144.000 Pa̱i Jë̱jëñe
14
Ñahuë,
Yëi ñamare Sión cu̱tihuëre nëina.
Ja̱rote i̱ ja̱'re co̱ni paë'ë,
ciento cuarenta y cuatro mil pa̱i.
I̱ohua'i tsia ti̱ñarepa Yëi ñama mamipi cui'ne i̱ pëca ja'quë mamipi toyasicohua'ipi.
2 Ja̱ jeteyo'je asahuë,
ma'tëmopi jai jupo pi̱siyeje̱,
mujuë ai tutu të'cana pi̱siyeje̱,
cui'ne jai pa̱i ta̱'tëpe̱ pë̱a ta̱'tëjëna,
pi̱siyeje̱ pa'ye pi̱siquëna.
3 Ja̱je pi̱siquëna,
ja̱ohua'ipi huajë jë̱jëñere jë̱jëhuë,
i̱ti cua̱ñequë ñu'i saihuë ti̱ñare pana,
cuatro pa'iohua'i ña hue̱'ñana,
cui'ne aiohua'i ña hue̱'ñana.
Ja̱ jë̱jëñere cato ja̱ ciento cuarenta y cuatro mil pa'icohua'ise'e ye'yesicohua'i a'ë.
4 Icohua'i cato nomiohua'ire yo'oye,
si'si de'oye pa̱sicohua'ipi,
de'ocohua'ire pa'ë.
Ja̱je pa'iohua'ipi Yëi ñamase'ere tuiyë,
coa si'a hue̱'ña i̱ sai hue̱'ñaje.
Ja̱ohua'i cato yeja pa'icohua'ini huasosicohua'ipi pa'iyë,
du'ru quë̱ise'eje̱ pa'yere Maija'quëna,
cui'ne Yëi ñamana i̱sisicohua'ipi.
5 Icohua'i cato ti coso coca cama'cohua'irepa paë'ë.
Ja̱je pa'ina,
ja̱ohua'ire tayocohua'i a'ë ca ti̱'añe ti peoji.
Toaso̱ Hui̱ñaohua'i Quëase'e
6 Ja̱ maca ñahuë,
yequë hui̱ñaëre ma'tëmoja'a huahuaquë saina,
iye yeja pa'icohua'ire si'aohua'ire yequë pa̱ire,
ti̱ coca cacohua'ire cui'ne si'a yejaña pa'icohua'ire ti pani huesë cocare quëasi'i caquë.
7 Ja̱je pa'ipi tutu capi,
ñeje:
“Maija'quëre ca'rajë̱'ë.
De'oquëre pa'ni cajë sihuajë̱'ë,
i̱se'ere.
Tsoe ti̱'api,
pa̱i ñape yo'ose'e ñaquë sa̱i de'huaja̱'a mu'se.”
8 Ja̱ maca cayaye aquëpi hui̱ñaë capi,
ñeje:
“Tsoe nejosicoa,
jai Babilonia.
Tsoe nejosicoa,
pa̱i mañare iye yeja pa'icohua'ire i̱o co'aye yëyepi o̱cua cuepasio.”
9 Ja̱ maca toaso̱ñe aquë hui̱ñaëpi ai tutu capi,
ñeje:
“Pa̱ipi huajëya'ye pa'ini,
cui'ne i̱je pa'ire de'huasiquëni,
de'oquëre pa'ni cuasajë ñajë sihuacohua'ire,
cui'ne jë̱tëna pa̱nita'a tsiana i̱ ayere toya cua̱ñosicohua'ire cato,
10 Maija'quë pë̱i si'se së̱je co̱nore u̱cuja̱'cohua'i a'ë,
co'ayere pare,
i̱ pë̱i ne de'huase'ere.
Ja̱je ai yo'oja̱'cohua'i a'ë,
toa cui'ne,
azufre co̱ni tsë̱'i sitona Maija'quë hui̱ñaohua'i,
cui'ne Yëi ñama ña hue̱'ñana.
