Sardisna Quëaye
3
Toyajë̱'ë,
cui'ne Sardis sehuosicohua'i tsëcapëre quëacai hui̱ñaëna:
‘Ñeje caji,
siete Maija'quë joñoa paquëpi,
cui'ne siete ma'ñocore paquëpi:
Yë'ëpi si'aye asayë,
më'ë yo'oye,
cui'ne më'ë huajëquërepa pa'iyë caquëta'a ju̱'isiquëpi pa'iye.
2 Sëtajë̱'ë.
Sëtani tutu yo'oquë ne huëojë̱'ë.
Ja̱ yë'ta'a i̱ti nëa mañare tsoe caraja̱ni tëjiyere më'ë yo'oye Maija'quë ña hue̱'ñana caraëna,
ñahuë.
3 Cuasa ñajaijë'ë,
më'ëre ye'yase'ere ja̱re pa'ijë̱'ë,
cui'ne po̱nëjë'ë,
Maija'quëna.
Ja̱je më'ëpi sëtama'quë pa'ito,
yë'ëpi ñaëje pa'i saija̱'quë a'ë,
më'ë quë'rona më'ë utema'ë pa'i maca.
4 Ja̱je pa'iquëta'are ja̱ro më'ë pa'i hue̱'ña Sardis daripëre më'ë payë,
te'ohua'i mañare i̱ohua'i ju'i ca̱ña si'si nema'cohua'ire.
Co'aye yo'oyere yo'oma'cohua'ire cayë.
Ja̱ohua'ipi yë'ë ja̱'re co̱ni cu'ija̱'cohua'i a'ë,
poja'i ju'i ca̱ñare su̱ñasicohua'ipi do'i quë'iohua'i pa'iye sëte.
5 Quëcosicohua'i etasicohua'ipi ja̱je poja'i ca̱ñare su̱ña cua̱ñoja'cohua'i a'ë,
cui'ne i̱ohua'i mamije pa'i toya pëpëna toyase'ere ni'no je̱oma'ë pasi'i,
coa ai jerepa yë'ë ja'quë ña hue̱'ñana,
cui'ne i̱ hui̱ñaohua'i ña hue̱'ñana icohua'i yë'ë tse̱cohua'i a'ë casi'i.
6 Ca̱jonoa hue'equë pani asajë̱'ë,
Maija'quë joyo sehuosicohua'i tsëcapë̱are cayere.’
Filadelfia Quëaye
7 Toyajë̱'ë,
cui'ne Filadelfia daripë sehuosicohua'i tsëcapëre quëacai hui̱ñaëna:
‘Ñeje caji ti de'oquëpi,
cui'ne nuñerepa pa'iquëpi,
pa̱i ëjaë David hui'yocore paquëpi,
i̱pi hui'yosiquë pa'ito yecohua'ije̱ si̱o ti̱'añe peoquëpi,
cui'ne i̱pi si̱osiquë pa'itoje̱ hui'yo ti̱'añe peoquëpi.
8 Yë'ëpi si'aye më'ë yo'oye ñañë.
Yë'ëpi më'ë ña hue̱'ñana eta sa'ro hui'yo nëohuë,
yecohua'ije̱ ti si̱o ti̱'añe peoconi.
Më'ë a'ri maña tutu hue'equëje̱ de'hue yë'ë case'ere sehuoquë de'oye yo'ohuë.
Ja̱je yo'oquë yë'ëre do'i peoquë api caye pa̱huë,
më'ë.
9 Ja̱je pa'ina,
yë'ëpi Satanásre sehuosicohua'i tsëcapë acohua'ire më'ëna sani do're ja'ruja̱'cohua'ire jëjo saosi'i,
judío pa̱i a'ë cajë yë'ë sehuosicohua'ire sa̱ñope yo'ocohua'ipi,
coa cosocohua'ire.
Ja̱je yo'oquëna,
ñajë asa ti̱'ajajë,
yë'ë më'ëre oi payere.
10 Yë'ë cua̱ñese'e si'anë më'ë yo'o jujama'ë yo'o ti̱'ahuë.
Ja̱je yo'o do'ire më'ëre yë'ëpi ñacasi'i,
ai yo'oye peoja̱quë caquë,
si'a iye yeja pa'icohua'ire neña maca ti̱'asi maca.
