Pablo Tesalonicenses Yo'ose'e
2
Maija'quë do'ijë,
mësarupi tsoe asayë,
yëquë mësaru quë'ro do'i saini coa noni cu'iye pa̱se'e.
2 Ja̱je pa'ina,
mësarupi tsoe asayë,
yëquë ja̱'në Filiposna ai yo'ose'e,
co'acohua'i a'ë cajë jo̱sa yo'ojëna.
Ja̱je pa'iquëta'are Maija'quëpi co̱caina,
quëcojë Maija'quë de'o coca quëahuë,
mësarute,
jaiye tutu sa̱ñope yo'oye pa'itoje̱.
3 Ja̱je pa'ina,
yëquë yëhuojë soiye cato coa tayose'e peoji.
Si'sije̱ peoji.
Cui'ne coa pa̱ini cosoñu'u cajë cayeje̱ peoye a'ë.
4 Coa ai jerepa Maija'quëpi i̱ de'o cocare quëaja̱'cohua'i a'ë caquë ñani sahuani nesicohua'ipi cayë.
Pa̱ini de'oye yo'o i̱ñoñu'u cajë yo'oma'pë pa'iyë.
Coa ai jerepa Maija'quëre pani yëquë joñoa cuasaye ñaquëni cajë yo'oyë.
5 Ja̱je pa'ina,
Maija'quë cui'ne mësaru pa'iyë,
yëquë mësarute ëaye asa cua̱ño cocapi cajë,
cui'ne curire ti̱'añu'u cajë yo'oye pa̱ñe ñasicohua'i.
6 Pa̱ipi de'oye yëquëre caja̱jë cajë co'eye pa̱huë.
Mësarupi pa̱nije yecohua'ipi Cristo jëjo daosicohua'i a'ë cajë yo'oye pa'iquëta'are pa̱huë.
7 Ja̱je pa'iquëta'are coa ai jerepa mësarute oijë de'o pëca ja'co mamajëre ñacaio ai de'huayeje̱ pa'ye yo'ohuë,
mësarute.
8 Yëquë mësarute ai oë'ë.
Ja̱je pa'ina,
coa de'o cocase'e quëaye yëye pa̱huë,
cui'ne yëquë pa'iyeje̱ mësaruna i̱siye yëhuë,
yëquë mësarute ai oi do'ire.
9 Maija'quë do'ijë,
yëquë pa'iyere cuasajë,
ñamiñapi cui'ne mu'señapi co'amaña nehuë.
Ja̱ yo'ose'e mësarupi asayë.
Mësaru acohua'ipi yëquëni co̱cañu'u cajë ai yo'oma'cohua'ini cajë yëquëpi nehuë,
Maija'quë coca quëa maca.
10 Mësaru cui'ne Maija'quë pa'iyë,
yëquë nuñere papi si'si peoyepi,
yecohua'ije̱ co'aye yo'oyë caye peoyere papi,
yo'ojëna,
ñasicohua'i.
11 Cui'ne mësarupi asayë,
yëquë mësarute pa̱i ñapere jerepa yëjë yo'oye ne huëose'ere cui'ne oicohua'i pa'ijëna,
ca yë'huase'ere pëca ja'quë mamajëre yo'oyeje̱ pa'ye.
12 Ja̱je yo'ojë cui'ne cua̱ñehuë,
mësarute Maija'quëre sehuosicohua'irepa pa'iyere pa'ijë̱'ë,
Maija'quë yëyere yo'ojë.
I̱pi mësarute soipi,
i̱ cua̱ñe te̱'tere,
cui'ne i̱ de'oyere pare i̱ ja̱'re co̱ni paja̱'cohua'ire cahuë.
13 Yëquë quëajëna,
asani de'hue Maija'quë cocare pa'ë cajë sehuohuë,
mësaru.
Pa̱i quëaye a'ë cuasajë sehuoye pa̱huë,
nuñerepa Maija'quë cocare pare iye mësaru sehuose'e.
Ja̱je pa'ina,
mësaru sehuose'ere cuasajë Maija'quëre de'oji cajë pëpajë se̱ñë.
Maija'quë cocarepa sëte mësarute i̱tipi yo'oquë pa'iji,
sehuocohua'ire.
14 Mësaru Maija'quë coca sehuo do'ire ai yo'oyë,
mësaru cajeohua'ipi sa̱ñope yo'ojëna.
Judío pa̱i sehuocohua'ireje̱ i̱ohua'i cajeohua'ipi sa̱ñope yo'ojëna,
ai yo'ohuë,
Cristo Jesús tse̱cohua'ipi.
Ja̱ohua'ire yo'ose'eje̱ pa'ye yo'oyë,
mësaruteje̱.
15 Iye judío pa̱ipi Ëjaë Jesure huaë'ë,
Maija'quëre quëacaicohua'ire huaise'eje̱ pa'ye,
cui'ne yëquëreje̱ pë̱ijë eto saohuë.
Maija'quëre cui'ne si'aohua'ire sa̱ñope yo'oyë.
16 Ja̱je yo'ojë judío pa̱ipi ë̱seyë,
Maija'quë coca judío pa̱i peocohua'ire huaso cua̱ñojajë cajë quëayere.
Ja̱je yo'ojë jero sa'na i̱ohua'i co'aye yo'oyere mëoñë.
Ja̱je yo'ojë pa'icohua'ire yureta'a,
ti̱tapi,
Maija'quë i̱ohua'ire ai yo'oyepi sa̱i ja̱'ñe.
Pablopi Yëji, Ti̱jupë Sani Ñañe Tesalónica Pa'icohua'ire
17 Maija'quë do'ijë,
mësarute je̱oni so'ore pa'inije hua̱nëyema'pë paë'ë.
Si'anë cuasahuë,
ñama'pë pa'inije,
ai esa sani ña'ñe nëina.
18 Yë'ë Pablopi coa si'anëpi sani ñasi'i caquëta'a ti saiye pa̱huë,
Satanáspi,
huati ëjaëpi ë̱se do'ire.
19 ¿Ja̱je pa'ina,
i̱que a'ni yëquë uteye,
yëquë sihuaye cui'ne yëquë nere pahuë cajë cuasa ja̱'ñe?
Mësaru a'ë,
Ëjaë Jesucristo dai maca yëquë sihua ja̱'ñe.
20 Ja̱je pa'ijë̱'ë,
mësaru a'ë,
yëquë de'oyerepa nese'ere ñajë sihua ja̱'ñe.