2
Ja̱je pa'iye sëte si'aye co'ayere je̱ocojë̱'ë,
si'aye cosoyere,
coa cayere,
yecohua'i payere ëa ñañere,
cui'ne yecohua'ire co'a coca cayere je̱ocojë̱'ë.
2 Je̱oconi tsi̱ mañaja'a co̱asicohua'i oje yëyeje̱ pa'ye mësaruje̱ joyo pa'i cocare yëjë̱'ë,
huasosicohua'i ai de'oyere cajë.
3 Mësarupi Ëjaë de'oquërepa pa'iyere nuñerepa ña ti̱'asicohua'i pani ja̱je yëcohua'i pa'ijë̱'ë.
Cristo Api, Pa'iye Quë'i Quë̱na Pë
4 Ëjaëna tsio daijë̱'ë,
pa'iye pa'i quë̱na pëna,
pa̱i je̱ocosicona.
Ja̱je pa'iquëta'are Maija'quëre cato i̱ sahuasi quë̱na përe pa'ë,
jai do'i quë'io.
5 Ja̱je pa'ina,
mësaru i̱na tsioja̱ijë pa'iye quë'i quë̱na pë̱a de'ohuë.
De'orena,
Maija'quëpi joyo huë'e de'huapi,
mësarupi.
De'huaëna,
i̱se'ere necaija̱'cohua'i pa'iyë.
Pa'ijë Jesucristo do'ija̱'a ai yo'ojë i̱siyë,
Maija'quë sihuaquë ñañere.
6 Ja̱je pa'ina,
toyase'e caji:
Yë'ë sahuasicore pani,
de'o quë̱na përe pare Siónna o̱añë,
I̱ona quëco paquë cato coa quëco tayohuë caquë co'a ju̱'iñe pa̱sipi.
7 Ja̱je pa'ina,
ja̱ quë̱na përe i̱ore pao cajë asacohua'ire cato do'i quë'iorepa asa cua̱ñoji.
Ja̱je pa'iquëta'are,
toyase'e cayeje̱ pa'ye pa'iji,
ja̱je asama'cohua'ire cato.
Ja̱je pa'ina,
caji,
toyase'e ñeje:
Huë'e necohua'i je̱ocosi quë̱na pëpi
Yure cato si'a huë'e naupa quë̱na përepa de'o.
8 Cui'ne yecopi caji,
ñeje:
Asama'cohua'ipi ja̱ quë̱na pëna ju'ajëna,
i̱opi ne ta̱oja'coa.
Ja̱je pa'ina,
ja̱ohua'i cato Maija'quë coca sehuoma' do'ire ne huesëja̱'cohua'i a'ë,
i̱ ña nëose'eje̱ pa'ye.
Maija'quë Pa̱i Pa'iye
9 Mësaru cato i̱ sahuasi pa̱i a'ë.
Ëjaëre pase'ere necaija̱'a pa̱i a'ë.
Si'si peo daripë acohua'i a'ë.
Maija'quë tse̱cohua'ire pa'ë.
Ja̱je mësaru pa'iohua'i a'ë.
Ja̱je pa'ina,
mësarute nea hue̱'ñare pa'ijëna,
Maija'quëpi soipi,
mia hue̱'ñana etani Maija'quë de'oyerepa yo'ose'ere yecohua'ina quëaja̱jë caquë.
10 Ja̱'në cato mësaru i̱ pa̱i peocohua'i paë'ë.
Pa'isicohua'ipi yure cato i̱ pa̱i de'ohuë.
Ja̱'në mësarute Maija'quë teaye ñani co̱caiye pa̱pi.
Yure cato mësarute teaye ñaquë oi co̱caiji.
Maija'quëre Necaiyere Cajë Pa'ijë̱'ë
11 Maija'quë do'ijë,
mësarute se̱ñë,
mësaru ca̱pë yëyere sa'ro nëocaima'pë pa'ijë̱'ë caquë,
mai joñoa sa̱ñope uihuayere.
Mësaru cato iye yeja acohua'i peoyë.
Coa daisicohua'i a'ë.
12 Ja̱je pa'ina,
de'oyerepa yo'ojë pa'ijë̱'ë,
si'aohua'ire judío pa̱i peocohua'ireje̱.
