2 Ja̱je pa'ina,

tsoe mësarupi asayë,

mai Ëjaë cua̱ñe tutupi yëquë ye'yajë quëase'e,

mësaru yo'o ja̱'ñere.

3 Maija'quë sihuaquë ñañe iye a'ë,

i̱ tse̱cohua'irepa pa'ijë yequë nomiore pa̱nita'a yequë ë̱mëre ti yo'oma'pë pa'iye a'ë.

4 Pa̱i ñape nëjohua'ire pajë,

de'oyerepa pa'ijë,

i̱ohua'ire ëjaohua'ire ñajë paye a'ë.

5 Maija'quëre sehuoma'cohua'i yo'oyeje̱ pa'ye yo'oma'pë pa'ijë̱'ë,

tëto saiperepa ëaye nëiñepi cui'ne co'aye yëyepi airepa pa'i do'ire.

Ja̱je pa'ina,

6 Maija'quë do'iquëre ti i̱ paye jo̱sa yo'ocaima'pë pa'ijë̱'ë,

iye yë'ë quëase'e aye.

Ja̱je yo'ocohua'ire,

mai Ëjaëpi tuturepa sa̱ija'quë api,

yëquë mësarute yo'o ma'ñe a'ë quëase'eje̱ pa'ye.

7 Ja̱je pa'ina,

Maija'quë maire soima'ë paji'i,

si'sire yo'ojë pa'ija̱'cohua'ini.

Coa ai jerepa i̱na i̱sisicohua'ipi pa'ija̱'cohua'ini soipi.

8 Ja̱je pa'ina,

iye ye'yayere pa̱ipi co'aye a'ë cajë asaye coecohua'i pani,

pa̱i i̱ti ye'yacohua'ini coema'pë pa'iyë,

Maija'quëni coeyë,

mësarute i̱ de'o joyo i̱sisiquëni.

9 Tsoe Maija'quëpi mësarute sa̱'ñe oijë pa'iye ye'yasi do'ire,

Maija'quë do'ijëja̱'a sa̱'ñe oijë pa'iye aye toyaye pa̱ñë.

10 Ja̱je pa'ina,

mësaru si'aohua'ire Maija'quë do'ijëre Macedonia pa'icohua'ire oijë pa'iyë.

Ja̱je pa'iquëta'are jero sa'na ai pa̱ire oiyepi mësarute pa'ija̱quë cajë cua̱ñeñë.

11 Yecohua'ire jo̱sa yo'oma'pë de'oye pa'ijë̱'ë,

mësaru co'amañare pase'e nejë.

Yëquë cua̱ñese'eje̱ mësaru jë̱ñapi nejë pa'ijë̱'ë.

12 Ja̱je pa'ijëna,

sehuoma'cohua'ije̱ mësarute ëjaohua'ire ñaja'cohua'ire,

cui'ne mësarute carayeje̱ peoja̱'core.

13 Maija'quë do'ijë,

sehuoma'cohua'i cato ju̱'isicohua'i huëiye peoji cuasacohua'ipi ai oiyë.

Ja̱je pa'ina,

mësarupi ja̱ohua'i oiyeje̱ ju̱'isicohua'ire ai oima'cohua'ini caquë,

ju̱'isicohua'ire yo'oye quëasi'i.

14 Jesús ju̱'isiquëpi huëji'i,

mai asayeje̱ pa'ye,

cui'ne pa'ye Maija'quëpi si'aohua'ire Jesure sehuoni ju̱'isicohua'ire Jesús ja̱'re co̱ni daja̱'quë api.

15 Ja̱je pa'ina,

cayë,

mësarute mai Ëjaë ayere ye'yaye sëte.

Mai huajëcohua'i Ëjaë dai maca pa'icohua'i ju̱'isicohua'ire du'ru tëto saiye pa̱ja'cohua'i a'ë.

16 Ja̱re i̱pi mai Ëjaë ma'tëmopi cua̱ñequë yë'ore papi,

tutu quë'ipi,

cui'ne hui̱ñaohua'i Ëjaërepa yë'opi,

cui'ne Maija'quë duruhuëpi co̱ni jui maca cajeja̱'quë api.

Ja̱ maca Cristore sehuoni ju̱'isicohua'ipi du'ru huëija̱'cohua'i a'ë.

17 Huëtena,

ja̱ maca mai huajëcohua'ipi huëisicohua'i ja̱'re co̱ni mëijë peo de'otona,

siri quë'rona sa̱ñope ti̱'aja'cohua'i a'ë,

Ëjaëre pare.

Ti̱'ani i̱ ja̱'re co̱ni ti pa'ija̱'cohua'i a'ë.

18 Ja̱je pa'ina,

iye cocare sa̱'ñe cajë yo'o jujahuë cuasacohua'ire tutu i̱sijë̱'ë,

jerepa sihuajë yëjë yo'oja̱'cohua'ire.