16
Bịdi ụsighe Igbe Ịyo phọ osiom ogbogo phọ aDevid aseleminaan bọ kụ oseere ologhi, kụ bịdi oḍighi rạraar aghuḍum, ọḅile ọphinyon rịkia ẹboroph ọngo Ẹnaan. 2 Mem dị aDevid mạmadan ọphinyon ạrikia phọ, ọdi ạseph we phọ esi aḍien Ọmoogh-we phọ 3 kụ adiighi bịdi riiḍien. Ọdi ạngo tọrobo oye rꞌạtorobo ạnir ọlo Ịzirel eniin eeḅoghoḍi ạbred rꞌetigh ẹnam dị ọphoghi rꞌịgharaghar iimuma avain.4 ADevid ạmaaghi buniin ạbuo aLivai phọ oḍiemiom ịiḅereghi Ọmoogh-we Ẹnaan phọ Ịzirel, sịphe aghisigh Igbe Ịyo phọ, ọmoor ghan ạsuor ọsephom ọdi. 5 Asaf kụ ọdi ọma oḍiemiom rꞌạZekaraya otum ọdi. ẠJeyel, aSemiramot, ạJehiel, aMatitaya, Eliab, aBenaya, Obed Idom rꞌạJeyel kụ ạbuo oti ạrene. Asaf kạkpaala ghan ịkpaalaam, 6 kụ ịyal ariil ạrikia, aBenaya rꞌạJahaziel, kụ kopula rọkuodu oomo amem ghisigh Igbe Ịyo phọ. 7 Pọ kụ ẹḅel amem dị aDevid ạngo Asaf rꞌạbunon ạbuo aLivai oḍighi ọmoor ghan oboom Ọmoogh-we phọ.
Ạḍuor oboom
8 Ịngo ḍịseph Ọmoogh-we phọ, egbeelom igbogh phọ ọdi;
ịḅeni reelhe phọ ịpe ọdi maḍighi bọ.
9 Ịmoor sụor eboomiom Ọmoogh-we phọ;
ẹghaaph ịlo iiḍighi ịiḍaany phọ ọdi maḍighi bọ.
10 Itu ọmoogh ọḅaal ologhi ịduon yira oḍighi bọ bụo ọdi;
ẹkpianaan oomo ạbulo ooseeny nyọdi ọmoogh iboh.
11 Ịiḅereghi Ọmoogh-we mọ ịloghonaan inyina ḍịghaagh
kụ eeseeny nyọdi oomo amem.
12-13 Nyina ạnmuny ạnmuny ạJekob otelhedom mọ ọdi;
nyina ạnmuny ạnmuny Ịzirel, oye phọ ọdi ạsaḅar bọ:
ịitughian ịiḍaany phọ Ẹnaan eḍighi bọ
rꞌịiruen phọ ọdi aagbo bọ.
14 Ọmoogh-we phọ kụ Ẹnaan ayira;
ịto phọ ọdi ịlo oomo aḅirini phọ.
15 Kébula ịyo phọ Ẹnaan,
ịpe ọdi aseere bọ mọ ẹrol kꞌagee-pọ,
16 *ịyo phọ ọdi aghiran bọ rꞌEbraham
ruguanaan phọ ọdi aguanaan bọ Ạizik.
17 *Ọmoogh-we phọ aghiran ịyo rꞌạJekob
dị kẹtol kꞌagee-pọ.
18 Ọdi ạḅem mọ, “Mị kịngo inyina de phọ aKenan.
Ade phọ ạḍiphe keḍighi bin anyina.”
19 Awe Ẹnaan ụ́bugh ḍita,
oḍighi ruuruen sịphe ade phọ aKenan.
20 Bịdi oyeela ọḍua eelhe ọgba eelhe,
ọḍua eniin ạga aḅirini osi ẹnon.
21 *Kụ Ẹnaan ímeera mọ oye aviilom bịdi;
esi ọmaar ọpham ạbidi, ọdi ạphur rụru bụdaam mọ.
22 Ọdi ạḅem mọ, “Kéḍighi ịyaar butelhedom mọ mị mạsaḅar bọ;
kẹ́ḅogh riil phọ ạmi.”
23 Ịmooraan Ọmoogh-we phọ, oomo aḅirini.
Igbeelom tọrotoro aḍio ooḅi ọghaaph phọ mọ ọdi mụphel iyira.
24 Igbeelom eegu phọ ọdi eleenye reelhe,
ịiḍaany phọ ọdi ẹḅeni oomo areelhe.