Ja̱je mësarupi pa'ijëna,
yure mësarute sa̱ñope co'aye yo'ocohua'i a'ë casicohua'ipi mësaru de'oye yo'oyere ñani,
Maija'quëre de'oquëre papi caja̱'cohua'i a'ë,
i̱ohua'ire Maija'quë huaso mu'se ti̱'aëna.
13-14 De'oji.
Maija'quëpi nepi,
pa̱i ëjaohua'ire co'aye yo'ocohua'ire si'seja̱'cohua'ire,
de'oye yo'ocohua'ini de'ocohua'i a'ë caja̱'cohua'ire.
Ja̱je pa'ina,
mai Ëjaëre oi do'ire si'a pa̱i ëjaëre si'aohua'i jerepa pa'ire sëte de'oye sehuocaiye pa'iji.
Ja̱je cui'ne si'aohua'ire iye yeja pa̱i ëjaohua'ire de'oye sehuocaiye pa'iji.
15 Ja̱je pa'ina,
Maija'quë cato yëji,
mësarupi de'oye yo'ojë pa'ijëna,
huesëohua'ipi ta̱'ñe cuasama'cohua'ipi mësarute sa̱ñope ca ti̱'añe peoyere.
16 Jo'ya nesicohua'i peoyë,
mësaru.
Ja̱je pa'ina,
jo'ya nesicohua'i peoyë cajë co'ayere neñu'u cajë yo'oma'pë pa'ijë̱'ë.
Coa ai jerepa Diusu jo'yaohua'i a'ë cuasajë,
i̱ yëyere yo'ojë pa'ijë̱'ë.
17 Si'aohua'ire pa̱ire de'oye yo'ojë̱'ë,
ëjaohua'ire yo'oyeje̱ pa'ye.
Maija'quë do'ijëre oijë̱'ë.
Maija'quëre ca'rajë̱'ë.
Pa̱i ëjaëreje̱ de'oye yo'ojë̱'ë,
ëjaëre papi cuasajë.
Cristo Mai Yo'o Ja̱'ñere I̱ñoquë Ai Yo'opi
18 Co'amaña necaicohua'i,
mësaru ëjaohua'ire de'oye sehuocaijë pa'ijë̱'ë.
De'ocohua'ise'ere mësarute oicohua'ise'ere de'oye yo'oma'pë pa'ijë̱'ë.
Co'a ëjaohua'ireje̱ de'oye sehuojë yo'ojë̱'ë.
19 Ja̱je pa'ina,
de'oye a'ë,
mësaru de'oye yo'ojëta'are mësarute yecohua'ipi co'aye yo'ojëna,
ai yo'oyere quëcoye.
20 Ja̱je pa'iquëta'are mësarupi co'aye yo'ojë si'se cua̱ñojë quëcoto do'i peoji.
Ja̱je pa'iquëta'are mësaru de'oye yo'o do'ire ai yo'ojë quëcoye pani de'oye a'ë.
Do'i pa'iji,
Maija'quë ña hue̱'ña.
21 Ja̱re caquë mësarute Diusu soipi,
mësarupi Cristo mësaru do'ire ai yo'ose'ere ñani i̱ yo'ose'eje̱ pa'ye mësaruje̱ yo'oja̱jë caquë.
22 Cristo cato ti te'oreje̱ tayo neñe pa̱quë paji'i,
cui'ne pa̱ireje̱ cosoma'quë paji'i.
23 I̱te co'aye catoje̱ sa̱ñope cui'ne co'ayepi cama'quë paji'i.
A'si i̱te yo'o macaje̱ sa̱ñope icohua'ire sa̱isi'i cama'quë paji'i.
Coa ai jerepa Maija'quëna je̱opi,
ja̱ëpi pa̱i yo'oyere ña de'huaquëpi,
nuñerepa yo'oquëpi ña de'huaja̱quë caquë.
24 Cristopi si'aye mai co'aye yo'oye hue'oni sani cruzuna que̱ cua̱ñopi,
maipi co'aye yo'oyere ju̱'isicohua'ije̱ pa'ye pa'ijë nuñerepa yo'oyere huajëcohua'i pa'ija̱jë caquë.
I̱ a'si do'ipi mësaru huasosicohua'i pa'iyë.
25 Ja̱'në mësaru yëi ñama ne huesësicohua'ije̱ pa'iohua'ipi paë'ë.
Ja̱je pa'isicohua'ita'a yure cato Cristona co'irena,
i̱pi yëi ñamare ñacaiquë ñañeje ñaquë mësaru joñoaje̱ ñacaiji.