Jesús Cato Melquisedecje̱ Pa'i Api
7
Iquë Melquisedec cato Salem pa̱i ëjaë paji'i cui'ne Maija'quë ti ëjaërepa huë'e ñacai ëjaërepa paji'i.
Ja̱je pa'ipi Abrahamre yequë pa̱i ëjaohua'ire uihuaquë meñe quëconi co'iquëna,
Melquisedecpi sa̱ñope ti̱'ani i̱te Maija'quëpi ñacaija̱quë capi.
2 Ja̱ maca Abrahampi Maija'quë tse̱re Melquisedecna i̱sipi,
i̱ uihuaquë nese'ere.
Maija'quë tse̱ cato si'a jëña pa'ye nesicohua'ipi te'ore Maija'quëna i̱siye a'ë,
ja̱re i̱sipi.
Melquisedec cani cayë “Nuñerepa yo'o ëjaë” cajë,
Salem caye cato cayë,
“Jo'cua de'oye pa'iye” Ja̱je pa'ina,
jo'cua de'oye pa'iye ëjaë caye pa'iji,
“Salem Ëjaë” cani.
3 Pëca ja'quëre,
ja'core,
i̱ co'ye aiohua'ire i̱te co̱asi mu'se cui'ne i̱ ju̱'ise'e huesëyë,
ti quëase'e peoji.
Maija'quë mamaquëje̱ pa'i api,
Maija'quë huë'e ñacai ëjaë ti de'o huesësiquë api.
4 De'oji,
yure ñajë'ë,
Melquisedec cato ai ëjaërepa paji'i.
Ja̱je pa'ina,
mai ai Abrahampi pa̱i ëjaohua'ire uihuaquë se jiose'ere Maija'quë tse̱re Melquisedecna i̱sipi.
5 Jeteyo'je Moisés cua̱ñese'e cato caji coa Leví tsëcapë acohua'ise'e Maija'quë huë'e ñacai ëjaohua'ise'e Maija'quë tse̱ paye pa'iji,
pa̱i i̱si co'amaña.
Ja̱je pa'ina,
ja̱ohua'ise'e co'amaña se̱cohua'i a'ë,
i̱ohua'ije̱ pa'iohua'ini,
Abraham tsëcapë acohua'ini.
6 Ja̱je pa'iquëta'are Melquisedec cato Leví tsëcapë peoquëta'are Abrahampi Maija'quë ca nëose'e paquëpi,
Maija'quë tse̱re i̱sipi,
Melquisedecna.
I̱siquëna,
Melquisedec de'oyerepa caca'a̱ji'i,
i̱te.
7 Ja̱je pa'ina,
de'oye pa'i ja̱'ñe,
cacaiquë api,
jerepa pa'i.
I̱ti ca cua̱ñoquë cato huë'ehuë maca pa'i api iye cayere sa̱ñope ca ti̱'añe peoji.
8 Maija'quë tse̱re coa i̱sijëna,
pacohua'i cato ju̱'icohua'i a'ë.
Ja̱je pa'iquëta'are Melquisedecre cato toyase'e caji,
ja̱ yë'ta'a huajëquëre.
9-10 Ja̱je pa'ina,
Melquisedecpi Abrahamre sa̱ñope sani ti̱'a maca cato ja̱ jojoma'cohua'ipi,
si'aohua'i Abraham pa̱i pa'ija̱'cohua'ipi i̱ ca̱përe paë'ë.
Ja̱je pa'ina,
Abrahampi Melquisedecna sa̱isi maca yure co'amaña se̱cohua'ije̱ si'aohua'i Leví tsëcapë acohua'ije̱ si'a jëña neni te'ore Maija'quëna i̱siyere sa̱ihuë.
11 Maija'quë huë'e ñacai ëjaohua'i levitas tsëcapë quëayeja̱'a Israel pa̱i asahuë,
cua̱ñese'e.
Ja̱ohua'i cato Aarón tsëcapë acohua'i paë'ë.
Ja̱je pa'ina,
yure ja̱ohua'ipi cua̱ñese'e sehuojë yo'ocohua'ini nuñe pa'icohua'ire necaicohua'i pa'ito,
Melquisedecje̱ pa'ipi daiye pa̱ra'pi Aarón tsëcapë peoquëpi.
Ja̱je pa'iquëta'are yure cato yequëpi daji'i,
Maija'quë huë'e ñacai Ëjaë.
12 Ja̱je pa'ina,
Maija'quë ñacaiye yequëni neni cui'ne yeque cua̱ñese'eje̱ po̱nañe paji'i.
13 Ja̱je pa'ina,
mai Ëjaëni toyase'e caji,
ñeje:
“Yequë Israel pa̱i tsëcapë aquë api.
