Mil O̲metëca Aye
20
Ja̱ jeteyo'je ñahuë,
ma'tëmopi hui̱ñaë to̱me huesë hue̱'ña si̱oconi cui'ne quë̱na mere tse̱'equë cajequëna.
2 Ja̱ëpi cajeni jai pë'ëje̱ pa'ire tsoe hue̱'ña a̱ñare,
huati ja̱re i̱pi Satanás hue'equëre quë̱na mepi sëapi,
mil o̱metëca ñu'ija'quëni.
3 Ja̱ maca i̱te sëani mil o̱metëcaja̱'a pa̱ire cosoma'ë pa'ija̱'quëre to̱me huesë hue̱'ñana je̱o to̱ni si̱oñopi.
Si̱oni eta sa'rona hui'yoye peoji,
caquë toya sëo huesopi.
Ja̱je pa'iquëta'are mil o̱metëca ti̱'asi maca joye cua̱ñosiquë pa'ija̱'quë api,
a'ri tëcahuë maca pa'ija̱'quëpi.
4 Ja̱ jeteyo'je ñahuë,
pa̱ipi cua̱ñejë ñu'i saire ja'rusicohua'ipi ñu'ijëna,
pa̱i ñape yo'ose'e ñajë ca de'huaja̱'a tutu i̱si cua̱ñosicohua'ire.
Ja̱ maca ñahuë,
Maija'quë coca case'eje̱ pa'ye,
cui'ne Jesús case'eje̱ pa'ye nuñerepa tui do'ire,
si̱opë̱a të'ca tëte cua̱ñosicohua'i joñoare.
Ja̱ohua'i cato huajëya'ye pa'ire,
cui'ne i̱je pa'ire de'huasiquëre de'oquëre pa'ni cuasajë yo'oye pa̱sicohua'i a'ë.
Cui'ne i̱ mamije toya cua̱ñoñe pa̱sicohua'i a'ë,
i̱ohua'i tsiana,
pa̱nita'a i̱ohua'i jë̱tëna.
Ja̱ohua'ipi huajëcohua'i pani co̱jë Cristo ja̱'re mil o̱metëca cua̱ñehuë.
5 Ja̱je pa'iquëta'are yecohua'ita'a huëiye pa̱huë,
mil o̱metëca tëto saisi maca huëija̱'cohua'ipi.
Iye cato du'ru macarepa ju̱'isicohua'i huëiye a'ë.
6 Sihuacohua'i pa'iyë,
Maija'quë tse̱cohua'ipi,
du'ru macarepa ju̱'isihua'i huëiye huëicohua'i.
Ja̱ohua'ire cayaye ju̱'iñe aco ne hue̱añe peoji.
Coa ai jerepa ja̱ohua'i cato Maija'quëre cui'ne Cristore necaijë pa'ija̱'cohua'i a'ë.
Cui'ne i̱ ja̱'re co̱ni mil o̱metëca cua̱ñeja'cohua'i a'ë.
Huati Nejo Cua̱ñose'e
7 Mil o̱metëca tëto saisi maca Satanáspi etosiquë pa'ija̱'quë api.
8 Pa'i ja̱ maca si'aohua'ire yeja pa'icohua'ire cosoquë cui'ne Gogre cui'ne Magogre cosoja̱'quë api.
Cosoquë ja̱ohua'i soldado pa̱ire jai pa̱ire meja a̱si tsiaya të̱'tëpa ñañeje pa'yerepa tsi'soja̱'quë api,
uihuaja̱'cohua'ire.
9 Ja̱ maca ja̱ohua'ipi si'a yejañapi dani si'aore sa tëhuo të'ija̱ë'ë,
Maija'quë tse̱cohua'i i̱ oicohua'i pa'i daripëre huañu'u cajë.
Ja̱je yo'ojëta'are ma'tëmopi toa to̱me ëo huesopi,
peo hue̱'ñarepa.
10 Ja̱ maca huati pa̱ire cososiquëre toa jairana azufre quë'iona je̱o dëo cua̱ñopi,
huajëya'ye pa'ire,
cui'ne coa cosoquë pa̱ire quëasiquëre je̱o dëo sitona.
Ja̱rona ai yo'ojë pa'ija̱'cohua'i a'ë,
mu'señapi,
cui'ne ñamiñapi caraja̱iñe peoyerepa.
Poja'i Ñu'i Saihuëre Pare Ñu'i Pa̱i Ñape Yo'ose'e Ca De'huaye
11 Ja̱ maca ñahuë,
poja'i ñu'i saihuëre,
cui'ne i̱ote ñu'iquëre.
Ja̱ë ña hue̱'ñare papi yeja cui'ne ma'tëmo catihuë.
Catijëta'are ti peopi,
ti̱rona se jëani pa'iyeje̱.
12-13 Ja̱ maca ñahuë,
ju̱'isicohua'ire,
jaicohua'ire,
cui'ne a'ricohua'ire,
ñu'i saihuë ti̱ñare pare nëcajëna.
Si'aohua'i tsiayana,
cui'ne yejana ju̱'ijë pa'isicohua'i,
etasicohua'i paë'ë.
Ja̱ maca toya pëpë̱api hui'yose'e paji'i.
Pa'ina,
cui'ne pa'i toya pëpëre paje̱ hui'yosico paji'i.
Ja̱ maca ju̱'isicohua'ipi ja̱re i̱ohua'i yo'ose'eje̱ pa'ye ca tëji cua̱ñohuë,
ja̱ toya pëpë̱ana toyase'eje̱ pa'ye.
14 Ja̱ jeteyo'je ju̱ni huesëye cui'ne ju̱'isicohua'i pa'i hue̱'ñaje ña co̱ñe peopi,
toa jairana je̱o dëosi do'ire.
Iye toa jaira cato cayaye acore se ju̱ni huesë co̱ñe a'ë.
15 Cui'ne ja̱rona je̱o dëo cua̱ñohuë,
si'aohua'i pa'i toya pëpëna i̱ohua'i mami toya cua̱ñoma'cohua'i.