“Maija'quë pa'i hue̱'ña yure cato pa̱i ja̱'re co̱ni pa'iye a'ë,

i̱ohua'i ja̱'re pa'ija̱'quëpi.

I̱ohua'ipi i̱ pa̱i pa'ija̱'cohua'i a'ë.

Pa'ijëna,

Maija'quëpi i̱ohua'i pëca ja'quë pa'ija̱'quë api.

4 Ja̱ maca Maija'quëpi i̱ohua'i oise'e të̱no je̱ocasipi.

Ja̱ maca ju̱'iñe,

ai yo'oye,

ai cuasajë oiye,

a'siye peosipi,

tsoe tëto saise'e sëte,

ja̱'në pa'io pa'ise'e.”

5 Ja̱ maca ñu'i saihuë ñu'iquëpi capi:

“Yë'ëpi si'aye huajëyese'e ne saoyë.”

Yequeje̱ capi:

“Toyajë̱'ë.

Iye coca care paye a'ë.

I̱tina quëcojë pa'iye a'ë.”

6 Ja̱je ca to̱quë capi,

yë'ëre:

“Tsoe ne saohuë.

Yë'ë a'ë,

du'ru aquërepa cui'ne tëjiquë,

je'nëna pa'iquë.

Oco ëa ju̱'iquëni yë'ëpi o̱cuasi'i pa'i oco cojerepa ayere do'i peoyerepa.

7 Si'aye quëcosiquë etasipi,

yë'ëre i̱ pëca ja'quëre paja̱'quë api,

cui'ne i̱ni yë'ë mamaquëre paja̱'quë a'ë,

si'aye iyere paja̱'quë api,

mamaquë pa'i do'ire.

8 Ja̱je pa'iquëta'are yë'ëre tuiyere yo'o jujacohua'ire,

sehuoye jëa coecohua'ire,

pa̱ire coecohua'ire,

huaicohua'ire,

yequë nomiohua'ire yo'ocohua'ire,

dahuë yo'ocohua'ire,

pa̱i nese'ere ëjare pa'ë cuasacohua'ire,

cui'ne coa cosocohua'ire saiye pasipi,

toa cui'ne azufre tsë̱'isi jairana,

cayaye acore se ju̱ni huesë hue̱'ñana.”

9 Ja̱ maca siete hui̱ñaohua'i aquëpi daji'i,

siete u̱cu duruhuë̱a tëjiyerepa ai yo'oye ti̱mëse'ere pasiquëpi.

Ja̱ëpi dani capi,

yë'ëre:

“Daijë̱'ë.

Më'ëre i̱ñosi'i,

Yëi ñama huejaja̱'core,

i̱ nëjore.”

10 Huëo ca̱ni ñañeje pa'ye ñahuë.

Ñaquëna,

hui̱ñaëpi yë'ëre jai cu̱tihuëna sapi.

Sani i̱ñopi jai Jerusalén daripëre de'ocore pani,

ma'tëmopi Maija'quë quë'ropi cajecona.

11 Ja̱ daripë cato Maija'quë miañe ju'ayepi miaco paco'ë.

I̱o miañe cato de'o quë̱na pë miañeje pa'ye paji'i,

Jaspe hue'yosi quë̱na miañeje pa'ye,

ña etoja̱i quë̱na huëje̱ pa'ye paji'i.

12 Ja̱ daripë yërëhueja̱'a jai ë̱më tëhuopa tëhuosico paji'i.

Ja̱je pa'ioni doce eta sa'noa paji'i.

Eta sa'noa ñape te'e hui̱ñaë nëcapi.

Cui'ne eta sa'noa ñape doce Israel pa̱i tsëca mamire toyase'e paji'i.

13 Ë̲së mëi te̱'tere toaso̱ eta sa'noa paji'i.

Ë̲mëje'e te̱'tere toaso̱ eta sa'noa,

huë'ehuë te̱'tere toaso̱ eta sa'noa,

cui'ne ë̱së du'i hue̱'ñare toaso̱ eta sa'noa paji'i.

14 Jai daripë tëhuopa cato doce quë̱na pë̱ana quëco paco paji'i.

Ja̱ quë̱na pë̱ana Yëi ñamapi doce jëjo daosicohua'i mamire toyase'e paji'i.

