22
Ja̱ maca hui̱ñaëpi i̱ñopi,
co'sija'i tsiayapi pa'iye i̱si ocose'ere.
Ja̱je pa'iopi Maija'quë cui'ne Yëi ñama ñu'i hue̱'ñapi etapi.
2 Cui'ne ja̱ eta ñapi jai daripë ëja ma'a jopore pare paji'i.
Cui'ne tsiaya të̱'tëpañare pa'i so̱quë ñëapi nëcahuë.
Te'e o̱metëcahuë quë̱icohua'ipi ñañë ñape quë̱ico paji'i.
I̱o ja'o cato yejaña pa'icohua'ire jujuye paji'i.
3 Ja̱ro cato peosipi,
co'aye pa'ise'e.
Maija'quë cua̱ñe ñu'ico cui'ne Yëi ñama cua̱ñe ñu'ico ja̱ daripëre paji'i.
Pa'ina,
i̱ jo'yapi i̱te ñajë sihuaja̱'cohua'i a'ë,
Ëjaëre pare sëte.
4 I̱ tsiare pare ñaja'cohua'i a'ë.
Ñajë cui'ne i̱ mamire i̱ohua'i tsia ti̱ñare pana toyase'e hue'eja̱'cohua'i a'ë.
5 Ja̱ro cato peosipi,
ñami.
I̱ote pa'icohua'i cato toa tsë̱o pë miañere co'ema'pë pa'ija̱'cohua'i a'ë.
¿Me neni co'eye'ni?
Ja̱re i̱pi Maija'quë Ëjaëre papi miacai pa'ija̱'quëre.
Cui'ne i̱ohua'ipi Maija'quë ja̱'re co̱ni je'nëna caraja̱iñe peoyerepa pa'ija̱'cohua'i a'ë.
Jesucristo Daiye Ja'yere Pa'iji
6 Ja̱ maca hui̱ñaëpi capi,
yë'ëre:
“Iye coca cato nuñere pa'ë.
Cui'ne i̱tina quëco pajë pa'iyere pa'ë.
Ja̱re i̱pi Ëjaë Maija'quë i̱ joyore jëjo saopi,
i̱te quëacaicohua'ire yequë mu'se pa'i ja̱'ñe quëaja̱'quëpi caquë.
Yureta'a i̱ hui̱ñaëre jëjo daopi,
i̱ jo'yare quëaja̱'quëre yure maca esa yo'o huëo ja̱'ñere.
7 ¡Yë'ëpi esa daija̱'quë a'ë!”
Sihuaquë pa'ija̱'quë api,
iye toya pëpë yequë mu'se yo'o ja̱'ñere quëayere asaquë yo'oquë pa'iquë cato.
8 Yë'ë Juanpi i̱tire ñaquë,
cui'ne iyere asahuë.
Ja̱ ñaquë asa tëjisi maca yë'ëre i̱ñosiquë hui̱ñaë quë̱o yë'quë macana do're ja'ruhuë,
i̱te ëjaëre papi caquë sihuaquë yo'ose'e caquë.
9 Ja̱je yo'oquëna,
i̱pi capi,
yë'ëre:
“Maija'quëre necaiquë a'ë.
Më'ëje pa'i a'ë.
Cui'ne më'ë ja̱'re acohua'i i̱ coca quëacaicohua'ije̱ pa'i a'ë.
Coa si'aohua'i iye toya pëpëna toyase'ere de'oye sehuocohua'ije̱ pa'i a'ë.
Maija'quë necaicohua'ipi pani Maija'quëni ja̱je sihuaquë yo'ojë̱'ë.”
10 Cui'ne yequeje̱ capi:
“Iye toya pëpëre tsi̱oma'ë pa'ijë̱'ë,
si'aohua'ipi ñajajë caquë.
Yequë mu'se tëto sai ja̱'ñere iye toya pëpëna toyase'ere,
i̱ti case'e huëo maca ti̱'a tëjiji.