11 I̱ohua'i tsë̱'i sitore pana ujë ai yo'ojëna,
pico mëiñe je'nëna mëio nëija'coa,
si'a mu'señapi,
cui'ne si'a ñamiñapi,
pëa huajëye ti peojë.
Ja̱re ja̱je pa'ija̱jë huajëya'ye pa'ire,
cui'ne i̱je pa'ire de'huasiquëre se̱jë,
cui'ne i̱ mami ayere toya cua̱ñosicohua'ire.
12 Iye cato Maija'quë pa̱i i̱ cua̱ñese'e sehuocohua'ire,
cui'ne Jesure nuñerepa tuicohua'ire yëhuoye a'ë,
quëcojë yo'o jujama'pë pa'iye a'ë.”
13 Ja̱ maca asahuë,
ma'tëmopi yë'ose'e yë'ëre caquëna:
“Toyajë̱'ë,
iyere:
‘Sihuaye pa'iji,
iye macapi se̱ña maca Ëjaë ja̱'re tsioni ju̱'isicohua'i cato.’
Ja̱je pa'iji caji,
Maija'quë joyopi.
Ja̱ohua'i cato i̱ohua'i yo'oyere ne tëjini pëa huajëja̱'cohua'i a'ë,
i̱ohua'i nese'e ja̱'re co̱ni.”
Yeja Co'amaña Tëaye
14 Ja̱ maca ñahuë,
te'ire Jesuje̱ pa'ipi,
Pa̱i Mamaquë hue'yosiquëje̱ pa'ire,
poja'i sirio ë̱mëje'na ja'rusiquëpi ñu'ina.
Ja̱ë cato orore pase'e nesi marore pu̱'iquë paji'i.
Ja̱je pa'ipi hua'ti ca'huarore ai jë̱jësë̱core pani ca̱jipi.
15 Ca̱jiquëna,
Maija'quë huë'epi yequë hui̱ñaëpi etapi.
Etani ai tutu cuiquë capi,
siriore ñu'iquëre:
“Më'ë hua'ti ca'huarore meñe jua co'i meni tëajë̱'ë.
Tsoe ti̱'api,
i̱ti tëa macarepa.
Ja̱je pa'ina,
yeja pa'iye quere huesëpi.”
16 Ja̱ maca siriore ñu'iquëpi i̱ tëacopi yejana meñe jua co'i meni yeja pa'iyere tëapi.
17 Ja̱ jeteyo'je ñaquëna,
yequë hui̱ñaëpi Maija'quë huë'e ma'tëmo pa'icopi etani hua'ti ca'huaro ai jë̱jësë̱coni ca̱jiquë saji'i.
18 Ja̱ maca yequë hui̱ñaëpi etapi,
Maija'quëre i̱sijë tëo toto quë'ropi.
Ja̱ë cato toare cua̱ñe tutu paquë paji'i.
Ja̱ëpi tutu cuipi,
hua'ti ca'huaro ca̱jiquëre ñeje caquë:
“Më'ë hua'ti ca'hua jë̱jësë̱copi meñe jua co'i meni cuiya'i jure tëajë̱'ë.
Tsoe ya'ji sapi,
yeja pa'iye.”
19 Ja̱je ca maca hui̱ñaëpi i̱ hua'ti ca'huaropi iye yejana se ya'cue co'ija̱ni cuiya'i jure tëapi,
iye yeja cuiya'i tsi̱ña ayere.
Tëani ja̱ maca ayapi,
jai cua'corona tsa'cu jo'a sao ja̱'ñere.
Ja̱ yo'oye cato i̱ñoji,
Maija'quë pa̱ire si'se ja̱'ñere co'ayere papi.
20 Jai daripë hue'sena cuiya'i tsa'cu jo'a huesose'e paji'i.
Ja̱ro jai cua'coropi tsiere pase'e etapi.
I̱o hua̱iñe cato caballo yë'opo sëa macare paja̱'a hua̱iñe paji'i,
cui'ne i̱o jaiyepi paji'i,
trecientos kilómetros pa'i jaira.