Nomio Cui'ne Jai Pë'ëje̱ Pa'i Yo'ose'e
12
Ja̱ maca jaiye ma'tëmopi i̱ñoñere ñahuë.
Ñaquëna,
te'o nomio ë̱së miañeje pa'yere ca̱'nesico paco'ë,
ju'i ca̱ ca̱'neñeje pa'ye.
Ja̱je pa'iopi ñañëni meñe tsa'cu paco paco'ë,
cui'ne doce ma'ñocopi i̱o si̱opë pu̱asico paco'ë.
2 Ja̱je pa'iopi tsi̱ ë̱tapë paco'ë.
Pa'iopi tsi̱ co̱a huëoni a'si ju̱'io,
ai cuio.
3 Ja̱ jeteyo'je ñahuë,
ma'tëmona yequë ñaiquëna.
Ñaiquëna,
jai pë'ëje̱ pa'ipi maja'iquëpi,
siete si̱opë̱a hue'equëpi,
diez ca̱johuëa hue'equëpi,
cui'ne i̱ti si̱opë̱a ñape maro pu̱'iñe paji'i.
4 Ja̱je pa'ipi i̱ ji̱comopi toaso̱ të'huiña ma'ñocohua'i pa'iyere te'e te̱'te ma'ñocohua'ire yejana ne darëpi.
Ja̱ëpi nomio tsi̱ co̱asi'i caco yo'o ti̱ñare pana nëca dani utepi,
co̱asi maca tsihua'ëre a̱si'i caquë.
5 Ja̱ maca nomiopi tsihua'ëni co̱ao,
si'a yejaña pa'icohua'ire quë̱na tarapëpi ca̱jiquë cua̱ñeja'quëni.
Ja̱je pa'iquëta'are i̱o mamaquëre cato sioni Maija'quë quë'rona i̱ ñu'i saihuë quë'rona sahuë.
6 Sarena,
nomiopi cue̱ne yejana catio.
Maija'quë i̱ote caquë necai sitona,
i̱ote mil doscientos sesenta mu'seña a̱ojë paja̱'tona.
7 Ja̱ jeteyo'je ai uihuaye paji'i,
ma'tëmopi.
Pa'ina,
hui̱ñaë Miguelpi cui'ne i̱ hui̱ñaohua'i co̱ni jai pë'ëje̱ pa'ire cui'ne i̱ hui̱ñaohua'ire uihuahuë.
8 Ja̱je uihuajë jai pë'ëje̱ pa'ire cui'ne i̱ hui̱ñaohua'ire quëcorena,
i̱ohua'i pa'ija̱'to ma'tëmo peoquëna,
9 ja̱ maca jai pë'ëje̱ pa'ire cui'ne i̱ hui̱ñaohua'ire yejana je̱o to̱huë,
tsoe hue̱'ña a̱ñare,
huati cui'ne Satanás hue'equëre,
si'a yeja pa̱ire cosoquëre.
10 Ja̱ maca asahuë,
ma'tëmopi tutu ñeje caquëna:
“Maija'quë do'ijëre ñamiñapi,
cui'ne mu'señapi Maija'quë ña hue̱'ñana sa̱ñope caquë pa'isiquëre eto saosi do'ire yureta'a ti̱'are papi,
huaso maca,
Maija'quë si'a tutu quë'ire papi cua̱ñe maca,
Jesucristo cua̱ñe Ëjaërepa pa'i maca.
11 Maija'quë do'ijë,
cato Yëi ñama tsiepi cui'ne Maija'quë coca cayeje̱ pa'ye nuñerepa i̱ohua'i pa'ise'epi co̱ni mënare quëcohuë.
Ja̱je pa'ina,
i̱ohua'i pa'iye nejoñe ca'raye pa̱huë.
Pa̱jë coa ai jerepa ju̱junije ju̱juñu'u,
cuasahuë.
12 Sihuajë̱'ë,
ma'tëmo pa'icohua'i.
Ja̱je pa'iquëta'are teayerepa yeja pa'icohua'i maña,
cui'ne jai tsiaya pa'icohua'i,
huati mësaru quë'rona cajepi pë̱titesiquëpi i̱te nejoñe ja'yere pa'ina,
ñaquë.”
13 Jai pë'ëje̱ pa'ipi yejana je̱o to̱siquëpi pa'i ña jujani tsihua'ëre co̱asiconi huajo huëopi.
14 Ja̱je huajo huëouna,
nomiore jai huihue care i̱sihuë,
i̱o ja'jëco cue̱ne yejana i̱o quë'rona sai ja̱'ñere,
a̱ña peo hue̱'ñana so'ona.
Ja̱rona toaso̱ o̱metëca jopore paja̱'a a̱ojëna,
pa'ija̱'copi saija̱'coa.
15 Ja̱je pa'ina,
a̱ñapi nomiore i̱o yë'opo siso etosi ocopi tsiaya neni co'je me to̱si'i caco yo'ocona,
16 nomiore yejapi co̱caio jai pë'ëje̱ pa'i oco nese'ere peo hue̱'ñarepa ya'ani nëo hueso.
17-18 Ja̱je yo'osi maca jai pë'ëje̱ pa'ipi ai pë̱ti huëopi,
nomiore.
Ja̱je pa'ina,
i̱o tsëcapëre Maija'quë cua̱ñese'e sehuocohua'ire,
Jesucristo quëase'ere nuñerepa coca tuicohua'ire uihuasi'i caquë saji'i.