞌawe ạsipioghom mọ?
17 Mụghumo Ọmoogh-we phọ kụ ịmi ḍịghaagh ụ́loghonaan bọ,
ọbo mị maagborion akeel de oḅoorian.
18 Mem dị mị ạḅem mọ owol ạmi rạkorom,
ẹphomoghian phọ ạna rémuneen ghan bọ, Ọmoogh-we, kụ ịpham ịmi ẹmeremi.
19 Tọrobo amem lọ mị ạaḅaghamian loor ạḅile ạmoogh oḅio kaph-kaph,
nạ ụudereghi ịmi ạḅile ụngo ịmi ọḅaal ologhi.
20 Nạ ọ́moogh mụḅoph rꞌawe ịkaraph ịiruen
dị rọmeremi ghan ịkaraph ịiruen,
21 we dị omite ịkaraph aruuzue ịlo ọphuenom abugey awe,
kụ ọḅile ozu ịḅaal oye dị mạar ụ́piom.
22 Kụ ọlo Ọmoogh-we phọ rụgbaanaan ghan ni ịmi;
Ẹnaan ạmi riikpereghi ghan ni ịmi.
23 Ọdi kạliom ni bịdi loor ẹkaraph eḍighinom ịyaar phọ ạbidi
kụ apiemi loor ạsipioghom mọ ạbidi;
Ọmoogh-we Ẹnaan phọ ayira kapiemi ni bịdi.