25 Ọmoogh-we phọ ạbugh ni iboom kụ ạkpe ni ooseeny iboom;
ọdi ạkpe oghueni opuemi oomo ạrumugh.
26 Ạrumugh oomo ịpheri phọ areelhe phọ eḍighi ịkaaghineen ạrumugh
kụ ọlo Ọmoogh-we phọ kụ ạlhem sịke phọ.
27 Eegu rꞌigbogh ekoom nyọdi;
ịikpo rꞌibo emuza Otu Ịiḅereghi phọ ọdi.
28 Iboom Ọmoogh-we phọ, oomo awe sịen ade phọ;
iboom eegu phọ ọdi rꞌigbogh phọ ọdi.
29 Iboom ḍien eegu Ọmoogh-we phọ;
ịsighe ruunmo erumom Otu Ịiḅereghi phọ ọdi.
Izumeri rụmhu ghisigh Oye Iigbia phọ mem lọ ọdi aru amite
30 ikpekper egbodo ọdi, oomo ade phọ.
De phọ opighi ni kụ kótue ọpighiron.
31 Ịmoogh iboh, de rꞌạke.
Ịḅeni oomo areelhe phọ mọ, “Ọmoogh-we phọ ọdaam.”
32 Imoogha, ọphiiny rꞌoomo ịlo repooghu loor ạna.
Ịmoogh iboh, iizo rꞌoomo ịlo edi loor anyina.
33 Ireeny phọ edi bọ rụukpua phọ kẹlo ḍịolho iboh,
mem dị Ọmoogh-we phọ aru ọda ade phọ.
34 *Itu ọngo ḍịseph Ọmoogh-we phọ, ịdi eḍighi bọ ọdi ạnighe ni;
ẹphomoghian phọ ọdi edi ghan bịn.
35 Ịḅeni nyọdi, “Ụphel iyoor, Ẹnaan Ọpelia ayoor,
uukpomoghi iyoor eniin esi; ụsighe iyoor ạḍuanam sịphe aḍita areelhe phọ,
ọbo yoor ọngo ḍịseph
ọḅile oboom ḍien iigbia phọ ạna.”
36 Iboom Ọmoogh-we Ẹnaan phọ Ịzirel!
Iboom nyọdi nyịidipho ḅịle kꞌagee-pọ!
Kụ oomo awe phọ ọḅem mọ, “Ẹrol li ịdipho,” kụ ọseph Ọmoogh-we phọ.
Ọpham ịiḅereghi sịphe Jeruselem rꞌạGibion
37 ADevid ọdaam mọ aseere Asaf rꞌạbunon aLivai mọ oḍiemiom ghan ịiḅereghi phọ rọpam ghan bọ sịphe oseere bọ Igbe Ịyo phọ; mọ bịdi oḍighi ghan iiḍighi phọ ạbidi ḍio etum ḍio. 38 Obed Idom ọony phọ aJedutun ḅịle rꞌodiinydi rꞌọphaanya awe ạbuo ọto ọdi kụ ạbudi kọloghonaan ghan ḍịghaagh. AHosa rꞌObed Idom kụ awe dị oseere ophogh ghan ạrunhu-aḍibuo phọ.
39 ẠZedok oyil ẹkia phọ rꞌạbunon ariil ạrikia kụ ạbuo oḍiemiom ịiḅereghi Ọmoogh-we phọ esi phọ rọpam ghan bọ ịiḅereghi sịphe Gịbion. 40 Tọrobo ạḍiroor rꞌadulhe bịdi ụsighe ghan okpom ạnam oguom nịan sịphe enmeny ạrikia phọ, ọdaphan ịpe ọge bọ sịphe Ologh phọ Ọmoogh-we phọ ạngo bọ Ịzirel. 41 Sịphe phọ ọrol bọ rꞌạbidi aHeman rꞌaJedutun rꞌạbunon kụ awe dị ọkar kụ ọsaḅar ọmoor ghan oboom Ọmoogh-we phọ esi ẹphomoghian phọ ọdi edi ghan bọ bịn. 42 AHeman rꞌaJedutun ụḅile kẹn ophogh ghan rụkuodu rꞌịkpaalaam rꞌịnon ạraraar ephegh dị opheghom ghan mem lọ rọmoor sụor oboom. Awe ọto aJedutun kụ ukori ghan rụnhu-aḍibuo phọ.
43 *Kụ tọrobo oye agheel kꞌọdi, kụ aDevid agheel kꞌọdi ọrolan ẹnum amem rꞌọto ọdi.