19
Ja̱ jeteyo'je asahuë,
ma'tëmopi jai pa̱i tutu ñeje cajëna:
¡Aleluya!
De'oquëre pa'ni Maija'quë cajë i̱te sihuañu'u,
Maija'quë tse̱ a'ë,
huasoye,
i̱ de'oyerepa,
jerepa pa'irepa pa'iye.
2 Maija'quë cato pa̱i yo'ose'eje̱ pa'ye ñaquë yo'oni nuñerepa yo'oji,
tayoma'ë.
Ja̱je pa'ina,
co'a nomiore nejopi.
Iye yeja pa̱ire i̱o co'aye yo'oyepi co'a de'huasicore,
I̱ jo'ya mañare huaisi do'ire i̱ote nejopi.
3 Hui̱ñaohua'ipi ti̱jupë ca co̱huë:
“¡De'oquëre pa'ni Ëjaë cajë i̱te sihuañu'u!
I̱o ucona,
pico mëiñe ti je̱oñe peoyerepa pa'iona.”
4 Ja̱ maca veinticuatro aiohua'ipi cui'ne cuatro pa'iohua'ipi yejare pana në mejë Maija'quëre de'oquëre pa'ni cuasajë sihuajë yo'ohuë,
ñu'i saihuë ñu'iquëre ñeje cajë:
“Ja̱je pa'ija̱quë.
De'oquëre pa'ni,
Ëjaë cajë i̱te sihuañu'u.”
5 Ja̱ maca cua̱ñequë ñu'i saihuë quë'ropi yë'ose'e ñeje pi̱sipi:
De'oquëre pa'ni cajë Maija'quëre
Si'aohua'i tsi̱ cui'ne aiohua'ije̱,
Si'aohua'i i̱te necaijë,
I̱te Ëjaëre pare ñajë ca'rajë pa'isicohua'ipi sihuajë̱'ë.
Yëi Ñama Huejaquëna, Pa̱i Sihuajë Tsi'si Mu'se
6 Asahuë,
cui'ne jai pa̱i cajëna,
pi̱siyeje̱ pa'ye pi̱siquëna,
jupo tsa̱'io pi̱siyeje̱ pi̱siquëna,
cui'ne mujuë të'cayeje̱ pa'ye pi̱siyeje̱ pi̱siquëna.
Ja̱pi pi̱sipi,
ñeje:
¡De'oquëre pa'ni Ëjaë cajë i̱te sihuañu'u!
Maija'quë si'aye pa'ire papi,
Ëjaëre papi cua̱ñe huëopi.
7 Sihuañu'u,
sihuayena daija̱ni i̱te de'oquëre pa'ë më'ë cañu'u.
Tsoe ti̱'api,
Yëi ñama hueja mu'serepa.
Ja̱je pa'ina,
i̱ nëjo tsoe ëja de'osicorepa pa'ico.
8 Ja̱ona i̱sihuë,
de'o ca̱ñarepa si'si peoyere,
cui'ne miañere su̱ña ja̱'ñe.
Ja̱ de'o ca̱ñarepa cato quëaji,
sehuosicohua'i Maija'quë tse̱cohua'i nuñerepa yo'ojë pa'iyere.
9 Ja̱ maca hui̱ñaëpi yë'ëre capi:
“Toyajë̱'ë,
sihuacohua'i pa'iyë,
Yëi ñama hueja maca pa'ija̱'cohua'ire soisicohua'ipi.”
Yequeje̱ cui'ne capi:
“Iye coca cato Maija'quë nuñerepa cocare pa'ë.”
10 Ja̱je caquëna,
asani yë'ëpi hui̱ñaë quë̱o yë'quë macana do're ja'ruhuë,
i̱te,
de'oquëre pa'ni cuasaquë sihuasi'i caquë.
Ja̱je yo'oquëna,
i̱pi yë'ëre capi:
“Ja̱je yo'oma'ë pa'ijë̱'ë.
Yë'ëje̱ Maija'quë jo'yaë'ë.
Më'ëje pa'i a'ë.
Më'ë cui'ne Maija'quë do'ijë co̱ni payë,
Jesús ayere quëacaiquëre.”
Ja̱je pa'ina,
Maija'quëni më'ë cato ja̱je do're ja'ru sihuaquë yo'ojë̱'ë,
mësaru paquë Jesús ayere quëacaiquë cato cui'na ëapi,
yë'ëre pa'i ja̱'ñere quëa joyo.
Caballo Poja'iquëre Tuiquë Ayere Quëaye
11 Ja̱ maca ñahuë,
ma'tëmopi hui'yosico pa'iona.
