Ịma eḍighinom Ọmoogh-we phọ esi awe ọdi
106
*Iboom Ọmoogh-we phọ!Ịngo ḍịseph Ọmoogh-we phọ, ịdi eḍighi bọ ọdi ạnighe ni;
ẹphomoghian phọ ọdi edi ghan bịn oomo amem.
2 Ạnhian kụ katue agbi oomo iboom ạraraar phọ ọdi maḍighi bọ;
ạnhian kụ katue ạseph nyọdi ịdi kẹkasian?
3 Ọḅaal ologhi kụ odianaan bụphe ọnaghanan bọ ịto phọ ọdi,
bụphe oomo amem roḍighi ghan bọ ịlo ẹnighe.
4 Ụutughian ịmi, Ọmoogh-we, mem dị nạ raanmoom we phọ ạna,
ụloghom ịmi mem dị nạ ạtagharan bịdi.
5 Mị ụmiin aani edughom awe eelhe phọ ạna,
uḍighan bụphe oḍighi bọ bụo ạna
ụmoogh aani ọḅaal ologhi.
6 Yoor moḍighi ịkaraph ịdipho ạburude ạburude phọ ayoor;
yoor mọpioman ọḅile oḍighi ịpe ị́nighe bọ.
7 *Ạburude ạburude phọ ayoor ẹpe Ijipt ụ́naghanan ịiḍaany phọ Ẹnaan eḍighi yogh bọ;
bịdi uwula ni ịdi ọdi aḍeenaan bịdi ẹphomoghian phọ ọdi ịbadi amem,
kụ bịdi ọḅaar ẹmhu esi Ẹnaan Oomo Ịikpo sịphe Ọphiiny Igbilha phọ.
8 Kụ ọlo, ọdi ạphel bịdi ịdipho ọdi aguanaan bọ
ịlo oḍeenaan igbogh ịikpo phọ ọdi.
9 *Ọdi ạto ạḅeni Ọphiiny Igbilha phọ kụ ạmuum ạaya;
ọdi arelhiom we ọdi ạḅeenyom ḍịgharaghar ade.
10 Ọdi ạphel bịdi ḍịghaagh ạbuphe bịdi okia bọ;
ọdi ạtagharan bịdi esi ạbumulogh-ḍien phọ ạbidi.
11 Kụ ạmuum ạminoghom bụmulogh-ḍien ạbidi,
rꞌoniin ókpetenaan.
12 *Kụ awe ọdi omeeraam ruguanaan phọ ọdi
kụ ọmoor oboom nyọdi.
13 Kụ ọlo bịdi uugborion ni owula ịpe ọdi aḍighi bọ
kụ oḍighi yogh rạraar dị úkori ọdi aromoghiom bịdi.
14 *Bịdi ụmoogh rụuphua eḍien sịphe ẹdala ọosaar phọ
kụ ọdegh Ẹnaan phọ ophogh;
15 kụ ọdi ạngo bịdi ịpe bịdi ọlom bọ
kụ ạngoom ẹkaraph ẹzegh ogbo ạbidi.
16 *Sịphe ẹdala ịisaar phọ bịdi ọghagham ologhi Mozis,
rꞌEeron oyil ạrikia phọ Ọmoogh-we phọ ạsaḅar bọ.
17 Kụ ade phọ eruphaan kụ ẹmin Datan
kụ eekpereghiom Abiram rꞌeghunotu phọ ọdi.
18 Ạnian esoorom bụmatuan ạbidi
kụ ẹsuughi we ẹkaraph eḍighinom ịyaar phọ.
19 *Bịdi ọsighe gol kụ ọlemom mọony aḍilephiri ạnam dị oseere sịphe Sainai
kụ ooseeny ẹkaaneen ịyaar phọ ẹpe;
20 bịdi oonmenenom eegu phọ Ẹnaan
rꞌạnam dị rẹtaal ghan rọogho.
21 Bịdi owula Ẹnaan phọ ẹsighe bọ igbogh iiḍighi
kụ ẹphelom bịdi ẹpe Ijipt.
22 Pọ eeghe ịiḍaany dị ọdi aḍighi ẹpe!
Pọ eeghe ịikia ạraraar sịphe Ọphiiny Igbilha phọ!
23 Mem dị Ẹnaan ẹḅem mọ ọno kapiemi we ọno,
aMozis otelhedom mọ ọdi ạsaḅar bọ ómeera mọ Ẹnaan ephiemi we phọ
kụ asophoghom ophin ologhi phọ ọdi.
24 *Kụ bịdi oghel ịma ade phọ Ẹnaan aguanaan bọ bịdi,
loor esi dị bịdi úmeeraam nyọdi.
