Iiḍighi aDevid ẹpe Jeruselem
14
AHiram ọdaam mọ aTaya arom ni dom omuul aḍighi ạghiomonaan Devid; ọdi ạsighe ni rạsaga ạghiomonaan Devid kụ ạḅaram bụkaam ạmaka rꞌawe dị ọmaar ọsighe asighiigh kụ ọloghom otu mọ ọghi ọlogh otu ọdaam mọ. 2 Kụ iḍighi kụ aDevid aloghoma ni mọ Ọmoogh-we phọ kụ ạmeremi bọ ni nyịno oḍighi ọdaam eelhe Ịzirel ḅịle kẹn mọ ọdi raḍighi ịdi ọmar phọ ọno kạmoogh ẹelha loor ẹmhu awe phọ ọdi.3 Sịphe ẹmha aJeruselem, aDevid aphinogh bụnon ạnmariir kụ ạmaraghi bụnon alephiri rꞌạnmanyaan. 4 Bụen ạnmuny dị ọmaranaan nyọdi ẹpe Jeruselem: Samua, Sobab, Netan, rꞌạSolomon, 5 Ibhar, Elisua, Elpelet, 6 aNoga, aNefeg, ạJafia, 7 Elisama, aBieliada, rꞌElifelet.
Ọkpar opu weye aFilistia phọ
8 Mem dị awe aFilistia ọnaghan mọ moḍighi aDevid ọdaam mọ dị kạda oomo Ịzirel, awe ẹgham ạbidi onyeene ọghi osiph ọdi. Kụ aDevid agiriph erelhe ọghi ọteeny ạbidi. 9 Awe aFilistia phọ osi Eḍiiny aRefaim kụ omiigh owum ạraraar. 10 Kụ aDevid apuru Ọmoogh-we phọ mọ, “Mị ụki ni uzuom ẹgham we aFilistia phọ ḍụghum? Nạ kụngo ịmi ọkpar opu ḍụghum?”
Kụ Ọmoogh-we phọ ạphagharanaan mọ, “Ii, kịa ni. Mị kạngo ni nyịna ọkpar opu phọ.” 11 Kụ aDevid azuom bịdi ẹpe Baal Perazim kụ ạkpar apu bịdi. Ọdi ạḅem mọ, “Ọmoogh-we phọ maḅoorogh atoḅologhi esomanan ạmi ẹpomoghian phọ ạmi dịadi umooph mụum.” Kụ iḍighi kụ moghol esi phọ ịpa phọ mọ aBaal Perazim. 12 Mem mọ awe phọ aFilistia phọ rosumughu bọ, bịdi ụwile yogh ni ịkaaghineen ạrumugh phọ ạbidi, kụ aDevid ạto ạngo mọ ọsuughi nịan.
13 Íbia kụ awe aFilistia phọ oḅula sịphe eḍiiny phọ kụ omiigh ọḅile owum ạraraar. 14 Kụ aDevid ạḅile apuru Ẹnaan, kụ ọphagharanaan phọ ạḅem mọ, “Kạ́ki. Googo akiton ạghi ọman ạbidi kụ ạghi ozuom ẹpe etuman bọ siiphughi phọ. 15 Mem dị nạ ạnaghan ḍịgum awe dị rogiriph erelhe ẹpe ạnyu ireeny phọ, pọ kịa azuom loor esi dị mị kạpurom ni atelhe aḍiemi ghan ọghi oogulemi awe ẹgham mọ aFilistia phọ.” 16 ADevid aḍighi ni ịpe Ọmoogh-we phọ mạto bọ, kụ aphorogh we aFilistia aḅulemi ọman emiigh Gịbion kụ ẹghi esi Gezer. 17 Aḍien aDevid eeleghaan oomo arikpisi, kụ Ọmoogh-we phọ aḍighi ịdi tọrobo eelhe eghiilaan nyọdi.