Ẹnaan kụ Ogbogh Ọdaam mọ
97
Ọmoogh-we phọ kụ ọdaam. Nạ ade, mọogh iboh.Ịḅaal ologhi, nyina arukpu-ogbo ạriphiiny phọ.
2 Ọotu rꞌufiri akoom nyọdi;
ọdi ạdaam rꞌaruukuan rꞌiiḅi ịiruen.
3 Ạnian kụ iḍia risigh ọdi,
kụ rele ghan kekoom bụmulogh-ḍien phọ ọdi.
4 Ọmepheghian phọ ọdi ạngo ḍịḅaal aḅirini phọ;
ade phọ ẹmiin kụ ephiigha.
5 Aroogbolom phọ ẹgbo mụdi uba risigh Ọmoogh-we phọ,
ghisigh Ọdaam Oomo Ade phọ.
6 Ạsike phọ egbeelom ruukuan phọ ọdi,
kụ oomo areelhe phọ ẹmiin eegu phọ ọdi.
7 Tọrobo oye lọ aaseeny ịkaaghineen ạrumugh kạmoogh umugholoor,
oomo ạrumugh phọ ekpuḍian ghisigh Ọmoogh-we phọ
8 Ologhi awe phọ ạZayon ạḅaal,
ḅịle ạramha aJuda robo
loor esi ịiruen phọ ạna, Ọmoogh-we.
9 Ọmoogh-we Oomo Ịikpo, nạ kụ ọdaam oomo ade phọ;
nạ ạkar aḅugh apu oomo ạrumugh.
10 Ọmoogh-we phọ ạpomoghian bụphe oghel bọ ịkaraph;
ọdi raakpereghi ghan ni sighuḍum awe ọdi,
ọdi rạtagharan ghan ni bịdi rạghaagh awe ẹkaraph eḍighinom ịyaar.
11 Ạḍiḅaal resoorom ghan weye aruukuan,
ḅịle iboh edianaan bugeny phọ.
12 Oomo phọ anyina awe aruukuan phọ, ịmoogh iboh
loor esi ịpe Ọmoogh-we phọ maḍighi bọ.
Ịitughian ịpe Ẹnaan Iigbia phọ maḍighi bọ
kụ ẹngo nyọdi ḍịseph.