9
Cinco aquëpi duruhuë jui maca ñahuë,
jai ma'ñocopi yejana to̱mequëna.
Ja̱ë ma'ñoconi i̱sihuë,
to̱me huesë coje hui'yocore.
2 Ja̱ jeteyo'je to̱me huesë hue̱'ñare hui'youna,
ja̱ropi pico mëji'i,
jai cua'coro toa suasico mëiñeje pa'yerepa.
Ja̱ro to̱me huesë cojepi pico etaquë ë̱sëre cui'ne iye de'oto nea hue̱'ñarepa ne huesopi.
3 Ja̱ picopi etahuë,
pu̱'suje̱ pa'iohua'ipi.
Etajë si'a yeja hua huesëhuë.
Ja̱ohua'i cato pu̱ni a'siye ja'ye a'si tuture i̱si cua̱ñosicohua'i paë'ë.
4 Ja̱ohua'ina cua̱ñese'e paji'i,
taya yeja pa'iye,
cui'ne yejapi tayaje̱ pa'ye ña cua̱ñoñe,
cui'ne so̱quë ñëa nejoñe pa̱ ja̱'ñere,
coa Maija'quë tse̱cohua'ire pa'ë i̱ñoñere i̱ohua'i tsia ti̱ña macare pana sëoma'cohua'ise'ere ne ja̱'ñere.
5 Ja̱je pa'iquëta'are pa̱ire huani je̱oñere pare ë̱sesicohua'i paë'ë.
Ja̱je pa'ina,
coa cinco ñañëohua'ire a'si ju̱'iñe totacohua'i paë'ë.
Cui'ne i̱ohua'i totase'e cato pu̱ni a'siye ja'ye a'siye paji'i.
6 Ja̱ mu'seña cato pa̱i ju̱'iñere yëja̱'cohua'i a'ë.
Ja̱je yëjëta'a ju̱ni huesëye pa̱ja'cohua'i a'ë,
ju̱'iñepi peoquëna.
7 Pu̱'su cato caballo huajo sajë ne de'huase'eje̱ pa'iohua'i paë'ë.
I̱ohua'i si̱opëre curi maroje̱ pa'iore pahuë.
I̱ohua'i tsiapi pa̱i tsiaje̱ pa'io paji'i.
8 Cui'ne nomiohua'i nañaje pa'ye hue'ehuë.
I̱ohua'i cu̱jire airo yai cu̱jije pa'ye hue'ehuë.
9 Cui'ne quë̱na ju'i ca̱ñare su̱ñase'eje̱ pa'iohua'i paë'ë,
i̱ohua'i jëa ja̱'ñere.
Cui'ne i̱ohua'i jaë capë̱api jai pa̱i caballo quërëcoja̱'a huajo sajë huë'huëjëna,
pi̱siyeje̱ pa'ye pi̱sipi.
10 Pu̱ni ji̱comoaje̱ pa'ye hue'ecohua'i paë'ë.
Ja̱rote dahuë hue'ecohua'i paë'ë,
cinco ñañëohua'ire a'siyere.
11 Pu̱'suohua'ire cua̱ñe ëjaë cato to̱me huesë coje hui̱ñaë paji'i.
Hebreo coca cato Abadón hue'equë paji'i.
Griego coca cato Apolión hue'equë paji'i.
Ja̱je cani i̱ti Nejoquë caye a'ë,
pa̱i coca cato.
12 Du'ru macarepa ai yo'oye tëto saji'i.
Ja̱je pa'iquëta'are ja̱ yë'ta'a cayaye carapi.
13 Seis aquë hui̱ñaë jui maca yë'ose'e pi̱siquëna,
asahuë,
Maija'quë quë'ro oropi nesi totore cuatro pa'i eyohuë̱api.
14 Ja̱ caye cato seis aquë hui̱ñaëni duruhuë paquëni capi,
ñeje:
“Joye saojë̱'ë,
cuatro hui̱ñaohua'ire sëasicohua'ipi jai ya Efrautes të̱'tëpa ñu'icohua'ire.”
15 Ja̱ maca i̱ti case'eje̱ cuatro hui̱ñaohua'ire joyesicohua'i paë'ë.
Ja̱ohua'i cato toaso̱ñe pa'ye huahuese'e pa̱i pa'icohua'ire huaija̱'cohua'ipi etahuë.
I̱ti hora,
mu'se,
ñañë,
cui'ne o̱metëcahuë ti̱'asi maca ja̱re caquë ne de'huasicohua'ipi etahuë.
16 Ja̱ maca de'hue se asahuë,
doscientos millones soldado pa̱i pa'iye,
caballore tuijë huajo sacohua'i.
17 Ja̱je pa'ye ñahuë,
ca̱ni ñañeje pa'ye caballohua'ire.
I̱ohua'ire tuicohua'i cato coti saihuë̱are toaje̱ pa'yere papi su̱ñasicohua'i paë'ë,
i̱ohua'i jëa ja̱'ñe.
Ja̱je pa'yepi ma ja̱'ñe,
yeque ña'jo quë'ye cui'ne yeque së̱'ñoja'iñe paji'i,
azufreje̱ pa'ye.
Caballohua'i cato airo yai si̱opëje̱ pa'ye hue'ecohua'i paë'ë.
Ja̱je pa'iohua'i yë'opo̱api toa,
pico,
cui'ne së̱'ño ja̱'ñe azufre etapi.
18 Ja̱ maca toaso̱ñe pa'ye huahuese'e pa̱i pa'icohua'i te'e të'hui ju̱juhuë,
caballo yë'opo̱aja'a toaso̱ñe pa'ye co'ayerepa:
toa,
pico,
cui'ne së̱'ño ja̱'ñe etasi do'ire.
19 Ja̱ caballohua'i cato i̱ohua'i yë'opo̱are cui'ne i̱ohua'i ji̱comoare tutu pahuë.
I̱ohua'i ji̱comoa cato a̱ña si̱opë̱aje pa'ye paji'i.
Ja̱pi pa̱ire co'aye nehuë.
20 Ja̱je pa'iquëta'are ja̱ ju̱'i dahuëna ju̱'ima'cohua'i cato co'aye yo'oye je̱oma'pë huatiohua'ire tuiyere,
de'huase'ere oro,
po curi,
bronce hue'yosi quë̱na,
cui'ne so̱quë de'huase'ere se̱ñere je̱oma'pë paë'ë.
Asa ma'ñere,
ñama'cohua'ini,
cui'ne cu'i ma'ñere se̱jë paë'ë.
21 Cui'ne je̱oma'pë paë'ë,
pa̱ire huani je̱añe,
pa̱ire dahuë neñe,
nomiohua'ire coa yo'ojë pa'iye,
cui'ne co'amaña ñañe.