Huejasicohua'i Pa'iyere Quëaye
3
1-2 Nomiohua'i,
mësaruje̱ mësaru ë̱jëohua'i cua̱ñeñere de'oye sehuojë pa'ijë̱'ë.
Ja̱je yo'ojëna,
mësaru ë̱jëohua'i sehuoma'cohua'ipi mësaru i̱ohua'ire de'oye ëjaohua'ire ñajë de'oye pa'iyere ñajë sehuoja̱'cohua'i a'ë,
ai yëhuo coca peoye.
3 Mësaru de'ocohua'i ña cua̱ñoñere ë̱mëje'e ca̱pë ëja de'oyere oima'pë pa'ijë̱'ë,
ai de'oye naña yoyere,
jai do'i yi'yo se̱'huoñere,
pa̱nita'a jai do'i ca̱ña su̱ñañere.
4 Mësaru de'ocohua'i pa'iye cato pa'ija̱quë mësaru joyopi de'oye cuasayepi,
ja̱'ë të̱në ma'ñerepa,
a̱'ji joyopi jo'cua de'oye pa'iye a'ë,
do'i quë'yerepa Maija'quë ña hue̱'ña.
5 Ai tsoe hue̱'ña nomiohua'i Maija'quëna i̱ohua'i pa'iye i̱sisicohua'i cato ja̱je pa'iyepi ëja de'osicohua'i pa'a̱huë'ë.
Maija'quëna quëco pacohua'i pa'a̱huë'ë.
Ja̱ohua'i cato,
ja̱je pa'iohua'ipi i̱ohua'i ë̱jëohua'ire de'oye sehuocohua'i pa'a̱huë'ë.
6 Ja̱je pa'io pa'a̱co'ë,
Zara.
Ja̱je pa'iopi i̱o paquë Abrahamre de'oye sehuoco pacopi ca'a̱co'ë,
“Yë'ë ëjaë”.
Ja̱je pa'ina,
mësarupi ti ca'rama'pë de'oye yo'ocohua'i pani i̱o mamajë pa'iyë.
7 Ja̱je cui'ne mësaruje̱ ë̱jëohua'ije̱ mësaru nëjohua'i yëjë cayere de'oye asacohua'i pa'ijë̱'ë.
Pa̱ni nomiohua'ipi esa jë'ye duruhuëje̱ pa'iohua'i pa'i do'ire i̱ohua'ire ëjaohua'ire ñajë dahuëre paye.
Coa ai jerepa Maija'quë oi mësarute pa'iye i̱sise'eje̱ pa'ye ja̱ohua'ireje̱ i̱sisi do'ire mësaru de'oye ñajë pajë̱'ë.
Ja̱je yo'ojëna,
mësarute jo̱sa ta̱'tëpoje̱ pa'io pa'iye pa̱sipi,
Maija'quëre se̱ maca.
De'oyere Pare Yo'o Do'ire Ai Yo'ocohua'i Pa'iye
8 Ja̱je pa'ito pa̱i ñape sa̱'ñe de'oye yo'ojë pa'ijë̱'ë,
te'e nëiñena tsiosicohua'ipi sa̱'ñe Maija'quë do'ijëre oijë.
Teaye pa'iohua'ipi de'oye yecohua'ire oijë co̱caicohua'i pa'ijë̱'ë.
9 Mësarute co'aye yo'ouna,
i̱teje̱ co'ayepi sa̱ima'cohua'i pa'ijë̱'ë,
pë̱i tea ju̱'iquëna.
I̱teje̱ pë̱ijë sa̱ñope tea ju̱'iñepi sa̱ima'pë pa'ijë̱'ë.
Coa ai jerepa mësarute sa̱ñope cacohua'ini de'oyepi cacaijë̱'ë,
Maija'quëpi de'oye pa'iyena de'huaja̱'cohua'ini soisicohua'i sëte.
10 Ja̱je pa'ina:
Pa̱ipi sihuaquë de'o mu'seña pasi'i cani
I̱ tse̱meñore nau nëcoye pa'iji,
Coso coca caye pa̱ja'core yë'opopi.
