Israel Pa̱i Acohua'ire Toyase'e
7
Ja̱ jeteyo'je ñahuë,
cuatro hui̱ñaohua'ipi pa̱i ñape yeja huë'ehuë te̱'tere,
ë̱mëje'e te̱'tere,
cui'ne ë̱së mëi te̱'tere,
cui'ne ë̱së du'i te̱'tere nëcajë tutupi iye yejana,
jai tsiayana,
cui'ne so̱quë ñëana ju'ama'quëni cajë ë̱sejë pa'icohua'ire.
2 Ñahuë,
cui'ne yequë hui̱ñaëre ë̱së mëi te̱'tepi daina.
Ja̱ë cato Maija'quë huajëquërepa,
sëoconi paquë paji'i.
Ja̱ëpi ai tutu capi,
cuatro hui̱ñaohua'ire,
yeja,
jai tsiaña,
co'a de'huaja̱'a tutu i̱si cua̱ñosicohua'ire:
3 “Co'aye nema'pë pa'ijë̱'ë,
yeja cui'ne jai tsiaña,
cui'ne so̱quë ñëaje,
ja̱ yë'ta'a Maija'quë sahuasicohua'ire i̱ohua'i tsia ti̱ñare pana toya sëoma'pë pani.”
4-8 Cui'ne ja̱ maca asahuë,
ciento cuarenta y cuatro mil pa̱i pa'iyë,
si'a Israel pa̱i,
i̱ohua'i tsia ti̱ñare pana toya sëo cua̱ñosicohua'i,
cayere.
Doce mil Judá tsëcapëre,
doce mil Ruben tsëcapëre,
doce mil Gad tsëcapëre,
doce mil Aser tsëcapëre,
doce mil Neftalí tsëcapëre,
doce mil Manases tsëcapëre,
doce mil Simeón tsëcapëre,
doce mil Leví tsëcapëre,
doce mil Isacar tsëcapëre,
doce mil Zabulón tsëcapëre,
doce mil José tsëcapëre,
cui'ne
doce mil Benjamín tsëcapëre pa'iyë,
cayere.
Poja'i Ca̱ña Ju'icohua'i
9 Ja̱ jeteyo'je ñahuë,
jai pa̱ire si'a yejaña pa'icohua'ipi pa̱i ñape tsëca ti̱ñe pa'i pa̱i,
cui'ne pa̱i ñape tsëca ti̱ñe coca cacohua'ire.
Ja̱ohua'ipi ñu'i saihuë ti̱ñare pare,
cui'ne yëi ñama ti̱ñare pare,
ti pa̱ije cue̱cue ti̱'añe peoyerepa paë'ë.
Ja̱ohua'ipi poja'i ca̱ña ju'icohua'ipi i̱ohua'i jë̱ñare sehua ja'oje̱ pa'yere ca̱jijë nëcahuë.
10 Ca̱jijë nëcajë si'aohua'i cuihuë:
Maire huasoye cato
ñu'i saihuë ñu'iquërepa Maija'quë,
Cui'ne Yëi ñama tse̱ a'ë.
11 Cajëna,
ñaquëna,
Maija'quë hui̱ñaohua'ipi ñu'i saihuë aiohua'i,
cui'ne cuatro pa'iohua'i yërëhueja̱'a nëca të'ija̱isicohua'ipi paë'ë.
Pa'ijë Maija'quëre de'oquëre pa'ni cajë pëpajë yejare pana tsiapi pu̱'pe co'i mejë yo'ohuë.
12 Ñeje cajë:
¡Ja̱je pa'ija̱'quë!
Je'nëna Maija'quë tse̱ pa'ija̱quë,
de'oquëre pa'ni cajë sihuaye,
i̱ de'oyerepa yo'oyere sihuajë caye,
ta̱'ñe asayepi neñere,
de'oye yo'opi cuasajë i̱te sihuaye,
Ëjaë api,
cuasajë de'oyerepa sehuojë yo'oye,
si'a ne ti̱'a tutu paye,
cui'ne si'a tutu hue'eye,
si'anë.
Ja̱je pa'ija̱quë.
13 Ja̱ maca aiohua'i aquëpi yë'ëre se̱ji'i:
“¿Jeropi daisicohua'ipi icohua'i poja'i ca̱ña su̱ñasicohua'i pa'iye'ni?”
14 Cajëna,
yë'ëpi cahuë:
“Ëjaë më'ëpi ta̱'ñe asayë.”
Caquëna,
i̱pi capi:
“Icohua'i cato jaiye ai yo'oye tëto saisicohua'i a'ë.
Ja̱je pa'iohua'ipi i̱ohua'i ca̱ña jo̱ja to̱rena,
Yëi ñama tsiepi poja'i ca̱ñarepa ne to̱sicohua'i a'ë.
15 Ja̱je pa'iohua'ipi Maija'quë ñu'i saihuë ti̱ñare pare pa'iyë.
Pa'ijë mu'señapi,
ñamiñapi Maija'quë huë'ere necaijë pa'iyë.
Pa'ijëna,
ñu'i saihuë ñu'iquëre papi i̱ohua'ire ñacai pasipi.
16 Ja̱je pa'ina,
yure cato ai yo'oye pa̱ja'cohua'i a'ë,
a̱o ëaye,
oco ëaye,
ë̱së ëoye,
cui'ne jo̱sa ë̱së uyeje̱ asama'pë pa'ija̱'cohua'i a'ë.
17 Yëi ñama,
ñu'i saihuë quë̱no maca nëiquëpi yëi ñamare ñacaiyeje̱ pa'ye ñacasipi.
Ja̱je yo'oquë pa'iye i̱si oco co̱ñana saquë o̱cuaja̱'quë api.
Yo'oquëna,
Maija'quëpi i̱ohua'i oise'ere të̱no je̱ocaija̱'quë api.”