Hui̱ñaohua'ipi Siete Pa'ye Tëjiyerepa Ai Yo'o Ja̱'ñere Paye
15
Ma'tëmore ñaquë ñahuë,
yeque jaiye huajëya'ye pa'ye i̱ñoñere:
Siete hui̱ñaohua'ipi siete tëjiyerepa ai yo'o ja̱'ñere pajëna,
ñahuë.
Ja̱ yo'oyepi Maija'quë pë̱i yo'o tëji ja̱'ñe paji'i.
2 Ñahuë,
cui'ne jai jairaje̱ pa'iopi toapi pa'iyeje̱ pa'iota'a ña etoja̱i yejare,
ja̱o jai jairaje̱ pa'io,
tsi̱ña de'huaje̱ pa'io,
co'sija'ico yë'quë macare nëcahuë,
Maija'quë ta̱'tëpe̱ i̱sise'ere ca̱jicohua'ipi.
Ja̱ohua'i cato huajëya'ye pa'ire,
cui'ne i̱je pa'ire de'huasiquëre quëcosicohua'i paë'ë,
i̱ ayere toyama'cohua'ipi.
3 Ja̱ohua'ipi Moisés Maija'quë jo'yaë jë̱jëse'ere,
cui'ne Yëi ñama ayere jë̱jëñere jë̱jëhuë.
I̱ohua'i jë̱jëse'e cato caji:
Si'aye më'ë de'huase'e de'oyere pa'ë.
Më'ë ma'a cato nuñere pa'ë.
Cui'ne care paye a'ë.
Më'ë a'ë,
si'a pa̱i Ëjaërepa je'nëna.
4 ¿Nepi më'ëre Ëjaëre pare ñajëta'a ca'rama'pë pa'ija̱'cohua'i a'ni?
¿Nepi më'ëre de'oquëre pa'ni cajë sihuaye pa̱ja'cohua'i a'ni?
Më'ëse'e te'i pa'iyë,
de'oquërepa.
Ja̱je pa'ina,
më'ë nuñerepa yo'oyere pa̱ire i̱ñosi do'ire
Si'a hue̱'ñapi pa̱i dani më'ëre de'oquëre pa'ni cuasajë ñajë sihuaja̱'cohua'i a'ë.
5 Ja̱ jeteyo'je ñahuë,
ma'tëmopi Maija'quë huë'epi maire ca nëose'e de'huasi hue̱'ñapi hui'yoquëna.
6 Ja̱ro Maija'quë huë'epi siete hui̱ñaohua'i etahuë,
siete ai yo'oye neñere pacohua'ipi.
Ja̱ohua'i cato poja'i ca̱ñare ai miañere su̱ñasicohua'ipi,
cui'ne curi nesi të̱i ca̱ñapi coti saihuë̱are paja̱'a të̱asicohua'i paë'ë.
7 Ja̱ jeteyo'je ñahuë,
cuatro pa'iohua'i aquëpi siete hui̱ñaohua'ina pa̱i ñapere curipi nesi duruhuë̱are Maija'quë pë̱i co'ayerepa si'se ja̱'ñere ti̱mëse'ere i̱siquëna,
Maija'quë ti pani huesëquë tse̱re.
8 Maija'quë huë'e cato Maija'quë tuture papi pico,
cui'ne i̱ de'oye miañere papi pico ti̱më huesosico paco'ë.
Pa'iona,
i̱ti huë'e te'ije̱ cacaye ti peopi,
siete hui̱ñaohua'i payepi siete ai yo'oye neñepi tëto saiye pa̱to.