Rookolobian orool Igbe Ịyo phọ oḅulemi Jeruselem
15
Ịlo ạsuo aloor ọdi, aDevid adoghoḍi ruutu sịphe ẹmha phọ aDevid. Ọdi ạḅile aseleminaan esi Igbe Ịyo Ẹnaan, kụ ạza ogbogo azuom. 2 *Kụ ọdi ạḅem mọ, “Ạbuo aLivai bịn kụ otool Igbe Ịyo phọ, loor esi dị bịdi kụ ạbudi Ọmoogh-we phọ ạsaḅar ọpham ḅịle rꞌoḍighinaan ọdi oḍighi kꞌagee-pọ.” 3 Kụ aDevid aagbologh oomo awe Ịzirel mọ oruughi Jeruselem ẹrol dị ọsighe Igbe Ịyo phọ osiemi esi phọ oseleminaan bọ. 4 Ẹdi etum, ọdi arom ạghiom nmụny ạnmuny Eeron rꞌạbuo aLivai. 5 Sịphe eghun phọ aLivai awe phọ ạbuen omite: Ụriel ọlo ọto aKohat dị aphogh ghan 120 awe; 6 Asaya ọlo ọto aMerari dị aphogh ghan 220 awe; 7 aJoel ọlo ọto aGerson dị aphogh ghan 130 awe; 8 aSemaya ọlo ọto Elizafan dị aphogh ghan 200 awe; 9 Eliel ọlo ọto ạHebron dị aphogh ghan 80 awe; 10 Ạminadab ọlo ọto Ụziel dị aphogh ghan 112 awe.11 ADevid ạamaghagh Zẹdok rꞌẠbayata ariil ạrikia phọ rꞌodiiny ạbuo aLivai, Ụriel, Asaya, Joel, Semaya, Eliel rꞌẠminadab mọ oru. 12 Ọdi ạḅeni bụo aLivai phọ, “Nyina kụ abuḍiemiom aropolo ạbuo aLivai. Iselemian siloor anyina rꞌạbuo aLivai phọ, ẹrol dị nyina ẹsighe Igbe Ịyo Ọmoogh-we Ẹnaan phọ Ịzirel esiemi esi phọ mị maseleminaan bọ. 13 Loor esi dị nyina ị́tol sịphe ọpham aani ẹḅel amem mọ, Ọmoogh-we Ẹnaan phọ ayira ụliom iyira esi dị nyọdi ụ́uḅereghi ghan ịdi ẹkpianaan.”
14 Kụ ariil ạrikia phọ rꞌạbuo aLivai oselemian siloor ạbidi ẹrol dị opoophe Igbe Ịyo Ọmoogh-we Ẹnaan phọ Ịzirel. 15 *Ạbuo aLivai phọ uḅetonom rọkolom rụpha ạbidi, ịdipho Ọmoogh-we phọ mạto bọ sịphe ịge phọ aMozis.
16 ADevid ạto ạḅeni buḍiemiom ạbuo aLivai phọ mọ ọson we kịrokiro ọmoor ghan sụor, opheghom reephegh ọḅaal ologhi rꞌịne rꞌịkpaalaam. 17-21 Sịphe aropolo ạbuo ạsuor phọ kụ ẹdi bịdi ọson we phọ ạbuen ọkpaala ghan ịkpaalaam enaba: Heman ọony aJoel, ọnyo asiya odi Asaf ọony aBerekaya, ḅịle rꞌEtan ọony aKusaya ọlo ọto aMerari. Ọloghonaan ạḍighaagh bịdi, bịdi ụson bụo aLivai phọ ạbuen oti ghan ọne dị ẹḍogh ẹghi ạnyu: Zẹkaraya, Jạaziel, Semiramot, Jẹhiel, Uni, Eliab, Maaseya rꞌaBenaya.
Esi oti ghan ọne dị ẹḍogh phọ emeel, bịdi ụson bụo aLivai phọ ạbuen: Matitaya, Elifelehu, Mikneya, Azazaya rꞌObed Idom rꞌạJeyel bụo okori ghan Otu Ịiḅereghi phọ.
22 Loor ẹmaar ọdi esi iitia, ạKenanaya kụ ọdi ọsaḅar oḍiemiom ạbuo iitia ạbuo aLivai phọ. 23-24 ABerekaya rꞌElkana kụ ọḅaram Obed Idom rꞌaJehaya, kụ ạbudi ọson okori ghan Igbe Ịyo phọ. ASebanaya, ạJosafat, ạNetanel, Amasai, ạZekaraya, aBenaya rꞌEliezer kụ ạbudi ọson ophula ạrukuodu ghisigh Igbe Ịyo phọ.
Morool Igbe Ịyo phọ rọki Jeruselem
25 Kụ aDevid ọdaam mọ, abuḍiemiom Ịzirel rꞌawe ịtooghi ẹgham ọghi osi otu phọ Obed Idom ọsighe Igbe Ịyo phọ, kụ bịdi olhe ẹyaal. 26 Bịdi ọphinyonom rịkia oḍual ilephiri ạsinam rꞌoḍual idughuna, pọ ịdi ọmaar ọmiin mọ Ẹnaan ẹloghonaan ni ḍịghaagh bụo aLivai phọ ọpham bọ Igbe Ịyo phọ. 27 ADevid ạkpologhian oboom ạsuoma dị ọkolom ịma iidugha. Ịduon kẹn kụ ẹdi ạroko-ạsuor phọ oonmenan, ạKenanaya oḍiemiom mọ ạbidi rꞌạbuo aLivai phọ orool bọ Igbe Ịyo phọ. ADevid ạḅile kẹn azua oopa ekpologhi. 28 Kụ oomo awe phọ Ịzirel ọdaphan Igbe Ịyo phọ osi Jeruselem rꞌịlooghi iboh rꞌạroḍogh ạrukuodu rꞌạraphaal rꞌịkpaalaam rꞌạrene.
29 Ịduon ọsighe bọ Igbe Ịyo phọ osiemi sịphe ẹmha phọ, aMikal ọnyani phọ ạSol aphogh loor eghuugh-ookuugh kụ ạmiin Devid erugh dị rạker kụ rapeleghu rꞌọḅaal ologhi, kụ eḍighinom ịyaar phọ aDevid ekia nyọdi iboom.