4
Maija'quë pëa huajë hue̱'ñana cacaye ca nëose'e pa'iji.
Ja̱je pa'ina,
ca'rajë de'oyerepa ñañu'u,
mësaru acohua'ipi tsoe caraja̱ji cajë ja̱ pëa huajëyere ti̱'añe pama'cohua'ini cajë.
2 Ja̱ohua'ire huaso coca quëase'eje̱ pa'ye cui'ne maire quëahuë.
Ja̱je pa'iquëta'are ja̱ohua'ipi Maija'quëre pa'ire paji cuasa ti̱'añe pa̱huë.
Ja̱ do'ire co̱caiye pa̱pi,
huaso coca asase'e.
3 Ja̱je pa'iquëta'are mai pa'iji cuasasicohua'i cato pëa huajë hue̱'ñana cacaja̱'cohua'ipi pa'iyë.
Ja̱ ayere Maija'quë ñeje ca nëopi:
Ja̱ do'ire ja̱ohua'ire,
yë'ëpi pë̱i ca nëohuë,
cacaye pa̱ja'cohua'i a'ë,
yë'ë pëa huajë hue̱'ñana.
Maija'quë cato iye yeja de'hua tëjisi macapi pëa huajë huëopi.
4 Ja̱je pa'ina,
yequë hue̱'ña toyase'e caji,
ñeje siete mu'se ayere:
Diusu siete mu'se acona pëa huajëpi,
si'a co'amaña ne tëjini.
5 Toyase'e ti̱jupë ca co̱ji:
Yë'ë pëa huajë hue̱'ñana cacaye pa̱ja'cohua'i a'ë.
6 Ja̱je cani caji,
ja̱ yë'ta'a yecohua'i cacaye pa'iji,
pëa huajë hue̱'ñana caquë.
Du'ru macarepa huaso coca asasicohua'i cato,
i̱ohua'i de'oye i̱te i̱re papi cuasama'pë sehuocaiye pa̱si do'ire cacaye pa̱huë.
7 Ja̱je pa'ina,
Maija'quëpi ti̱jupë yequë caca mu'se pa'ija̱quë ca nëopi.
Iye mu'se i̱ti mu'se a'ë,
caquë.
Ja̱je pa'ina,
Maija'quë maire caji,
David tsoe hue̱'ña caquë pa'ise'eja̱'a ja̱ toyase'epi caji,
ñeje:
Iye mu'se Maija'quë caye asasicohua'i pani
jëa joñoa nema'pë de'oye sehuojë pa'ijë̱'ë.
8 Ja̱je pa'ina,
Josuépi Israel pa̱ire pëa huajëye i̱sisiquë pa'ito Maija'quë ti̱jupë yequë mu'se pa'i ja̱'ñere caye pa̱'rapi.
9 Ja̱je pa'ito ja̱ yë'ta'a pa'iji,
Maija'quë pa̱i cacani pëa huajë ja'ye.
10 Ja̱je pa'ina,
Maija'quë pëa huajë hue̱'ñana cacaquë cato co'amañare ne tëjini pëa huajësi'quë cacaji,
Maija'quë co'amaña ne tëjini pëa huajëse'eje̱ pa'ye.
11 Ja̱je pa'ina,
mai tutu yo'oye pa'iji,
ja̱ro pëa huajë hue̱'ñana cacañu'u cajë,
tsoe ja̱'në acohua'i Maija'quëre coca nuñere pa'ë cuasama'pë yo'ose'ena tuiye pa̱ñu'u.
12 Maija'quë coca cato pa'iye a'ë cui'ne tutu quë'ye a'ë,
si'a te̱'ña hua'ti niusico jë̱jësë̱ñe se̱ña maca jë̱jësë̱ñe a'ë.
Ja̱je pa'yepi pa̱ise'e cuasaye cui'ne mai joñoa sa̱'nahuërepa cuasayena jo timeñe a'ë.
Ja̱je yo'oquë mai cuasayere cui'ne mai yo'oñu'u cuasayere ti̱ña macare pana eto i̱ñoñe a'ë,
joyo cuasayere.
13 Ja̱je pa'ina,
peoji,
Maija'quë de'huase'epi i̱te catiye.
Si'aye mai yo'oye ti̱ña macare pare pa'iji,
i̱ ña hue̱'ñare.
Ja̱je pa'ina,
i̱na si'aohua'i yo'ose'e i̱ñoja'quë a'ë.
Jesu Api, Maija'quë Huë'e Ñacaicohua'i Ëjaërepa
14 Jesu api,
Maija'quë mamaquë Maija'quë huë'e ñacaicohua'i Ëjaërepa,
mai mëñe quëco pajë pa'iquë.
Ja̱ëpi Maija'quë ña hue̱'ñare pare cacani pa'iji.
Ja̱je pa'ina,
mai i̱te ti̱'añu'u cajë yo'oyere je̱oma'pë o̱cue pa'i macarepa yo'ojë pañu'u.
15 Maija'quë huë'e ñacai Ëjaëre papi mai tutu peoye teaye ñani co̱casipi,
mai ai yo'oyeje̱ pa'ye si'aye neñañe pa'ina,
ai yo'oquë tëto saisiquëpi.
Ja̱je pa'iquëta'are ja̱ë cato co'aye ti yo'oma'ë paji'i.
16 Ja̱je pa'iye sëte quëcojë tsioja̱ñu'u,
maire oiquë Diusu ñu'i hue̱'ñana,
i̱pi maire teaye ñani oi co̱caija̱'quëre de'oyepi mai ai yo'o maca ti̱'aëna.