“Sani yejana do'ejë̱'ë,

Maija'quë pë̱i si'seyere siete duruhuë̱a pa'iyere.”

2 Ja̱je ca maca du'ru aquë hui̱ñaëpi i̱ ca̱ji duruhuëre yejana dopi.

Do maca huajëya'ye pa'i mamire toya cua̱ñosicohua'ipi,

cui'ne i̱je pa'ire de'huasiquëre se̱cohua'ipi ca̱'mi co'ayere pare ai a'siyere etahuë.

3 Cayaye aquëpi hui̱ñaë i̱ ca̱ji duruhuëpi jai tsiayana do maca jai tsiayapi pa̱ire huaisiquë tsieje̱ pa'yerepa po̱nëpi.

Ja̱ do'ire tsiaya pa'icohua'i si'aohua'i ju̱ju sahuë.

4 Toaso̱ñe aquëpi hui̱ñaë i̱ pa duruhuëpi tsiañana,

cui'ne oco eta co̱ñana dosi maca tsie de'opi,

oco.

5 Ja̱ jeteyo'je asahuë,

tsiaya hui̱ñaëpi ñeje caquëna:

“Më'ë nuñerepa pa'i a'ë,

pa̱i yo'ose'e i̱ohua'i yo'ose'eje̱ pa'ye sa̱iquëpi,

Diusu de'oquërepa yure pa'iquë,

cui'ne tsoeje̱ pa'isiquë.

6 Më'ë ñare paquë ja̱ohua'ire sa̱ihuë,

më'ë pa̱ire cui'ne më'ë coca quëacaicohua'i tsie nejosi do'ire.

Ja̱je pa'ina,

më'ëpi yure i̱ohua'ire tsiere o̱cuahuë,

me pa̱si'ni,

ja̱re ja̱je sa̱iñe pa'ito i̱ohua'i yo'osi do'ire.”

7 Asahuë,

cui'ne Maija'quëre i̱sijë tëo saihuëpi ñeje cacona:

“Ja̱je pa'ijë̱'ë,

Ëjaërepa si'aye pa'irepa më'ë cato pa̱i ñape yo'ose'ere ñaquë yo'oni nuñerepa yo'oyë,

tayoma'ë.”

8 Cuatro aquëpi hui̱ñaë i̱ ca̱ji duruhuëpi ë̱sëna dopi,

pa̱ire ëoja̱'a tuture i̱siquë.

Dosi maca ë̱sëpi si'a toarepa pa̱ire ëopi.

9 Ja̱ maca si'aohua'ire ai a'si ëo huesoquëta'are i̱ohua'i co'aye yo'oye je̱oni Maija'quëna po̱nëma'pë paë'ë.

Cui'ne i̱te de'oquëre pa'ni cayeje̱ pa̱huë.

Coa ai jerepa i̱ni co'aye cahuë,

si'aye iye ai yo'oye meñe cua̱ñequëni.

10 Cinco aquëpi hui̱ñaë i̱ ca̱ji duruhuëpi huajëya'ye pa'i ñu'i hue̱'ñana do maca,

i̱ cua̱ñe hue̱'ñapi nea hue̱'ñarepa de'o.

Ja̱ maca pa̱i cato a'si ju̱'ijë i̱ohua'i tse̱meñoana cu̱cuhuë.

11 Ja̱je ai yo'onije i̱ohua'i co'aye pa'iyere je̱oñe pa̱huë.

Pa̱jë coa ai jerepa Maija'quë ma'tëmo aquëni co'aye cahuë,

i̱ohua'i a'si ju̱'i do'ire,

cui'ne ja'ju yëma'a a'sire hue'e do'ire.

12 Seis aquë hui̱ñaëpi i̱ ca̱ji duruhuëpi Eufrate jai tsiayana do maca,

tsiayapi cue̱ne huesëo,

ma'are necaio,

ë̱së mëi hue̱'ña pa'i pa̱i ëjaohua'i daija̱'a ma'are.

13 Ja̱ maca ñahuë,

jai pë'ëje̱ pa'i yë'opoja̱'a,

huajëya'ye pa'i yë'opoja̱'a,

cui'ne Maija'quëre quëacaiquëje̱ pa'ita'a coa cosoquë yë'opoja̱'a toaso̱ joñoa co'acohua'ipi jojoje̱ pa'iohua'ipi etajëna.

14 Ja̱ joñoa cato co'a huatiohua'i paë'ë.

Pa̱i yo'o ti̱'a ma'ñere yo'ocohua'i paë'ë.

Ja̱ohua'i cato etahuë,

iye yeja pa̱i ëjaohua'ire si'aohua'ire tsi'soñu'u cajë.

Maija'quë si'aye pa'irepa ja̱'re uihuaja̱'a mu'sere pare cajë yo'ohuë.

15 Ñajë'ë,

yë'ë utema'tore papi daiyë,

co'amaña ñaë daiyeje̱ pa'ye.

Sihuaquë pasipi.

Sëtasiquëpi cui'ne i̱ ju'i ca̱je de'oye ñaquë paquë cato cui'ne huajëya'ye peoyo pa̱i ñajëna,

cu'iye pa̱ja'quëpi.

16 Ja̱ maca pa'i ëjaohua'ipi tsi'sisihuë,

hebreo coca cato Armagedón hue'yo sitona.

17 Siete aquë hui̱ñaëpi i̱ ca̱ji duruhuëpi peo de'otona do maca ñu'i saihuë quë'ropi Maija'quë huë'e ma'tëmopi ai tutu yë'ose'e pi̱sipi,

ñeje:

“Tsoe ne saohuë.”

18 Ja̱ maca jaiye mujuë ye'hueyeje̱ pa'ye pi̱siye cui'ne mujuë të'cayeje̱ pa'ye paji'i.

Pa'ina,

yejaje̱ tsasipi noni ñu'cueye jerepa yeja ñu'cuesi do'ire.

Tsoeje̱ pa̱i ja̱ jerepa ñu'cueye ti ñama'cohua'i a'ë.

19 Ja̱je tutu ñu'cueco jai daripë toaso̱ te̱'ña hua'que saco'ë,

cui'ne si'a yejaña jai dari pa'iyeje̱ peo hue̱'ñarepa hua'que to̱me sapi.

Ja̱ maca Maija'quëpi jai daripë Babiloniare i̱ pë̱i si'se co̱no da'care i̱ jëjo daose'ere peo hue̱'ñarepa o̱cuasi'i cuasapi.

20 Yeja ñu'cue maca si'a saodohuë̱a,

cui'ne ai cu̱ti ne huesë sapi.

21 Cui'ne ma'tëmopi jai sësë carapë̱a aipi pa̱ina to̱mepi,

cuarenta kilos dëquëyepi.

Ja̱ maca pa̱ipi Maija'quëre co'aye cahuë,

sësë carapë̱a do'ire,

cui'ne i̱ohua'ire jaiye ai yo'oye pa'i do'ire.