3
Mësarute cuasayepi quëcoye peoyena,
te'i Atenasna pëasi'i cuasahuë.
Cuasani pëaquë
2 Timoteore Maija'quë do'iquëre Cristo huasoquë coca quëaquëre jëjo saohuë,
ja̱ëpi mësarute tutu i̱sicai cui'ne mësaru Maija'quë pa'ire paji cuasayere jerepa paye necaija̱quë caquë.
3 Necaina,
mësaru acohua'ipi te'ije̱ ai yo'oye pa'itoje̱ yo'o jujama'pë pa'ija̱jë caquë jëjo saohuë.
Ja̱je pa'ina,
tsoe mësarupi asayë,
mai ja̱je ai yo'o ja̱'ñe pa'iye.
4 Iyere mësarute quëahuë,
maire ai yo'oye pa'ija̱'coa cajë.
Mësaru ja̱'re yëquë pa'i maca,
i̱ti case'epi ai yo'oye ti̱'api,
mësaru asase'eje̱ pa'ye.
5 Ja̱je pa'ina,
quëcoyepi peoquëna,
Timoteore jëjo saohuë,
mësaru Maija'quëre pa'ire paji cuasajë pa'iyere se̱ni asaja̱'quëre.
Yeque huatipi co'aye yo'oyena ne ta̱ouna,
yëquë mësarute quëase'epi do'i peoye pa'ima'quë caquë jëjo saohuë.
6 Yure Timoteo mësaru quë'ropi co'ini quëapi,
mësaru de'oye Maija'quë pa'ire paji cuasajë cui'ne yecohua'ire oijë pa'iyere.
Cui'ne quëapi,
mësaru yëquëre yëjë cuasajë pa'iyere.
Cui'ne yëquë mësarute ña ëaquëna,
pa'iyeje̱ cui'ne mësaruje̱ yëquëre ña ëaquëna,
pa'iyë quëapi.
7 Maija'quë do'ijë,
yëquë co'a ju̱'ijë cui'ne ai yo'ojë pa'icohua'ini,
mësaru o̱cue pa'i macarepa Maija'quë pa'ire paji cuasajë pa'iyere quëaquëna,
asani sihuahuë.
8 Mësaru ja̱je Ëjaëre o̱cue pa'i macarepa tuiyere asarena,
yëquëre huajë pa'i huëose'eje̱ pa'yerepa nëiji.
9 ¿Ja̱je pa'ina,
me Maija'quëre cajë pëpaye'ni mësaru necaiyere ai sihuayere yëquë joñoana ta'ye saise'erepa pani Maija'quë ña hue̱'ñana?
10 Mu'señapi cui'ne ñamiñapi Maija'quëre se̱ñë,
jëjo saojë̱'ë cajë,
mësarute sani ñajë mësarute Maija'quë pa'ire paji cuasaye caraye si'aye ne ti̱'acañu'u cajë.
11 Maija'quëpi cui'ne mai Ëjaë Jesucristopi co̱caija̱quë yëquë mësaru quë'ro do'i sai ja̱'ñe.
12 Ja̱re i̱pi mësarute pa̱ire oiye cui'ne sa̱'ñe ai oijë pa'iye necaija̱quë,
yëquë mësarute oiyeje̱ pa'ye oija̱'cohua'ire.
13 Ja̱re i̱pi mësarute,
mësaru joñoana o̱cue pa'i macarepa cuasajë pa'iye nejaquë.
Nequëna,
de'ocohua'irepa pa'ijë̱'ë,
co'aye yo'o do'i peocohua'ire papi,
Maija'quë Diusu ña hue̱'ñana,
mai Ëjaë Jesucristo i̱ tse̱cohua'i de'ocohua'irepa ja̱'re dai maca.