Maija'quë huë'e ñacai ëjaohua'i de'oma' tsëcapë aquë api.”
14 Ja̱je pa'ina,
Maija'quë huë'e ñacai ëjaohua'i pa'i ja̱'ñe ca maca,
Moisés ti cama'ë pa'isi tsëcapëja̱'a,
mai Ëjaë cato daji'i,
Judá tsëcapëja̱'a.
Ja̱je yo'ose'ere si'aohua'i mai asayë.
15-16 Yureta'a pa̱i cua̱ñeñeja'a daima'quëpi,
huajëquëpi daji'i,
Maija'quë huë'e ñacai Ëjaëre papi,
Melquisedecje̱ pa'ipi,
i̱ pa'iye ti nejo ti̱'añe peo tuturepa paquëpi,
iyepi maire ai ti̱ñarepa asa cua̱ñoñe quëaji.
17 Ja̱je pa'ina,
daisiquë ayere Maija'quë coca toyase'e caji,
ñeje:
Më'ë a'ë,
Maija'quë huë'e ñacai Ëjaërepa ti pani huesëquërepa
Melquisedecje̱ pa'i.
18 Ja̱je pa'iye sëte ja̱'në cua̱ñese'ere tutu peoyere cui'ne co̱cai ma'ñere cui'nare yo'o co̱ ma'ñe ne huesopi.
19 Ja̱je pa'ina,
Moisés cua̱ñese'e cato nuñe pa'icohua'ire ne ti̱'a ma'ñe pa'iji,
pa'ise'ere.
Yure cato ai jerepa de'oyere payë,
mai utejë pa'iye.
Ja̱pi Maija'quëna tsioja̱iñe necaji'i,
maire.
20 Jesure cato Maija'quëpi ca nëo huesopi.
Ja̱je pa'iquëta'are yecohua'i Maija'quë huë'e ñacai ëjaohua'ire cato coa hue'yosicohua'i paë'ë,
ti ca nëoñe peoye.
21 Ja̱je pa'ina,
Ëjaëre cato ca nëo huesoquë capi,
toyase'ena ñeje.
Ëjaë ca huesose'e po̱nëñe peoji.
Më'ë a'ë,
yë'ë huë'e ñacai Ëjaërepa ti pani huesëja̱'quë.
Melquisedecje̱ pa'i.
22 Ja̱je pa'ina,
Jesu api,
iye huajë ca nëose'ere ti caraja̱i ma'ñere de'oyerepa necaiquë,
ja̱'në ca nëose'e se̱ña maca de'oyerepa.
23 Jai pa̱i paë'ë,
yecohua'i Maija'quë huë'e ñacaicohua'i ju̱'ijë caraja̱icohua'i sëte.
24 Ja̱je pa'iquëta'are Jesús cato ti ju̱'ima'quë sëte Maija'quë huë'e ñacaiye yequëna se je̱ocaiye peoji.
25 Ja̱je pa'i do'ire Maija'quëna tsioja̱icohua'ire,
ti pani huesëja̱'cohua'ire huasoji.
Cui'ne ti pani huesëquë sëte ja̱ohua'i pa'iyere caquë Diusure se̱cacai pa'iji.
26 Ja̱je pa'ina,
Jesús cato mai yësiquëre papi,
Maija'quë huë'e ñacai Ëjaërepa.
Ja̱ë cato de'oquë api,
ti co'aye peoquë api,
cui'ne si'si te̱'ña mañaje peoquë api.
Ja̱je pa'ipi co'aye yo'ocohua'ire tsioma'quë api.
Ja̱je pa'ini ma'tëmo pa'iye jerepa pa'ire nesiquë api.
27 Yecohua'i Maija'quë huë'e ñacai ëjaohua'i cato si'a mu'señapi nëicohua'ire huaijë,
du'ru macarepa i̱ohua'i co'aye yo'o do'ire ëojë i̱sijë Maija'quëre se̱ni to̱ni jeteyo'je pa̱i co'aye yo'oyere ëojë i̱sijë se̱cacaicohua'i a'ë.
Ja̱je pa'iquëta'are Jesús cato te'ere papi i̱ ca̱pë ai yo'o do'ipi Maija'quëre i̱si tëjipi.
28 Moisés cua̱ñese'e cato hue'yopi,
caraja̱icohua'ini Maija'quë huë'e ñacai ëjaohua'i pa'ija̱'cohua'ire.
Ja̱je pa'iquëta'are cua̱ñese'e jeteyo'je Maija'quë ca nëose'epi hue'yopi,
Maija'quë huë'e ñacai Ëjaëre i̱ mamaquëni,
nuñerepa de'oquëni,
ti pani huesëquëni.