11 Na'i huesësicoa.
Ja̱je pa'ina,
coa ñajë'ë,
co'aye yo'oquë ja̱re co'ayere yo'oquë pa'ija̱quë,
si'si nesiquë ja̱re si'si pa'ija̱quë.
Ja̱je pa'isiquëta'are de'oquë cato ja̱re de'oquë pa'ija̱quë.
Maija'quëna i̱ pa'iye i̱si huesosiquë cato,
ja̱re i̱ ja̱'re pa'i huesëja̱'quë.
12 Yë'ëpi esa daija̱'quë a'ë.
Dai dayë,
cui'ne i̱sija̱'a co'amañaje.
Pa̱i ñapere i̱sija̱'quë a'ë,
i̱ yo'ose'eje̱ pa'ye.
13 Yë'ë a'ë,
si'anë pa'iquëpi pa'iyë.
Yë'ë a'ë,
du'ru aquërepa,
cui'ne tëjiquërepa,
i̱ti huëosiquë cui'ne saoquërepa.”
14 Sihuacohua'i pa'iyë,
i̱ohua'i ca̱ña de'oye jo̱jacohua'ipi.
Ja̱ohua'ipi pa'i so̱quë yë ayere de'oye o̱cueye pa'iji.
Cui'ne jai daripë eta sa'noaja'a de'hue cacaye pa'iji.
15 Ja̱je pa'iquëta'are,
hue'sena pëaja̱'cohua'i a'ë,
ti̱ro yo'ocohua'i cato,
pa̱ire dahuë necohua'i,
yequë nomiore yo'ocohua'i,
pa̱ire huani je̱ocohua'i,
pa̱i de'huase'ere ëjare pa'ë cajë yo'ocohua'i,
cui'ne cosoyere oijë cosocohua'i.
16 “Yë'ë Jesupi yë'ë hui̱ñaëre jëjo saohuë,
sehuosicohua'i tsëcare si'aye quëaja̱'quëre.
Yë'ë a'ë,
David tsëcapë aquë.
Yë'ë a'ë,
ñata to̱mesi macarepa miacai ma'ñocorepa.”
17 Maija'quë joyopi cui'ne Yëi ñama nëjopi co̱ni cayë:
“Daijë̱'ë.
Ja̱je daijë̱'ë cayere asani cui'neje cajë̱'ë.
Oco ëa ju̱'iquë pani dani u̱cujë̱'ë,
pa'iye i̱si ocore pare ti curi do'i peoyerepa.”
18 Yë'ëpi si'aohua'ire du'ru quëa nëoñë,
iye toya pëpëna Maija'quë yequë mu'se yo'o ja̱'ñe toyase'ere asacohua'ire.
Ja̱je pa'ina,
pa̱ipi iye case'ere ai se̱ña maca se mëocaisiquë pa'ito,
Maija'quëpi i̱teje̱ ai yo'oyere se mëocaija̱'quë api,
iye toya pëpë toyase'e ayepi.
19 Iye toya pëpë ayere,
yequë mu'se pa'i ja̱'ñere quëaquë toyase'ere a'ri maña nejocatu i̱ti nejocaisiquëreje̱ Maija'quëpi pa'i so̱quë yë o̱cueye peoyë.
Cui'ne de'o daripëna cacaye peoyë.
Iye toya pëpë cato quëaji,
ja̱ pa'i oco ayere,
cui'ne ja̱ de'oyerepa daripë ayere.
20 Iye yo'o ja̱'ñe quëasiquëpi caji:
“Yë'ëpi esa daija̱'quë a'ë.”
Ja̱je pa'ija̱'quë.
¡Daijë̱'ë,
Ëjaë Jesús!
21 Mai Ëjaë Jesucristopi mësarute si'aohua'ire i̱ oiyepi ñacai paja̱'quë.
Ja̱je pa'ija̱'quë.