11 Co'aye yo'oyere je̱oconi de'oyere yo'ojë pa'ijë̱'ë.
Jo'cua de'oye pa'iyere co'eni ti̱'ani ja̱re yo'oye pa'iji.
12 Ëjaëpi nuiñe pa'icohua'ire ñacai paji.
Cui'ne i̱ohua'i i̱te se̱ñeje asacai pa'iji.
Ja̱je pa'iquëta'are co'aye yo'ocohua'ire cato sa̱ñope yo'oquë pa'iji.
13 ¿Nepi mësarute sa̱ñope yo'oja̱'cohua'i a'ni,
mësarupi si'anë de'oyese'e yo'ocohua'i pa'ito?
14 Ja̱je pa'iquëta'are mësaru nuñerepa yo'ojë pa'i do'ire ai yo'oni sihuacohua'i pa'ija̱'cohua'i a'ë.
Ca'rama'pë pa'ijë̱'ë.
Cui'ne co'a ju̱'ima'pë pa'ijë̱'ë.
15 Coa ai jerepa Cristore mësaru joñoa Ëjaëre pare pajë̱'ë.
Ja̱je pa'ina,
si'anë cua̱ñesicohua'ipi pa'ijë̱'ë,
mësaru sehuoni utejë pa'iyere pa̱ipi se̱ni asañu'u cajë se̱cohua'ire,
dahuëre pa'iohua'ipi,
ëjaohua'ire ñajë de'oyere papi i̱ohua'i se̱se'ere sehuocaijë̱'ë.
16 Ja̱je pa'ina,
mësaru cuasayepi jo'cua pa'ija̱quë cani de'oye yo'ojë pa'ijë̱'ë.
Pa'ijëna,
mësaru nuñe Cristore sehuocohua'i ëaye pa'iyere co'aye cacohua'ipi i̱ohua'i co'aye case'ere cuasajë co'a ju̱'ija'cohua'i a'ë.
17 Ai jerepa de'oji,
nuñere pare yo'ojë ai yo'oye pa'ito.
Ja̱je Maija'quëpi yë nëoru.
Co'ayere yo'o do'ire ai yo'oye cato do'i peoye a'ë.
18 Mai co'aye yo'o do'ire sa̱icai Cristo ai yo'opi,
te'ore pare ju̱ni tëjiquë.
De'oquëpi ai yo'opi,
mai co'acohua'i do'ire,
maini Maija'quë quë'rona sasi'i caquë.
I̱ ca̱pë cato huahuoni ju̱'isiquë paji'i.
Ja̱je pa'isiquëta'a i̱ joyopi huëoquëna,
cui'naëpi huajëquë pani co̱pi.
19 Ja̱ joyopi sani pa̱ire necaise'ere quëapi,
tse̱a cua̱ñosi joñoare.
20 Ja̱ joñoa cato tsoe hue̱'ña Noé pa'inë Maija'quëre sehuocaima'cohua'i pa'ijë pa'isicohua'i paë'ë.
Jai yohuë de'hua maca Maija'quë yo'o jujama'ë i̱ohua'ire utequë pa'i maca ja̱ joñoare quëapi.
Coa ocho pa̱i maña huaso cua̱ñojë pa'a̱huë'ë,
ocopi.
21 Maire oco doye cato ocho pa̱ire huasose'eje̱ pa'ye a'ë.
Ja̱je pa'ina,
Jesucristo ju̱ni huëisi do'ipi maire huasoji.
Oco doye cato coa i̱ñoñe a'ë,
ja̱ huasosicohua'i pa'iyere.
Ja̱je pa'ina,
ë̱mëje'e si'sire tsoa to̱ñere oco doye i̱ñoñe pa̱ji.
Coa ai jerepa de'oye cuasayere pañu'u cajë Maija'quëre se̱ñere i̱ñoji.
22 Maire huasoquë cato ma'tëmona mëni Maija'quë ëja te̱'tere pa'iji,
si'aohua'ire hui̱ñaohua'ire cui'ne cua̱ñe tutu pacohua'ire meñe cua̱ñequëpi.