Hui̱ñaëpi Toya Pëpë A'riconi Tu̱nasiconi Ca̱jipi
10
Ja̱ maca ñahuë,
yequë hui̱ñaëre tutu quë'ipi ma'tëmopi cajequëna,
siriopi ca̱'nesiquëpi.
I̱ si̱opë cato na'ñamequëpi ca'huaro pu̱asiquë paji'i.
Cui'ne i̱ tsia cato mia merepa miaco paji'i,
ë̱sëje̱ pa'io.
Cui'ne i̱ nëcañoaje toa tsë̱ni nëcase'eje̱ pa'ye paji'i.
2 A'ri toya pëpë hui'yosiconi ca̱jipi.
Ca̱jiquëpi i̱ ëja te̱'te quë̱o ja'huapi jai tsiayana se ti̱topaquë,
i̱ ari te̱'te quë̱o ja'huapi yejana tsa'cu papi.
3 Ja̱ maca tutu cuipi,
airo yai jaiquërepa cayeje̱ pa'yerepa.
I̱ cuisi maca mujuë cayeje̱ pa'yerepa siete yë'o tuturepa cajëna,
asahuë.
4 Siete yë'o tuturepa ca to̱si maca toyara'huë.
Ja̱ case'ere toyasi'i caquë yo'oquëna,
ma'tëmopi capi,
yë'ëre:
“Coa asajë̱'ë,
më'ëse'e.
Toyama'ë pa'ijë̱'ë,
siete yë'o tuturepa case'e.”
5 Ja̱ jeteyo'je ñahuë,
jai tsiayana cui'ne yejana ti̱to pasiquëpi hui̱ñaëpi i̱ ëja te̱'te jë̱tëpi ma'tëmona mëñe nëoquë
6 ti pani huesëquëre pana,
yeja,
ma'tëmo,
jai tsiaña,
cui'ne si'aye i̱ote pa'iye nesiquëre pana se ca co'ija̱i care payë caquë ñeje capi:
“Yeque tsoe ute co̱ñe peoji.
7 Siete aquë hui̱ñaë duruhuë jui maca ti̱'asipi,
Maija'quë yahue cuasa nëose'e payepi,
i̱ jo'ya i̱te quëacaicohua'ire i̱ ca nëose'eje̱ pa'ye.”
8 Ja̱ maca asahuë,
ma'tëmopi yë'ë asasi yë'opi ca co̱quëna,
ñeje:
“Sani i̱jë'ë,
a'ri toya pëpë hui'yosiconi jai tsiayana,
cui'ne yejana ti̱to paquë hui̱ñaë ca̱jiconi.”
9 Caëna,
sani hui̱ñaëre se̱i'ë,
a'ri toya pëpëre i̱sija̱quë caquë.
Se̱ina,
i̱pi capi,
yë'ëre:
“Ico,
i̱ni a̱ijë'ë,
më'ë yë'opo cato payaoje̱ pa'io pasipi.
Ja̱je pa'isicota'a më'ë ë̱tatu'una së̱jeco po̱nëja'coa.”
10 Caëna,
hui̱ñaë ca̱jicore i̱ni a'ri toya pëpë a̱ë'ë.
A̲i maca yë'ëre cato sa̱ija'ico payaoje̱ pa'iorepa paji'i.
Ja̱je pa'isicota'a ë̱tatu'una së̱jecorepa de'opi.
11 Ja̱ maca yë'ëre cahuë:
“Ti̱jupë pa̱i daripë̱a pa'icohua'ire,
cui'ne yequë coca cacohua'ire,
cui'ne yequë yejaña pa'icohua'ire,
cui'ne pa̱i ëjaohua'ire quëaye pa'iji,
Maija'quë cayere.”