Cayahua'i Huajëya'ye Pa'iohua'i
13
Jai tsiaya mejahuëre nëcaquë ñahuë,
jai tsiayapi huajëya'ye pa'ipi etani tu̱maquëna,
siete si̱opë̱a,
cui'ne diez ca̱johuëa quë'ipi,
ca̱johuëa ñape maro pu̱'iñe paji'i,
cui'ne i̱ si̱opë̱are Maija'quëre cue'cuejë Maija'quë mamire sëose'ere hue'eye paji'i.
2 Iquë huajëya'ye pa'i yë'ë ñasiquë cato airo yaije̱ pa'i paji'i.
Ja̱je pa'ipi oso quë̱oje pa'ye hue'epi,
cui'ne i̱ yë'opore jai yai yë'opoje̱ pa'iore hue'epi.
Ja̱je pa'ina,
jai pë'ëje̱ pa'ipi i̱ tuture,
i̱ cua̱ñequë ñu'i hue̱'ñare,
cui'ne ëjaë cua̱ñequë pa'iyere i̱sipi.
3 Iquë huajëya'ye pa'i si̱opë̱a acopi te'o jai a'sio ai paji'i.
Pa'iona,
pa̱ipi ñajë ju̱'ija'quë api cajë ñasicohua'ita'are ja'ju huesësico paco'ë.
Ja̱je pa'ipi co'yasi do'ire pa̱ipi ña quëquëni i̱na tui huëohuë.
4 Ja̱ maca jai pë'ëje̱ pa'ire huajëya'ye pa'ire ëjaëre papi cuasajë se̱i'ë,
huajëya'ye pa'ire tutu i̱sisi do'ire.
Ja̱je cui'ne i̱ti tutu i̱si cua̱ñosiquëreje̱ se̱i'ë,
ñeje cajë:
“¿Nepi iquëje̱ pa'iohua'i pa'iye'ni?
¿Nepi i̱te uihua ti̱'añe pa'iquë'ni?”
5 Jaiye Maija'quëre sa̱ñope caja̱'a coca i̱si cua̱ñosiquë paji'i.
Ja̱je pa'ipi cuarenta y dos ñañëohua'ire cua̱ñeja'quë paji'i.
6 Ja̱je pa'ipi ñeje yo'opi:
Maija'quëre sa̱ñope capi,
i̱ de'o hue̱'ñare co'aye capi,
cui'ne ma'tëmo pa'icohua'ireje̱ co'aye capi.
7 Cui'ne Maija'quë tse̱cohua'ire sa̱ñope uihuaquë ñese quëco ja̱'ñe i̱si cua̱ñosiquë paji'i,
cui'ne si'a pa̱i,
tsëcapë̱a pa'icohua'ire,
si'a pa̱i yequë coca cacohua'ire,
cui'ne si'a yejaña pa'icohua'ire cua̱ñeja'a tutu i̱si cua̱ñosiquë paji'i.
8 Ja̱je pa'ini si'aohua'i iye yeja pa'icohua'i i̱ohua'i mami yeja de'huama'në Yëi ñama ai yo'oquë ju̱'isiquë pa'iye toya pëpëna toyama'cohua'ise'e ja̱ëre se̱i'ë.
9 Ca̱joro hue'ecohua'i pani asajë̱'ë.
10 Co hue̱'ña tse̱ani saja̱'cohua'ire ña nëosicohua'ire cato ja̱re tse̱ani co hue̱'ñana saja̱'cohua'i a'ë.
Hua'tipi huaija̱'cohua'ire ña nëosicohua'ire cato ja̱re hua'tipi huani je̱oja'cohua'i a'ë.
Ja̱je pa'ina,
Maija'quë tse̱cohua'i cato quëcocaiyere,
cui'ne Maija'quë pa'ire paji cuasayere paye pa'iji,
quëco ti̱'aja'cohua'i.
11 Ja̱ jeteyo'je yequëre huajëya'ye pa'ire ñahuë,
yejapi etaquëna.
Ja̱ë cato caya ca̱johuëa hue'equë paji'i,
yëi ñama ca̱johuëaje pa'yere.
Ja̱je pa'ita'a jai pë'ë cayeje̱ pa'ye caquë paji'i.
12 Ja̱je pa'ipi du'ru macarepa etasiquë huajëya'ye pa'i tutuje̱ pa'yere paquë paji'i.
Ja̱je pa'ipi du'ru etasiquë ña hue̱'ñana si'aohua'ire yeja pa'icohua'ire cua̱ñepi,
du'ru macarepa etasiquëni ai cuasajë i̱re papi cajë,
jai a'sio aire hue'esiquëpi ja'jusiquëni se̱jë'ë caquë.
13 Cui'ne jaiye pa̱i yo'o ti̱'a ma'ñe yo'opi.
Yo'oquë pa̱i ña hue̱'ñana ma'tëmopi yejana toa to̱meñe ne i̱ñoquë yo'opi.
14 Du'ru macarepa etasiquë huajëya'ye pa'i ña hue̱'ñana yo'o i̱ño ja̱'ñe i̱sise'epi yo'oquë iye yeja pa'icohua'ire cosopi.
Cosoquë cua̱ñepi,
du'ru etasiquëje̱ pa'ire nejë'ë caquë,
hua'ti totasiquëta'a ja̱ yë'ta'a huajëquë pa'iyeje̱ pa'ire.
15 Maija'quë ë̱sema'ë pa'ina,
cayaye aquë etasiquë huajëya'ye pa'ipi pa̱i de'huasiquëna,
tutu i̱sipi,
du'ru aquëje̱ pa'ire nesiquëna.
Ja̱je i̱sina,
yë'equë,
cui'ne coca caquë pa'i,
yecohua'ire i̱te do're ja'runi se̱ma'cohua'ire huani je̱ojë'ë,
cua̱ñepi.
16 Yequeje̱ cui'ne yo'opi,
si'aohua'ire a'ricohua'ire,
jaicohua'ire,
jaiye co'amaña pacohua'ire,
co'amaña peocohua'ire,
de'oye pa'icohua'ire,
jo'yaohua'ire,
ëja te̱'te jë̱tëna pa̱nita'a tsia ti̱ñare pana toyaye pa'iji,
caquë.
17 Ja̱je pa'ina,
huajëya'ye pa'i mamire,
pa̱nita'a i̱ mamire cue̱cueyere toyama'cohua'i pani co'amaña hueroyeje̱ ti peopi.
Cui'ne se yo'oyeje̱ peopi,
curiquë nesi'i caquë.
18 Iye cato ai ta̱'ñe cuasaye asa ti̱'añe paji'i.
Asa ti̱'aquëpi cuasarepa caye paji'i,
huajëya'ye pa'i mamire cue̱cueni toyase'ere.
Ja̱ cue̱cuese'e cato pa̱i mami cue̱cuese'e a'ë.
Ja̱ cue̱cuese'e cato seiscientos sesenta y seis a'ë.