5
I̱ti daija̱'a mu'se cui'ne i̱ti tëcahuë toyaye pa̱ñë,
Maija'quë do'ijë.
2 Tsoe mësarupi asayë,
mai Ëjaë dai mu'se cato co'amaña i̱maquë ñami daiyeje̱ pa'ye dasipi.
3 Pa̱i de'oji jo'cua pa'ire payë,
si'aye de'oji ca maca coa nejoñepi ti̱'asipi,
ja̱ohua'ire,
nomio tsi̱ co̱a huëocona,
a'si huëoyeje̱ pa'ye.
Ja̱ maca jëaye peoji.
4 Maija'quë do'ijë,
mësaru cato nea hue̱'ñare pa'ima'pë pa'iyë.
Co'amaña ñaë yo'oquëna,
ña quëquëyeje̱ pa'ye mai Ëjaë da ti̱ta mu'se,
ña quëquëye.
5 Si'aohua'i mësaru mia hue̱'ña acohua'i a'ë,
mu'se acohua'i a'ë.
Ñami cui'ne neañe acohua'i peoyë.
6 Ja̱je pa'ina,
mai ca̱iñe peoji,
yecohua'i yo'oyeje̱.
Coa ai jerepa sëtasicohua'ipi nuñerepa pa'iyere ñajë pañu'u.
7 Ja̱je pa'ina,
ca̱icohua'i ca̱iñë,
ñami.
Cui'ne co̱no cuepecohua'i cuepeyë,
ñami.
8 Ja̱je pa'iquëta'are mai mu'se acohua'i cato ñare pajë nuñere pare tayo ma'ñere pa'iye pa'iji.
Maija'quë pa'ire paji cuasayena cui'ne pa̱ire oiyena su̱ñani,
soldado i̱ coti saihuë quë̱na ca̱ñapi su̱ñani jëayeje̱ pa'ye,
cui'ne huaso tëjisicohua'i pa'i ja̱'ñere uteyena,
soldado quë̱na mapë pu̱ani jëayeje̱ pa'ye jëañu'u.
9 Maija'quë nejoja'cohua'ini maire soima'ë paji'i.
Coa ai jerepa mai Ëjaë Jesucristo do'ipi huasosicohua'i pa'ija̱jë caquë soipi.
10 Ja̱je pa'ina,
Jesucristo mai do'ire ju̱cacaji'i,
maipi i̱ ja̱'re co̱ni ju̱'isicohua'i panije,
cui'ne huajëcohua'i pa'inije pa'ija̱jë caquë.
11 Ja̱je pa'ina,
pa̱i ñape yecohua'ire tutu i̱sicaijë,
yo'o jujahuë cuasacohua'ire jerepa yëjë yo'oye necaijë̱'ë.
Noni ja̱je yo'ojë pa'icohua'i sëte.
Pablo Yëhuose'e Sehuosicohua'ire
12 De'oji,
yure mësarute Maija'quë do'ijëre se̱ñë,
mësaru ja̱'re pa'ijë co'amaña nejë.
Iyere yo'ojë̱'ë cajë,
cui'ne yëhuojë,
mai Ëjaë yëyeje̱ yo'ojë mësarute sacohua'ire,
mësarupi ëjaohua'ire ñañe pa'iji,
caquë.
13 Ja̱je pa'ina,
mësarute i̱ohua'i necai do'ire cuasajë ai oijë ëjaohua'ire ñajë pajë̱'ë.
Pa̱i ñape sa̱'ñe de'oye yo'ojë,
jo'cua pa'ijë̱'ë.
14 Cui'ne Maija'quë do'ijë cua̱ñeñë,
mësarute,
neñe jo̱sa coecohua'ire yëhuojë̱'ë,
caquë.
Cui'ne yo'o jujahuë cuasacohua'ire co̱caijë̱'ë,
Jesús yo'oyere jerepa yëjë yo'oja̱'cohua'ire,
cui'ne co̱caijë̱'ë,
Maija'quëre cuasaye tutu peocohua'ire.
Si'aohua'ire de'oye cuasajë dahuëre yo'ojë co̱caijë pa'ijë̱'ë.
15 De'hua ñajë pa'ijë̱'ë,
te'ije̱ yequëpi co'aye yo'ouna,
cui'ne co'ayepi sa̱isi'i caquë yo'oma'ë pa'ija̱quë,
coa ai jerepa sa̱'ñe de'oye yo'ojë pa'ijë,
cui'ne si'aohua'ire yecohua'ire de'oye yo'oyere cuasajë̱'ë.
16 Si'anë sihuacohua'i pa'ijë̱'ë.
17 Si'anë Maija'quëre se̱jë pa'ijë̱'ë.
18 Si'aye mësarute daiye Maija'quëna yëye a'ë.
Ja̱je pa'ina,
de'oji cajë Maija'quëre pëpajë̱'ë,
Cristo Jesure sehuocohua'i sëte.
19 Toa yayoyeje̱ pa'ye yo'oma'pë pa'ijë̱'ë,
Maija'quë joyo pa'iyere.
20 Cui'ne coecaima'pë pa'ijë̱'ë,
Maija'quëre quëacaicohua'i caye pa'ito.
21 Asani si'aye nuñere pa'ni i̱ti cajë neñani de'oyese'e de'huajë̱'ë.
22 Si'aye co'aye yo'oma'pë pa'ijë̱'ë.
23 Ja̱re i̱pi Maija'quëpi,
jo'cua de'oye pa'iye paquëpi,
mësarute nuñerepa de'ocohua'ire necaija̱quë,
necani mësaru pa'iye si'aye joyo,
cuasaye cui'ne ca̱pë ti si'si te̱'te peocohua'ire pare ñacai paja̱quë mai Ëjaë Jesucristo dai mu'sere caquë.
24 Mësarute soisiquë ti tayoma'quë api.
Ja̱je pa'ina,
i̱ case'eje̱ pa'ye ne ti̱'aja'quë api.
Pëpa Tëjiye
25 Maija'quë do'ijë,
yëquëre Maija'quëre se̱cacaijë̱'ë.
26 De'oye sihuayepi sihuajë,
pëpacaijë̱'ë,
si'a sehuosicohua'ire.
27 Mai Ëjaë cua̱ñequërepa do'ipi ca nëoñë,
mësarute,
iye toya ja'hua si'aohua'ire Maija'quë do'ijëre ña asojë̱'ë caquë.
28 Mai Ëjaë Jesucristopi mësaruna i̱ coa necaiyepi yo'oquëna,
pa'ijë̱'ë.