Caya Quëacaicohua'i
11
Ja̱ maca yë'ëre ca̱të tarapëje̱ pa'ioni cue̱cueja̱'core i̱sihuë.
I̱sini cahuë:
“Huëni Maija'quë huë'ere i̱na i̱si toto saihuëre,
cui'ne i̱ote pa'ijë se̱cohua'ire cue̱cuejë̱'ë.
2 Ja̱je pa'iquëta'are cue̱cuema'ë pa'ijë̱'ë,
hue'se de'otota'a.
Ja̱ro cato Maija'quëre se̱ma'cohua'ina i̱si sito a'ë.
Ja̱ohua'ipi si'a de'o daripë tsa'cu huesoja̱'cohua'i a'ë,
cuarenta y dos ñañëohua'ire.
3 Ja̱ maca yë'ëpi cayaohua'ire oicohua'i su̱ñañeje pa'yere su̱ñasicohua'ini jëjo saoja̱'quë a'ë,
yë'ë aye quëaja̱'cohua'ire mil doscientos sesenta mu'seña.”
4 Icohua'i caya quëacohua'i cato si'a yeja Ëjaërepa ti̱ñare pare nëcajë pa'icohua'i paë'ë.
Ja̱ohua'i cato caya olivo so̱quë ñëa'ë,
cui'ne caya sotonoa toa tsë̱'ise'e paji'i.
5 Pa̱ipi ja̱ohua'ire co'aye yo'oñu'u cajë yo'ocohua'i pa'ito coa yë'opopi toa sëco ëo huesocohua'i a'ë,
ti peo hue̱'ñarepa.
Ja̱je ne hue̱a cua̱ñoñe pa'iji,
i̱ohua'ire sa̱ñope yo'ocohua'i.
6 Ja̱ohua'i cato Maija'quë coca quëa macaja̱'a ocoye pa̱ ja̱'ñere ne tutu pacohua'i paë'ë,
cui'ne ocoje̱ tsie po̱na tutu pacohua'ipi yeja pa̱ire coa si'aye ai yo'oye necohua'i paë'ë,
i̱ohua'i yëyeje̱ pa'ye.
7 Ja̱je pa'iquëta'are i̱ohua'i quëaye saosi maca,
to̱me huesë cojepi nëtë mëoni huajëya'ye pa'ipi jaiquë aipi ja̱ohua'ire quëco huesoni,
tse̱ani huani je̱api.
8 Huani je̱aëna,
i̱ohua'i ca̱pë̱a jai daripë ma'ñare je̱ocose'epi u̱ija'coa,
Ëjaëre que̱si daripëre.
Ja̱ro cato Sodoma,
cui'ne Egípto hue'yosi daripë a'ë,
co'a daripë pa'i do'ire.
9 Ja̱je je̱ocosi ca̱pë̱api toaso̱ mu'seña cui'ne jopoja̱'a u̱ina,
si'aohua'i maña ñaja'cohua'i a'ë.
Ti̱ pa̱i,
yequë coca cacohua'i,
cui'ne yequë daripë̱a pa'icohua'i,
si'a yejaña pa'icohua'i ñajëta'a ta̱ma'pë pa'ija̱'cohua'i a'ë,
coe do'ire.
10 Iye yeja pa'icohua'i cato ai sihuaja̱'cohua'i a'ë,
ja̱ohua'i ju̱'isi do'ire.
Ja̱je pa'ina,
pa̱i ñape sa̱'ñe co'amaña i̱sija̱'cohua'i a'ë.
Maija'quë coca quëajë i̱ohua'ire jo̱sa yo'osicohua'ipi peojëna,
ja̱je sihuaja̱'cohua'i a'ë.
11 Ja̱je sihuajëta'are toaso̱ mu'seña joporepa pa'i maca Maija'quëpi cui'naohua'ini huëo co̱pi.
Ja̱ maca si'aohua'i i̱ohua'ire ñasicohua'i quëquë huesëhuë.
12 Ja̱ maca cayaohua'i quëacaicohua'ipi asahuë,
tutu ma'tëmopi yë'ose'e ñeje caquëna:
“Mëijë'ë,
i̱ñona.”
Si'aohua'i i̱ohua'ire pë̱icohua'i ñajëna,
sirioja̱'a ma'tëmona mëni huesëhuë.
13 Ja̱ maca yeja ñu'cueo.
Ñu'cuecona,
jai daripëpi diez te̱'ña huata to̱meo.
Huata to̱mecona,
siete mil pa̱i ju̱juhuë.
Ja̱ maca huajëcohua'i nëasicohua'ipi quëquë huesëni Maija'quë ma'tëmo pa'iquëre de'oquëre pa'ni cajë yo'ohuë.
14 Ñeje tëto saji'i,
cayaye nejoñe aye.
Ja̱je pa'iquëta'are ja̱ yë'ta'a toaso̱ñe aco tëto saiye carapi,
ti̱taja̱'coa.
Siete Duruhuë Acore Juise'e
15 Siete aquë hui̱ñaë i̱ duruhuë juisi maca asahuë,
ma'tëmopi tutu yë'o cajëna,
ñeje:
Iye yeja yure cato
Mai Ëjaë cui'ne i̱ Cristo cua̱ñeñere pa'iji.
Ja̱je pa'ina,
i̱pi caraja̱iñe peoyerepa cua̱ñequë pa'ija̱'quë api.
16 Ja̱ maca veinticuatro aiohua'ipi Maija'quë ña hue̱'ñare pare cua̱ñejë ñu'i saire ñu'icohua'ipi Maija'quëre de'oquëre pa'ni cajë i̱ohua'i tsiapi yejare pana në mejë yo'ohuë,
i̱ni ai cuasajë.
17 Ñeje cajë yo'ohuë:
De'oji.
Ëjaë më'ëre pëpayë,
Si'aye pa'ire pare.
Yure,
cui'ne tsoeje̱ pa'iquëre pare,
Ja̱je pa'ipi yure si'a më'ë tuturepa i̱ni
Cua̱ñe huëoquëre iye yeja.
18 Iye yeja pa̱i cato më'ëre pë̱'ë.
Ja̱je pa'iquëta'are më'ë pë̱i mu'sere papi ti̱'api.
Ti̱'aëna,
yure cato ju̱'isicohua'ire i̱ohua'i yo'ose'eje̱ pa'ye ñaquë ca de'huaja̱'quë a'ë,
më'ë.
Ca de'huaquë më'ë jo'yaohua'ire i̱sija̱'quë a'ë,
de'huacaisi co'amañare.
Ja̱je më'ë i̱sija̱'quë a'ë,
më'ëre quëacaicohua'ire.
Më'ëna i̱sisicohua'ire,
ëjaëre papi cajë nuñerepa sehuojë pa'icohua'ire,
Si'ahua'ire,
aiohua'ire pa̱nita'a tsi̱reje̱.
Iye yeja pa̱ire nejocohua'i pa'isicohua'ire cato më'ëpi nejoja'quë a'ë.
Ja̱je pa'ina,
de'oji,
më'ëre cayë.
19 Ja̱ maca Maija'quë huë'e ma'tëmo pa'icopi hui'yona,
ja̱rote paji'i,
Maija'quë maire huajëye ca nëose'e de'huase'epi.
Ja̱ maca mujuë ye'hueyeje̱ pa'ye,
ai pi̱siye,
mujuë ai cayeje̱ pa'ye,
yeja ñu'cueye cui'ne sësë carapë̱a to̱meñe paji'i.