Sehuosicohua'ire Yëhuoye
5
Yë'ëje̱ sehuosicohua'i ëjaë'ë.
Ja̱je pa'ipi Jesucristo ai yo'oquëna,
ñasiquëpi yure yëhuoyë,
sehuosicohua'i ëjaohua'ire,
mësaru quë'ro pa'icohua'ire,
yë'ëje̱ i̱ohua'i ja̱'re co̱ni Jesús aye de'oyere pare jeteyo'je paja̱'quëpi.
2 Mësarupi ñacaija̱'cohua'i a'ë caquë Maija'quë mësaruna i̱sisicohua'i de'oye cuasajë yo'ojë̱'ë,
Maija'quë yëyeje̱ pa'ye.
Yo'oma'pë pa'ijë̱'ë,
cua̱ñe nëosi do'ire pa̱nita'a curiquëre ai yë do'ipi mësaru yë do'ire sihuajë nejë'ë,
co'amaña.
3 Cui'ne mësaru tse̱cohua'i a'ë cuasama'pë pa'ijë̱'ë,
mësaru ñajë pacohua'ire.
Coa ai jerepa i̱ohua'ini de'oye pani i̱ñojë'ë,
mësaru pa'iyere ñajë tuija̱'cohua'ire.
4 Ja̱je mësaru yo'onita'a yëi ñamare ñacaicohua'i Ëjaërepa dai maca de'o marore pare i̱si cua̱ñoja'cohua'i a'ë,
ti me'me tomema'coni,
cui'ne i̱ ayere de'oyere pare i̱ñoja'coni.
5 Ja̱je cui'ne mësaruje̱ po̱sëohua'ije̱ sehuosicohua'i ëjaohua'i cayere de'oye sehuocohua'i pa'ijë̱'ë.
Si'aohua'i pa̱i ñape yecohua'ire de'oye sehuocaijë dahuëre pa'ijë̱'ë.
Ja̱je pa'iye pa̱cohua'ire cato Diusupi sa̱ñope yo'oquë api,
jerepa pa'iohua'i a'ë cuasacohua'ire.
Ja̱je pa'iquëta'are dahuëre pa'icohua'ire cato de'oye yo'oquë i̱ oiyepi co̱caiquë api.
6 Ja̱je pa'iye sëte Maija'quë tutu quë'i Ëjaëre pa'ë cuasajë i̱ cua̱ñeñere sehuojë dahuëre pa'ijë̱'ë,
i̱pi mësarute jerepa tëto saisicohua'ire neja'quëre i̱ti yo'o maca ti̱'aëna.
7 Ja̱je pa'ina,
si'aye mësaru co'a ju̱'iñe Maija'quëna i̱sijë̱'ë,
mësarute oi ñacaiquëna.
8 Ñare pajë pa'ijë̱'ë,
sëtasicohua'ipi.
Mësarute sa̱ñope yo'oquë huati,
jai yaije̱ pa'ipi të'ija̱i mësarute co'equë cu'iji,
a̱si'i caquë.
9 Sa̱ñope i̱te quëco saojë̱'ë,
Maija'quë pa'iji nuñerepa cuasayepi.
Si'a hue̱'ña Maija'quë do'ijë pa'icohua'ije̱ cui'ne ai yo'oye pa'iquëta'are quëcoyë cuasajë mësaruje̱ quëcojë̱'ë.
10 Ja̱je coa nëhui tëcahuë ai yo'osi jeteyo'je Diusupi mësarute de'ocohua'ire nuñerepa pa'iohua'ire tutu quë'iohua'ire,
cui'ne ti̱'aja'cohua'ire pa'ë asacohua'ire nesipi,
maire ai oi Jesucristo ja̱'re tsioni pa'ijë ti caraja̱i ma'ñere de'oyere pare paja̱jë caquë soisiquëpi.
11 Ja̱ë api,
jerepa pa'i de'oquërepa ti caraja̱ima'quërepa.
Ja̱je pa'ija̱quë.
Pëpa Tëjiyerepa
12 Maija'quë do'iquë nuñe pa'iquë Silvanona toya cua̱ñohuë,
iye nëhui coca maña.
Iye toyase'e cato mësarute yëhuoye a'ë,
cui'ne care paye a'ë,
Maija'quë maire oi coa i̱sise'ere.
Ja̱je pa'ito o̱cue pa'i macarepa i̱tire tuijë pa'ijë̱'ë.
13 Babilonia sehuosicohua'i pa'icohua'ipi mësarute pëpa saoyë,
mësarute soise'eje̱ pa'ye Diusu soisicohua'ipi,
cui'ne yë'ë mamaquëje̱ pa'i Marcosje̱ mësarute pëpa saoji.
14 Pa̱i ñape yecohua'ire yo'jeire oiyepi oijë su'cuajë sihuajë pëpacaijë̱'ë.
Si'aohua'i Jesucristore pacacaicohua'i sëte,
i̱pi ñacaina,
jo'cua de'oye pa'ijë̱'ë.
Ja̱je pa'ija̱quë.