15 Yë'ë ja̱'re co̱ni hui̱ñaë coca caquë cato i̱ jë̱tëre oro tarapëre ca̱të tarapëje̱ pa'iore ca̱jipi,

jai daripë cue̱cueja̱'coni,

i̱o eta sa'noa,

cui'ne i̱o tëhuopa.

16 Jai daripë cato si'a yë'quë maca jaico paji'i,

je̱'ñe tëcapë tsoaye ja'ye si'ao.

Hui̱ñaëpi i̱ cue̱cuecopi jai daripë cue̱cuequëna,

caya mil cui'ne docientos kilómetros paji'i.

I̱o tsoaye,

i̱o mëñe tsoaye cui'ne i̱o je̱'ñe tëcapëje̱ cui'na ja'yese'e paji'i.

17 Ja̱ jeteyo'je tëhuopa tsoayere cue̱cuepi.

Cue̱cuequëna,

sesenta y cinco metros paji'i.

Pa̱i cue̱cueyeje̱ pa'iopi hui̱ñaëje cue̱cueye sëte ja̱je paji'i.

18 Jaspe hue'yosi quë̱na pë̱api nesico paco'ë,

tëhuopa.

Cui'ne i̱ti daripëpi orore pase'e nesico paco'ë,

sa ña etoja̱icorepa.

19 Tëhuo pa quëco pa quë̱na pë̱a cato coa si'a de'o quë̱na pë̱api ëja de'huase'e paji'i.

Iyepi du'ru huëo hue̱'ña cato,

jaspe hue'yosi quë̱na,

cayaye aco zafiro hue'yosi quë̱na,

toaso̱ñe aco ágata hue'yosi quë̱na,

cajese'e aco esmeralda hue'yosi quë̱na,

20 Cinco aco onice hue'yosi quë̱na,

seis aco cornalina hue'yosi quë̱na,

siete aco crisólitopi hue'yosi quë̱na,

ocho aco berilo hue'yosi quë̱na,

nueve aco topacio hue'yosi quë̱na,

diez aco crisoprasa hue'yosi quë̱na,

once aco jacinto hue'yosi quë̱na,

doce aco amatista hue'yosi quë̱na paji'i.

21 Doce eta sa'noa cato doce perlaspi nese'e paji'i.

Pa'ina,

te'e perlapi te'e eta sa'ro tëhuocore nesico paji'i.

Ëja ma'arepa cato orore pase'e nesicopi sa ña etoja̱icorepa paco'ë.

22 Ja̱ daripë ti peopi,

Maija'quëre se̱ huë'e.

Me neni pa'ico'ni,

ja̱re i̱ Maija'quë si'aye pa'ire papi,

cui'ne Yëi ñamapi co̱ni huë'eje̱ pa'iohua'i pa'ito.

23 Ja̱ daripë cato ë̱së,

cui'ne ñañë miacaiye peoji.

¿Me neni ja̱ohua'i miacaiye'ni?

Tsoe Maija'quëpi de'oyerepa miato,

cui'ne i̱ Yëi ñamapi co̱ni toa tsë̱opëje̱ pa'ipi miato.

24 Huasosi yejaña pa'icohua'i cato ja̱ daripë miacaiyeja̱'a cu'ija̱'cohua'i a'ë.

Cui'ne pa̱i ëjaohua'ipi i̱ohua'i de'oyere i̱ona i̱sija̱'cohua'i a'ë.

25 I̱o eta sa'noa si̱oñe ti peosipi mu'se,

cui'ne ja̱ro cato ñamije peosipi.

26 I̱ona sajë i̱sija̱'cohua'i a'ë,

iye yeja pa'icohua'i Maija'quë de'o necaise'ere i̱ñoñere,

cui'ne pa̱i yejaña ëjaërepa cajë de'oyerepa sehuojë pa'iyere.

27 Ja̱ro cato cacaye peoji,

si'si nese'e,

ai co'ayerepa yo'ocohua'i,

pa̱nita'a cosocohua'ije̱.

Ja̱ro cato cacaja̱'cohua'i a'ë,

i̱ohua'i mami Yëi ñama tse̱co pa'i toya pëpëna toyasicohua'ise'e.