Jesupi Maija'quë Huajë Ca Nëose'eja̱'a Cacaiquë Api, Maire
8
Si'aye yëquë case'e ëjarepa iye a'ë.
Payë,
Maija'quë huë'e ñacai Ëjaëre pare,
Maija'quë ñu'ico ëja te̱'tere ñu'ina,
jeto ma'tëmore.
2 Pa̱i nema' huë'ere pa'iji,
i̱ore pani,
Maija'quë nesi huë'ere,
ja̱rote pa'i Maija'quë huë'e ñacai Ëjaë sëte,
Maija'quë huë'e ñacai pa'iji.
3 Maija'quë huë'e ñacai ëjaohua'i cato,
Maija'quëna i̱sise'ere i̱sijë,
cui'ne nëicohua'ire huani ëojë se̱ja'cohua'ini nesicohua'ipi pa'iyë.
Ja̱je pa'ina,
Jesucristoje̱ i̱ i̱si ja̱'ñe paye pa'iji.
4 Ja̱je pa'ina,
i̱pi iye yejare pa'iquë pani Maija'quë huë'e ñacai Ëjaë de'oye pa̱ra'pi,
tsoe Moisés cua̱ñese'eje̱ pa'ye yo'ojë i̱sicohua'ipi Maija'quë huë'e ñacaicohua'i jai pa̱i pa'ito me pa'iquë'ni.
5 I̱ohua'i cato ca̱'nipi nesi huë'ena Maija'quë ayere necaicohua'i a'ë,
ma'tëmo pa'iye ayere cuasajë yo'o co'amañapi,
pa̱i to'ouje̱ pa'yepi.
Ja̱je pa'ina,
Moisés huë'ere ne huëo maca Maija'quëpi capi,
i̱te:
“Yë'ë më'ëre jeto ai cu̱tihuë i̱ñose'eje̱ pa'iore nejë'ë.”
6 Ja̱je pa'iquëta'are mai Ëjaë Jesucristo Maija'quë huë'e ñacai Ëjaërepa cato,
ja̱ohua'i yo'ose'e se̱ña maca de'oyere pare yo'oquë pa'iji,
huajë cuasa nëose'ere.
Ja̱ huajë ca nëose'e cato,
de'oyere pare i̱sija̱'a co'amaña quë'ye a'ë.
Ja̱'në ca nëose'e se̱ña maca pa'ye a'ë.
7 Du'ru macarepa ca nëose'epi nuñerepa yo'oye pa'ito ti̱jupë yeque ca nëoñe peora'pi.
8 Ja̱je pa'ina,
Maija'quëpi nuñe yo'oma'cohua'ire pa̱ire ñani capi:
Yequë mu'seña Israel pa̱ire,
cui'ne Judá tsëcapëre huajëye yo'o ja̱'ñe ca nëoñe pa'ija̱'coa.
9 Jeto Egípto yejapi mësaru aipëre jë̱tëna tse̱ani etoni sa maca,
ca nëose'eje̱ pa'ye ca nëoñe peosipi:
ja̱ohua'ire cato yë'ë ca nëose'e de'oye sehuocaiye pa̱si do'ire je̱ocohuë,
caji,
Ëjaëre papi.
10 Ja̱ mu'seña tëto sai maca Israel pa̱ire yë'ë ca nëo ja̱'ñe iye a'ë caji,
Ëjaërepa.
I̱ohua'i cuasa hue̱'ñana yë'ë cua̱ñeñere tëocasi'i,
cui'ne i̱ohua'i joñoana toyasi'i,
ja̱ maca yë'ë pa'ija̱'quë a'ë,
i̱ohua'i Diusu
cui'ne i̱ohua'i pa'ija̱'cohua'i a'ë,
yë'ë pa̱i.
11 Ja̱ maca cato tsi̱ mañaje cui'ne aiohua'ije̱ si'aohua'i yë'ë coca asacohua'ise'e pa'ija̱'cohua'i a'ë.
Ja̱je pa'ijëna,
mai Ëjaë cocare asajë̱'ë,
cajë yecohua'ipi cajeohua'ipi,
pa̱nita'a te'e tsëcapë acohua'ipi ye'yañu'u cajë yo'oye peosipi,
tsoe yë'ëre i̱re pani pa̱i ñape asa do'ire.
12 Cui'ne yë'ëpi i̱ohua'i co'aye yo'ose'ere oni yejecani ti hua̱nëyeja̱'quë a'ë,
cui'nare cuasa co̱ñe peoyerepa.
13 Ja̱je pa'ina,
huajëyere Maija'quëpi ca nëoni,
du'ru ca nëose'ere ai co'amaña'ë caji.
Ja̱je pa'ina,
ai co'amaña cato peo hue̱'ña esa caraja̱ni huesë ja̱'ñe a'ë.