5
Pa̱i ñape Maija'quë huë'e ñacaicohua'i cato ë̱mëohua'i acohua'ini sahuani i̱sicohua'ipi pa'iyë.
Ja̱ohua'i cato Maija'quë ña hue̱'ñare pana pa̱ire cacaija̱'cohua'ipi pa'iyë.
Cui'ne pa̱i co'aye yo'o do'ire Maija'quëna coa i̱sijë cui'ne hua'ire ëojë se̱cacaija̱'cohua'ipi.
2 I̱pi ca̱pë tutu peoye asaquëpi Maija'quë huë'e ñacaiquë cato huesëohua'ire cui'ne tayo saicohua'ire yo'o jujama'ë quëcoquë necaiye pa'iji.
3 Ja̱je pa'ina,
i̱ tutu peoquë tayoyere coquë cui'ne pa̱i tayoyere caquë ëoquë se̱ñe pa'iji,
sa̱i de'hua cua̱ñoñere caquë.
4 Ja̱je pa'ina,
te'ije̱ cuasaye peoji,
yë'ë a'ë,
Maija'quë huë'e ñacai ëjaërepa.
Maija'quëpi Aarónre nese'eje̱ pa'ye soini ëjaëre nesiquëre me ja̱je cuasaye'ni.
5 Ja̱je pa'ina,
Cristore Maija'quëpi Ëjaëre nepi.
I̱ co'ye Maija'quë huë'e ñacai ëjaë pasi'i cani ëjaë de'oma'ë paji'i.
Ja̱je pa'ina,
Maija'quëpi capi,
ñeje:
Iye mu'se yë'ëpi më'ëre pa'iye i̱sihuë,
më'ë a'ë,
yë'ë mamaquë.
6 Yequeje̱ caji,
toyase'e i̱te:
Më'ë a'ë,
Maija'quë huë'e ñacai Ëjaërepa pani huesëquërepa,
Melquisedecje̱ pa'i.
7 Iye yeja Cristo pa'i maca ai teaye tutu caquë Maija'quëre se̱ji'i,
otare paque oi,
Maija'quëpi ju̱ni huesësicohua'ire huëo tutu paquëre asaquë.
Ja̱je se̱ina,
i̱ de'oye sehuocai do'ire Maija'quëpi i̱ se̱ñe asacaji'i.
8 Cristo Maija'quë mamaquëta'a i̱ ai yo'oyeja̱'a ye'yepi,
Maija'quëre de'oye sehuocaiye.
9 Ja̱je yo'oquë ti de'oquërepa de'oni,
si'aohua'ire i̱te de'oye sehuocaicohua'ire ti pa'iyena huasoquërepa de'opi.
10 De'ouna,
Maija'quëpi i̱te i̱ huë'e ñacai Ëjaëre pare nepi,
Melquisedecje̱ pa'ire.
11 Jaiye iye ayere caye pa'iquëta'are airepa jëaji,
me quëa ti̱'añe'ni,
mësarupi asaye coeto.
12 Tsoe mësaru yecohua'ire se ye'yacohua'irepa pati'ñe pa'iohua'ipi ja̱ yë'ta'a a̱'jiñe mañare Maija'quë coca du'ru ayere ye'yajëna,
asacohua'i maña pa'iyë.
Mësaru cui'naohua'ipi tutu peocohua'i maña co'i huesëni ojese'e u̱cucohua'i maña pa'iyë,
tsoe jëayere a̱ti'ñe pa'iohua'ipi.
13 Ja̱je ojese'e u̱cujë pa'icohua'i cato tsi̱tu'uje̱ pa'iohua'i a'ë,
ti co'aye cui'ne de'oye asa ti̱'ama'cohua'i a'ë.
14 Jëa a̱o cato aiohua'i a̱iñe a'ë,
si'aye ta̱'ñe co'aye cui'ne de'oye asacohua'irepa.