Ja̱ropi ñaipi,
caballo poja'iquëpi.
I̱te tuiquë cato i̱ti case'eje̱ yo'oquërepa,
cui'ne nuñerepa care paquë hue'equë paji'i,
i̱ mami.
Ja̱je pa'ipi nuñerepa cua̱ñequëpi cui'ne nuñerepa huajoje̱ yo'opi.
12 I̱ ñaco ca̱ cato toa tsë̱ni nëcase'eje̱ pa'yerepa paji'i.
I̱ si̱opëre jaiye manoa pu̱'iquë paji'i.
Ja̱je pa'ipi i̱se'e te'i asa mamire toyase'ere papi,
yecohua'ije̱ ti asa ma'ñere.
13 Cui'ne tsiepi tsoasi ju'i ca̱re ju'i saji'i.
I̱ mami cato:
Maija'quë coca hue'equëpi.
14 I̱ni ma'tëmo soldado pa̱ipi tuë'ë,
de'o ca̱ña su̱ñasicohua'ipi,
poja'i ca̱ñare,
cui'ne si'si peoyere ju'icohua'ipi po caballohua'ini tuijë.
15 I̱ yë'opoja̱'a hua'ti jë̱jësë̱copi etapi,
iye yeja pa'icohua'ire nejoja'copi.
Ja̱ëpi quë̱na tarapëpi ca̱jiquë cua̱ñeja'quë api.
Ja̱ëpi pa̱i ñape yo'ose'ere sa̱isipi,
cuiya'i da'ca nesi'i caquë tsa'cu jo'aquë yo'oyeje̱ pa'ye.
Cui'ne ja̱ëpi o̱cuaja̱'quë api,
Maija'quë tutu quë'irepa pë̱i si'seyere.
16 I̱ ju'i ca̱re,
cui'ne i̱ quë̱sore ñeje toyase'ere hue'epi:
“Pa̱i ëjaohua'i mëñe Ëjaërepa,
i̱ti meñe cua̱ñequërepa.”
17 Ja̱ jeteyo'je ñahuë,
hui̱ñaëpi ë̱sëna tsa'cu paquë nëcaquëna.
Ja̱ëpi ai tutu cuipi,
si'aohua'ire peo de'oto ja'jëjë cu'icohua'ire ñeje caquë:
“Daijë̱'ë,
tsi'sini,
Maija'quë na'iquëna,
a̱oñe a̱ija'cohua'i.
18 Dani a̱ijë'ë,
pa̱i ëjaohua'i ca̱,
soldado pa̱i ëjaohua'i ca̱,
tutu quë'iohua'i ca̱,
caballo ca̱,
i̱ohua'ire tuisicohua'i ca̱,
coa si'aohua'i ca̱,
jo'yaohua'i peocohua'i ca̱,
jo'ya ne cua̱ñosicohua'i ca̱,
a'ricohua'i ca̱,
cui'ne jaicohua'i ca̱,
a̱ija'cohua'ipi cuipi.”
19 Ja̱ maca ñahuë,
huajëya'ye pa'ire,
cui'ne iye yeja pa̱i ëjaohua'ire,
i̱ohua'i soldado pa̱i ja̱'re co̱ni pa'ijëna.
Ja̱ohua'i cato caballore tuiquëre,
cui'ne i̱ soldado pa̱ire uihuañu'u cajë tsi'sisicohua'ipi paë'ë.
20 Ja̱ë huajëya'ye pa'i cato tse̱a cua̱ñosiquë paji'i,
coa cosoquë quëaquë ja̱'re co̱ni,
i̱ ña hue̱'ñana jaiye pa̱i yo'o ti̱'a ma'ñere yo'o i̱ñosiquë ja̱'re.
Ja̱ yo'o i̱ñoñeja'a quëaquë pa̱ire cosopi,
huajëya'ye pa'i mami toya cua̱ñosicohua'ini,
cui'ne i̱je pa'ire de'huasiquëre sihuajë yo'osicohua'ini.
Ja̱ maca,
huajëya'ye pa'ire,
cui'ne coa cosoquë quëaquë pa'isiquëre tse̱ani ja̱ huajëcohua'ini toa jairana azufre tsë̱ni nëcasicona,
je̱o dëo cua̱ñohuë.
21 Yecohua'i cato huani je̱o cua̱ñohuë,
caballo tuiquë yë'opo eta hua'tiyona.
Ja̱ maca si'a ja'jëcohua'i tsi'sini ja̱ohua'i ca̱re o̱cue ti̱më huesëhuë.