“Tsoe nejosicoa,

jai Babilonia.

Tsoe nejosicoa,

huatiohua'i huë̱'ña de'o huesëo,

si'si joñoa pa'i hue̱'ña de'o,

si'a si'siohua'i cui'ne si'aye coe ëaye pa'ye tsiaro de'o.

3 Si'a yejaña pa'icohua'i i̱o co'aye yëyena u̱cu cuepe huesëhuë.

Iye yeja pa̱i ëjaohua'ipi i̱oni yo'ojë paë'ë.

Cui'ne iye yeja co'amaña i̱sicohua'ipi jaiye co'amaña pacohua'i po̱nëhuë,

i̱o yë do'ire pa̱ipi coa huerose'epi coa curiquë nejoñere i̱majë.”

4 Ja̱ maca asahuë,

ma'tëmopi yë'ose'e ñeje pi̱siquëna:

“Etajë̱'ë,

ja̱ daripëpi yë'ë tse̱cohua'i,

cui'na maca i̱o co'aye yo'oye yo'oma'pë pa'ija̱'cohua'i,

cui'ne i̱o ai yo'o ja̱'ñepi mësarute ti̱'añe pa̱ja'core.

5 I̱o tayo yo'oyepi ma'tëmore pana ti̱mëse'erepa pa'iji.

Ja̱ co'aye yo'oyere Maija'quë hua̱nëyema'ë ñaquë pa'iji.

6 I̱o yecohua'ire i̱sise'e ja'ye i̱oteje̱ i̱sijë̱'ë.

Pa̱ire i̱o yo'ose'eje̱ pa'ye co'ye i̱ona i̱sijë̱'ë.

I̱siquë te'ore se co̱jë'ë.

I̱o yecohua'ire o̱cuasi'i caco co̱'mese'eje̱ pa'ye cui'ne yecore se co̱'me co̱jë'ë,

i̱o u̱cuja̱'core,

ai dacorepa pa'ija̱'core.

7 Ëjaore pa'ë caco sihuaco yo'ose'eje̱ pa'ye a'si ju̱'iñere,

cui'ne ai yo'oyere i̱sijë̱'ë.

Ja̱o cato i̱o joyopi cuasaco ñu'ico pa̱i ëjaorepa ñu'iñeje̱ ñu'iñë,

iye macare,

hua'jeo peoyë,

ai yo'oye pa̱ja'coa'ë caco.

8 Ja̱je caco ñu'icore te'e mu'sepi i̱o ai yo'oye ti̱'aja'coa,

ju̱'iñe,

ai yo'oco oiye,

cui'ne a̱o ëa ju̱'iñe,

cui'ne toana ëo je̱o cua̱ñoja'coa.

Ja̱je nejo cua̱ñoja'coa,

Ëjaërepa Maija'quë tutu quë'ire papi nejoquëna.”

9 Iye yeja pa̱i ëjaohua'ipi i̱ote yo'ojë i̱ote yëjë pa'isicohua'ipi ai cuasajë oija̱'cohua'i a'ë,

i̱opi uco pico mëiona,

ñajë.

10 I̱ote si'seyere ñajë ca'rajë so'ona pëa nëcani ja̱ropi caja̱'cohua'i a'ë:

“I̱na,

teayere pa'ë,

jai daripë Babilonia si'a dari maña tëto saisicorepa më'ëre si'seye esarepa ti̱tapi.”

11 Si'a yeja cu'ijë co'amaña i̱sicohua'ipi i̱ote ai cuasajë co'a ju̱'ijë oija̱'cohua'i a'ë,

i̱ohua'i jaiye co'amaña dajëna,

huerocopi peocona.

12 Iye paji'i,

i̱ohua'i pase'e:

oro,

poja'i curi,

ai de'o quë̱na ca̱,

perlas hue'yosi pë̱a,

ai de'o nea maja'i ca̱ña,

cui'ne maja'i ca̱ña,

huëo së̱ so̱quë nese'e,

jai cu̱jipi de'huase'e,

de'o so̱quëpi nese'e,

së̱'ño ma ja̱'ñe broncepi nese'e,

jëa quë̱napi nese'e,

jëa quë̱na marmol hue'yosi quë̱na nese'e,

13 Canela,

huëo së̱ ma'ña:

incienso,

mirra,

cui'ne jaiye ma'ña,

cuiya'i o'sa co̱no,

hui'yape,

de'o toase'e pan ne ja̱'ñe,

trigo,

hue̱quëohua'ire,

yëi ñamare,

caballore,

caballo quërëye,

jo'yaohua'ire pa̱ire huerocohua'ije̱ peohuë.

