Diusu I̱sisi Tutu Pa'iye Ja'ye Ñacaijë Pa'iye
4
1-2 Cristopi i̱ ca̱pë ai yo'oquë ju̱ji'i.
Ja̱je pa'ina,
iye cuasayere pajë̱'ë.
Ca̱pëpi ju̱'isiquë cato co'aye yo'oye tëni saisiquë api.
Tëni saisiquëpi si'a i̱ iye yeja pa'i maca Maija'quë yëyere yo'oquë pasipi,
i̱ ca̱pë co'aye yëyere yo'oma'ë,
ja̱re cuasajë pa'ijë̱'ë.
3 Teape tsoe mësaru Maija'quëre sehuoma'cohua'i yo'oyere yo'ojë paë'ë,
si'aye yo'oyena sëo measicohua'ipi,
co'ayere yëyere,
cuepeyere,
jai pa̱i tsi'sini a̱ijë ai pi̱siye yo'ojë cayere,
jaiye co̱no u̱cuyere,
cui'ne Maija'quë api cajë co'ayere se̱jë yo'ojë paë'ë.
4 Ja̱ohua'i cato yure mësarute ti̱ohua'ire ñañë,
mësarupi te'e i̱ohua'i ja̱'re co̱ni co'ayere yo'ojë pa'ima'pëna.
Ja̱je pa'ina,
mësarute co'aye cayë.
5 Ja̱je pa'iquëta'are ja̱ohua'i cato i̱ohua'i pa̱i ñape yo'ose'ere i̱ñoja'cohua'i a'ë,
huajëcohua'ire cui'ne ju̱'isicohua'ire pa̱i ñape yo'ose'ere sa̱isi'i caquë ña de'huaquëna.
6 Ja̱je pa'ina,
ju̱'isicohua'ire de'o cocare quëapi.
Ja̱ cocapi i̱ohua'i huajëcohua'i pa'inë yo'ose'ere ña de'huayere caquë,
i̱ohua'i Diusu pa'iye i̱siyepi joyopi pa'ija̱jë caquë yo'opi.
7 Si'a co'amaña caraja̱i mu'seña ti̱'aji.
Ja̱je pa'ina,
mësaru nuñerepa pa'iohua'ipi Maija'quëre se̱ñese'e yo'ojë pa'ijë̱'ë.
8 Ja̱je pa'ina,
si'aye jerepa pa̱i ñape sa̱'ñe oiyere pajë̱'ë.
Pa̱ire oiye cato jaiye co'aye yo'oyere sa̱i de'huacaiye a'ë.
9 Pa̱i ñape yecohua'ire de'oye yo'ojë̱'ë,
mësaru huë'ena daicohua'ire,
ë̱sema'pë.
10 Jaiye ti̱ñe pa'ye Maija'quë i̱siye de'o co'amaña de'oyerepa necaicohua'i sëte pa̱i ñape yecohua'ire necaijë̱'ë,
mësaru i̱si cua̱ñose'eje̱ pa'ye.
11 Mësaru joyopi cocare caquë pani Maija'quë coca cayeje̱ pa'ye caja̱quë,
cui'ne yecohua'ini co̱caiquë pani Maija'quë i̱si tutupi co̱caija̱quë.
Ja̱je pa'ina,
si'aye mësaru neroja̱iñe cato Jesucristo do'ija̱'a,
Maija'quëre sihuajë de'oquëre pa'ni ca ja̱'ñere neñe pa'ija̱quë.
Maija'quëre cato si'a miañe ja̱re i̱ tse̱se'e a'ë,
cui'ne si'a co'amaña ja̱re i̱ tse̱se'e a'ë,
je'nëna.
Ja̱je pa'ija̱quë.
Cristore Tuicohua'i Ai Yo'oye
12 Yë'ë oicohua'i,
toa ëoyeje̱ pa'ye jëaye neñañepi mësaruna ti̱taja̱'coa.
Ti̱tacona,
me neni ja̱je ti̱ñerepa pa'iquë'ni cuasama'pë pa'ijë̱'ë.
13 Neñañepi pa'ito coa ai jerepa sihuajë̱'ë,
Cristo ai yo'ose'e ayere mësaruje̱ pajë cajë,
si'aye i̱ ayere de'oyerepa mësaruja̱'a i̱ñoquëna,
ai sihuaja̱'cohua'ipi.
14 Ja̱je pa'ina,
yecohua'ipi Cristore tui do'ire mësarute co'acohua'i a'ë cato mësaru sihuacohua'i pa'iye pa'iji,
Maija'quë de'o joyopi mësaru ja̱'re pa'i do'ire.
15 Pa̱ire huani je̱oñere,
co'amaña yahue i̱ñere,
co'aye yo'oyere,
yecohua'i yo'oyere coa cacaroja̱ijë ne de'huacaiyere yo'oye peoji,
iyere yo'o do'ire ai yo'oquë pani huajëya' ju̱'iñe pa'iji.
16 Ja̱je pa'iquëta'are Cristore tui do'ire ai yo'oquë pani huajëya' ju̱'iñe peoji.
Coa ai jerepa Maija'quëni de'oquëre pa'ni caquë sihuaye pa'iji,
ai yo'o do'ire.
17 Tsoe ti̱'api,
Maija'quë tsëcapëre pani i̱ohua'i yo'ose'e ñaquë sa̱i de'hua maca.
Ja̱je mai yo'ose'ere du'ru ñaquë sa̱i de'huaye huëoto,
¿merepa ja̱ohua'i Maija'quë caye sehuoma'cohua'i yo'o cua̱ñoja'cohua'i a'ni,
ai co'acohua'i cui'ne Maija'quë cua̱ñeñe yo'oma'pë tayocohua'i?
18 Nuñe yo'ocohua'ita'a huaso cua̱ñoñe ai yo'oye pa'iji.
Ja̱je pa'ito,
¿merepa co'aye yo'ocohua'i cui'ne tayocohua'i jëa ti̱'aja'cohua'i a'ni?
19 Ja̱je pa'ina,
Maija'quë yëyepi yo'ojë ai yo'ocohua'i cato ja̱re de'oyere yo'ojë pa'iye pa'iji,
joñoase'ere Maija'quëna i̱sini pa'ijë,
Maija'quë cato maire ne de'huaquëpi,
cui'ne i̱ case'eje̱ yo'o ti̱'aquëpi.