11 Esa yë'ë daiyë.
De'hua ñaquë pajë̱'ë,
më'ë co'amaña yecohua'ipi më'ëre i̱si ja̱'ñe ca nëose'ere sioye pa̱ja'cohua'ire.
12 Quëcosicohua'ini yë'ëpi Maija'quë huë'e jëhuopa tupë̱a nesi'i,
ja̱ropi ti etaye pa̱ja'cohua'ire,
cui'ne i̱ohua'ina toyasi'i yë'ë Diusu mamire i̱ tse̱cohua'ire pa'ë i̱ñoñere,
cui'ne yë'ë Diusu pa'i daripë mamire toyasi'i,
huajë Jerusalén ma'tëmo daico mamire,
cui'ne yë'ë huajë mamire toyasi'i,
i̱ohua'ina.
13 Ca̱jonoa hue'equë pani asajë̱'ë,
Maija'quë joyo sehuosicohua'i tsëcapë̱are cayere.’
Laodiceana Quëaye
14 Toyajë̱'ë,
cui'ne Laodicea daripë sehuosicohua'i tsëcapëre quëacai hui̱ñaëna:
‘Ñeje caji,
i̱ti nuñerepa pa'iquëpi,
i̱ti ñasiquëpi,
nuñerepa iye coca caquëpi,
Maija'quëre si'aye ne huëocaisiquëpi,
jerepa du'ru aquëpi.
15 Yë'ëpi si'aye ta̱'ñe asayë,
më'ë yo'oye.
Asayë,
më'ë sësëma'quë cui'ne uma'quë pa'iye.
De'ora'pi,
më'ëpi sësëquë pa̱nita'a uquë pa'ito.
16 Ja̱je pa'iquëta'are më'ë cato sësëquëje̱ cui'ne uquëje̱ peoquë a'ë.
Më'ë cato coa quëo ja'iquë a'ë,
matu ocoje̱ pa'iohua'ipi coa pa'iyë,
de'oye yo'oma'cohua'ipi cui'ne co'aye yo'oma'cohua'ipi.
Ja̱je pa'ina,
më'ëre yë'ë yë'opoja̱'a siso je̱osi'i.
17 Ja̱je pa'iquëta'are më'ëpi cayë,
jaiye co'amaña paquë a'ë,
si'aye de'oye saiji,
cui'ne ti carayeje̱ peoji.
Ja̱je caquë më'ë pa'iye ña sëtama'ë pa'iyë.
Më'ë cato teaye pa'ipi,
co'amaña peoquëpi,
ñama'quëpi,
cui'ne peoyopi pa'iyë,
më'ë.
18 Ja̱je pa'ina,
yëhuoyë,
më'ëre yë'ëna huerojë̱'ë,
toana cua'coni nesi curiquëre pare.
Yureta'a ja̱ maca nuñerepa jaiye co'amaña paquë pa'ija̱'quë a'ë,
cui'ne huerojë̱'ë,
yë'ëna poja'i ca̱ñare,
më'ë huajëya'ye peoyo pa'iyere pë'pëja̱quë.
Cui'ne ñaco ca̱ tsa'se ëcoje̱ yë'ëna huerojë̱'ë,
ja̱pi neni ñaquë pa'ija̱'quë.
19 Si'aohua'ire yë'ë oicohua'ire cato,
tayojëna,
yë'ëpi si'sequë yëhuo nu'ñequë a'ë.
Ja̱je pa'iye sëte tutu yo'oquë ja̱'në pa'ise'e je̱oni Maija'quëna po̱nëjë'ë.
20 I̱na,
yë'ëpi eta sa'rore nëcaquë soiyë.
Ja̱je soiquëna,
asasicohua'i aquëpi yë'ë yë'ore asani hui'yo catu i̱ huë'ena cacani i̱ ja̱'re co̱ni a̱ija'quë a'ë.
21 Quëcosicohua'i etasicohua'ini,
yë'ë cua̱ñequë ñu'ico yë'quë macana ñoja'quë a'ë.
Yë'ë quëcosiquëpi ja'quë ñu'ico acona ja'ruse'eje̱ pa'ye,
i̱ cua̱ñequë ñu'icona.
22 Ca̱jonoa hue'equë pani asajë̱'ë,
Maija'quë joyopi sehuosicohua'i tsëcapë̱are cayere.’ ”