14 Ja̱ maca jai daripëre caja̱'cohua'i a'ë,

ñeje:

“Më'ë yë'o pa'ise'ere,

sa̱ija'i o̱cue ca̱ yure më'ë peoyë.

Ti më'ë nejo huesohuë,

më'ë de'ocorepa ña cua̱ñose'e,

cui'ne më'ë jai co'amaña pase'e.”

15 Ja̱ jai daripëna co'amañare i̱sijë jaiye curiquë nesicohua'ipi,

i̱o si'se cua̱ñoñere ca'rajë so'opi ñajë ai cuasajë co'a ju̱'ijë oija̱'cohua'i a'ë.

16 Oijë caja̱'cohua'i a'ë:

“Teayerepa,

teayerepa jai daripë,

jai do'i ca̱ña nomio su̱ñase'eje̱ pa'iorepa ña cua̱ñohuë,

më'ë.

Më'ë ju'ico cato nea ma ja̱'ñe cui'ne maja'i ca̱ñarepa,

paji'i.

Ja̱je pa'iore ju'icopi oropi,

perlaspi,

cui'ne de'o quë̱napi ëja de'osico paë'ë,

më'ë.

17 Ja̱je pa'isicota'a coa nëhui tëcahuë maca jai co'amaña peo hue̱'ña ne huesëpi.”

Si'aohua'i jai yohuë̱a ëjaohua'i cui'ne i̱ti quëhuicohua'i tsiaya cu'i do'ipi curiquë necohua'i so'ona pëa nëcani,

18 jai daripë uco pico mëiñere ñajë cuihuë:

“Yequë jai daripë cui'ne pa'io peoco.”

19 Ja̱je cajë ai cuasajë co'a ju̱'ijë oijë i̱ohua'i si̱opë̱ana yeja pa'i ne'ñapi nehuë.

Ja̱je yo'ojë oijë cuihuë:

“Teayerepa,

teayerepa,

jai daripë,

më'ë co'amañare huerojëna,

jaiye curiquë pacohua'i de'ohuë,

jai yohuë̱a pacohua'i.

Ja̱je pa'isicota'a coa nëhui tëcahuë maca më'ë peo hue̱'ña ne huesëhuë.”

20 Ma'tëmo acohua'i cato ai sihuajë̱'ë,

jai daripë peo do'ire.

Sihuajë̱'ë,

Maija'quë tse̱cohua'i,

Maija'quë jëjo daocohua'i,

cui'ne Maija'quë caye quëacaicohua'i.

Maija'quë ja̱ote nejoni mësarute co'aye yo'osi do'ire nuñerepa sa̱iquë yo'opi.

21 Ja̱ maca hui̱ñaë ai tutu quë'ipi quë̱naore toacoje̱ pa'ioni i̱ni mëñe mëani jai tsiayana je̱o dëoquë capi:

“Ñeje më'ë jai daripë Babilonia je̱oco cua̱ñoja'coa'ë.

Ja̱ maca më'ëre ti̱jupë ña co̱ñe pa̱ja'cohua'i a'ë.

22 Ti̱jupë ta̱'tëpe̱,

pi̱'cohuë̱a,

cui'ne duruhuë̱a më'ë ma'añapi pi̱siquëna,

asa co̱ñe pa̱ja'cohua'i a'ë.

Co'amaña necohua'ije̱ peoja̱'cohua'i a'ë,

më'ëre.

Jai to'ohuë toaye pi̱siyeje̱ asa co̱ñe pa̱ja'cohua'i a'ë.

23 Toa tsë̱'ipë miañeje peoja̱'coa,

më'ëre.

Cui'ne huejajëna,

pa̱i tsi'si hue̱'ñapi pi̱siyeje̱ peoja̱'coa,

më'ë co'amaña iye yeja jerepa pa'iohua'i pa'isicohua'ita'are,

cui'ne më'ëje iye yeja pa̱ire më'ë dahuë yo'oyepi coa cosoco nesicota'are.”

24 Ja̱ jai daripëre paji'i,

Maija'quë caye asajë quëacaicohua'i tsie,

Maija'quë tse̱cohua'i tsie,

cui'ne si'aohua'i iye yeja pa'icohua'ire huani je̱osicohua'i tsie.