Ma'tëmo Pa'icohua'i Maija'quëre Ti De'oquërepa Caye
4
Ja̱ yo'o tëjisi jeteyo'je ñahuë,
ma'tëmore eta sa'ro hui'yosicopi pa'ina,
yë'ëre du'ru macarepa duruhuë tuturepa juijëna,
pi̱siyeje̱ pa'yere papi casiquëpi capi:
“I̱ñona mëijë'ë.
I̱ñosi'i më'ëre,
iye tëto sai jeteyo'je pa'i ja̱'ñere.”
2 Ja̱je ca maca tsoe joyo pa'iquë de'ohuë.
Ja̱je pa'i ñahuë,
te'e cua̱ñequë ñu'i saihuë ma'tëmona ñosiconi.
Ja̱ ñu'i saihuëre te'i ja'rusiquëpi ñuji'i.
3 I̱ote ñu'iquë cato miaquërepa paji'i,
jaspe hue'yosi quë̱na pëje̱ pa'irepa poja'icorepa,
pa̱nita'a cornalina quë̱naoje pa'irepa.
I̱ ñu'i saihuë ë̱mëje'ere na'ñamequë së'ise'eje̱ pa'i paji'i,
i̱ miañepi ña etoja̱iñerepa miapi,
ña'jo quë'i quë̱nao esmeralda hue'yosi quë̱naoje pa'yerepa.
4 Ja̱o i̱ cua̱ñequë ñu'i saihuë yërëhuere yequë veinticuatro cua̱ñejë ñu'i saire,
veinticuatro aiohua'i ja'rusicohua'ipi ñuë'ë,
poja'i ca̱ña su̱ñasicohua'ipi,
cui'ne curi manoare pu̱asicohua'i paë'ë.
5 Joporepa ñu'i saihuëpi mujuë ye'hueyeje̱ cui'ne ai pi̱siye cui'ne mujuë cayeje̱ etapi,
cui'ne ñu'ico ti̱ñare pare siete toa tsë̱opë̱a paji'i,
toa tsë̱ni nëcase'epi.
Ja̱ cato Maija'quë siete joñoapi ña cua̱ñopi.
6 Ñu'ico ti̱ñare pare paji'i.
Jairaje̱ pa'iopi ña etoja̱i yeja paji'i.
Cua̱ñequë ñu'i saihuë nëico yë'quë macare cuatro pa'iohua'i paë'ë,
ñaco ca̱ ti̱mësicohua'ipi jeteyo'je cui'ne ti̱ña ña hue̱'ñaje.
7 Du'ru macarepa aquë cato jai yaije̱ pa'i paji'i.
Cayaye aquëpi duruhue̱quë ë̱mëje pa'i paji'i.
Toaso̱ñe aquëpi pa̱i tsiaje̱ pa'iore hue'equë paji'i.
Cui'ne cajese'e aquëpi jai huihue huëni saiyeje̱ pa'i paji'i.
8 Ja̱ohua'i cato pa̱i ñape seis jaë capë̱a hue'ecohua'i paë'ë.
Ja̱je pa'iohua'ipi ñaco ca̱se'epi ti̱mësicohua'i paë'ë,
hue'se cui'ne sa̱'nahuëje.
Ja̱je pa'iohua'ipi,
ñami cui'ne mu'se caye je̱oma'pë ñeje cahuë:
De'oquërepa,
de'oquërepa,
de'oquërepa,
Ëjaë Diusu si'a tuturepa paquë,
tsoe pa'isiquë,
yure pa'iquërepa,
cui'ne cui'naëpi daija̱'quëpi pa'iquë.
9 Ñaco ca̱ ti̱mësicohua'ipi ñu'i saihuë ñu'iquëre pare pëpajë,
de'oquëre pa'ni Ëjaërepa ti pani huesëquërepa caye ñape,
10 veinticuatro aiohua'ipi do're ja'rujë i̱ ña hue̱'ñana yo'ohuë,
i̱ni de'oquëre pa'ni cajë,
cui'ne i̱ ñu'ico ti̱ñare pana i̱ohua'i manoare ti pa'iquëre pana i̱sijë je̱a o̱ejë cahuë ñeje:
11 Më'ë a'ë,
yëquë Ëjaë cui'ne yëquë ja'quë.
Më'ëre de'oquëre pa'ë,
Ëjaëre pa'ë,
si'a tutu quë'ire pa'ë caye pa'iji,
si'aohua'i.
Më'ëpi yëni si'aye de'huasi do'ire.