Siete Aco Si̱osico Hui'yoye Cui'ne Ma'ña Ëoco, Curi Nesico
8
Yëi ñamapi siete aco si̱osicore ne hui'yo maca ñahuë,
ma'tëmopi nëhui tëcahuë jo'cuarepa je̱o nëina.
2 Ja̱ maca ñahuë,
siete hui̱ñaohua'ire Maija'quë ti̱ñare pare nëcajëna.
Ja̱ohua'ina siete duruhuë̱a i̱sise'e paji'i.
3 Ja̱ jeteyo'je yequë hui̱ñaëpi daji'i,
huëo së̱ ma'ña curi cua'corore daquëpi.
Dani nëcapi,
Maija'quëre i̱sijë tëo toto ti̱ña macare pana.
Nëcaquëna,
jaiye i̱sipi,
huëo së̱ ma'ñare curipi nesico Maija'quëre i̱sijë tëo totona tëoquë ëoquëna,
cui'ne Maija'quë tse̱cohua'i se̱ñepi te'e mëijaquë caquë.
4 Ja̱ ma'ña picopi cui'ne Maija'quë tse̱cohua'i se̱ñepi co̱ni Maija'quë quë'rona ti̱'api,
hui̱ñaëpi i̱ti ma'ña ëo cua'coro ca̱jiquë nëcaquëna.
5 Ja̱ maca hui̱ñaëpi Maija'quëre i̱sijë tëo toto toa tara pa'iyepi huëo së̱ ma'ña cua'corona ayapi.
Ayani yejana je̱o to̱pi.
Je̱o to̱ macarepa mujuë caye,
ai pi̱siye,
ye'hueye cui'ne yeja ñu'cueye paji'i.
Duruhuë Pi̱siye
6 Ja̱ maca siete hui̱ñaohua'ipi siete duruhuë̱a pacohua'ipi juñu'u cajë ne de'huahuë.
7 Ja̱ maca du'ru jui huëo hui̱ñaëpi duruhuë juisi maca sësë pe̱pi,
cui'ne toana tsie co̱'mese'epi yejana to̱mepi.
Ja̱ maca toaso̱ñe pa'ye yeja huahuese'e acopi te'e te̱'te u huesëpi.
U huesëquëna,
so̱quëje̱ te'e u huesëpi,
toaso̱ñe acopi te'e te̱'te,
cui'ne si'a taya u huesëpi.
8 Cayaye aquëpi hui̱ñaë i̱ duruhuë juisi maca,
ai cu̱tihuëje̱ pa'iopi toa tsë̱'isiconi jai tsiayana je̱o dëoyeje̱ ña cua̱ñopi.
Ja̱ maca toaso̱ të'huiña,
jai tsiaña pa'iyepi te'e të'hui tsie da'ca de'o nëji'i.
9 Ja̱ maca jai tsiaña pa'icohua'i ju̱juhuë,
te'e të'hui,
toaso̱ të'huiña jai tsiaña pa'icohua'ipi.
Cui'ne toaso̱ të'huiña jaiye barco pa'ise'epi,
te'e të'hui ne huesëpi.
10 Toaso̱ñe aquëpi hui̱ñaë juisi maca,
ma'tëmopi jai ma'ñoco to̱mepi.
To̱mequë toaso̱ të'huiña tsiaña,
cui'ne oco co̱ña pa'ise'ena te'e të'hui to̱me huesopi,
toa ca̱ñarepa ne'suquëpi.
11 Ja̱ë ma'ñoco cato i̱ mami hue'equë paji'i,
Së̱jeñe.
Ja̱ëpi toaso̱ të'huiña tsiaña,
cui'ne oco co̱ña pa'ise'ere to̱mequë te'e të'hui së̱je oco ne huesopi.
Ja̱ do'ire jai pa̱i ju̱juhuë.
12 Cajese'e aquëpi hui̱ñaë i̱ duruhuë juisi maca,
ë̱sëpi co'a de'opi,
te'e te̱'te,
toaso̱ të'huiña huahuese'e pa'ise'epi.
Ñañë cui'ne ma'ñocohua'i toaso̱ të'huiña huahuese'e pa'ise'epi te'e të'hui co'a de'ohuë.
Ja̱ maca toaso̱ të'huiña mu'se cui'ne ñami pa'iye te'e te̱'te miañe peopi.
13 Ja̱ jeteyo'je ñahuë,
jai huihuere ma'tëmoja'a huahuaroja̱i tutu caquëna:
“Teayerepa iye yeja pa'icohua'i maña,
merepa neja'cohua'i a'ni,
toaso̱ hui̱ñaohua'i duruhuë̱a juni co̱ maca.”