25 Bịdi ụrologhu iloghi arugbogo ạbidi kụ ọkunu ghan
kụ Ọmoogh-we phọ ụ́naghanan.
26 Kụ iḍighi kụ ọdi ạphur bịdi rụru
mọ ọno kaḍighi ịdi bịdi komugh ẹpe ẹdala ịisaar phọ,
27 *ạḅile ạawalalami nmụny ạnmuny ạbidi
bịdi omuughu sịphe iiruen areelhe phọ.
28 *Kụ ẹpe Pior, awe Ẹnaan ọḅophan ooseeny Baal
kụ olhe ẹkia dị ọphighiron ọngo ịkaaneen ạraraar dị ghuḍum ị́moogh.
29 Iiḍighi ạbidi ịghagh ni ologhi Ọmoogh-we phọ
kụ ẹkaraph ẹzegh emite ogbo ạbidi.
30 Kụ ọlo, ạFinehas aḅetenu kụ ạliom bụphe ọmoogh bọ apum,
kụ ẹkaraph ẹzegh phọ esophoghian.
31 Mọotughian ni ịphen phọ ọsephom nyọdi kꞌaḍiodi
kụ kẹtol ghan oomo amem dị retu.
32 *Sịphe okol ạmuum aMeriba awe phọ oḍighi ịdi ephin ologhi Ọmoogh-we phọ,
kụ aMozis ạrol esi ịiḅaghami loor ẹmhu ạbidi.
33 Bịdi oḍighi ịdi ephin ologhi ọdi
kụ ịkaraph ikpo ọnhu ẹḍua ọnhu ọdi bịn emite.
34 *Bịdi ụ́ze we aruru phọ,
ịdipho Ọmoogh-we phọ ạto bọ mọ bịdi oḍighi phọ,
35 kụ oophinighan rꞌạbidi
ọḅile ọdaphan reten awe phọ Ẹnaan úlegheri bọ.
36 Awe Ẹnaan ooseeny ịkaaghineen ạraraar,
kụ ịphen kụ iḍighi ịyaar dị ophiemi bịdi.
37 *Bịdi ọḅogh nmụny rꞌạnmanyaan ạbidi ọngo
mọ oḍighinom rạraar aghuḍum aruru ẹpe Kenan.
38 *Bịdi ọze nmụny phọ ạbuphe úlegheri aani bọ
kụ ọphuenom de phọ.
39 Bịdi ọphuenaan siloor ạbidi rꞌeḍighinom ịyaar phọ ạbidi
kụ úmeelom Ẹnaan phọ.
40 *Kụ iḍighi kụ Ọmoogh-we phọ ạghagham ologhi we phọ ọdi;
kụ ạḅitonaan bụphe ọdi ạloghomaam bọ.
41 Ọdi ạḅitonaan bịdi ạwilenaan ịikpo awe aruru phọ,
kụ ạbumulogh-ḍien ạbidi kụ ụḅile ọda bịdi.
42 Ạbumulogh-ḍien ạbidi ọgbiphoghom bịdi
bịn eḍighi ịdi bịdi osoorom iboom ọngo bụmulogh-ḍien phọ.
43 Ịbadi amem Ọmoogh-we phọ ạtagharan ghan ni we phọ ọdi,
kụ ọlo bịdi uphin ọḅaar ghan ẹmhu esi ọdi kụ olegheri
kụ osuma esi ịkaraph.
44 Rꞌịduon phọ bịn Ọmoogh-we phọ ạnaghanan ni mem lọ bịdi omoghi omitiom,
kụ ọdi akiririom aphogh ịminimiin phọ ạbidi.
45 Loor ẹmhu ạbidi ọdi ạatughian ịyo phọ ọdi,
kụ esi eboom ẹphomoghian phọ ọdi, ọdi adughe rạraar.
46 Ọdi aḍighi ịdi oomo ạbuphe ọgbiphoghom bọ bịdi
ọmoogh ọnma ighirigiir ạbidi.
47 *Ụphel iyoor, Ọmoogh-we Ẹnaan ayoor,
ạḅile ụsighe iyoor ạḍuanam sịphe aḍita areelhe phọ,
ọbo yoor ọngo ḍịseph
kụ oboom ḍien iigbia phọ ạna.
48 Iboom Ọmoogh-we phọ, Ẹnaan phọ Ịzirel.
Iboom nyọdi nyịidipho kụ kꞌagee-pọ;
tọrobo oye ạḅem mọ, “Ẹrol li ịdipho!”
Iboom Ọmoogh-we phọ!