4
Mësaruje̱ ëjaohua'i,
ma'tëmore mësaru yo'ose'e caja̱'quëre mësaru Ëjaëre pare paye sëte ja̱re cuasajë mësarute necaicohua'ire de'oye nuñerepa yo'ojë̱'ë.
2 Sëtasicohua'ipi pa'ijë si'anëpi Maija'quëre se̱jë de'oji cajë i̱te pëpajë pa'ijë̱'ë.
3 Cui'ne yëquëreje̱ se̱cacaijë̱'ë,
mai Ëjaëpi i̱ coca quëaja̱'a sa'ro hui'yocaija̱quëre,
yahuesi cocare Cristo ayere cajë quëaja̱'quëre,
ja̱ cocare yë'ë quëaquë pa'i do'ire tse̱a cua̱ñosiquë pa'iquë.
4 Se̱jë'ë,
cui'ne yë'ë i̱ coca quëa maca ti̱ñarepa asaye quëa ja̱'ñere.
5 Sehuoma'cohua'i ja̱'re pa'ini ñare pajë pa'ijë̱'ë,
si'anë de'oyese'e yo'ojë.
6 Ja̱je pa'ina,
mësaru coca cayepi sa̱ija'iñeje pa'ye de'oyerepa pa'ija̱quë cui'ne i̱ohua'i se̱ni asañu'u cajë se̱ñere.
Pa̱i ñapere de'oyerepa quëajë sehuocaicohua'i pa'ijë̱'ë.
Pëpa Tëjiye
7 Yëquë oiquërepa Tíquico nuñerepa Maija'quë do'iquëpi,
yë'ë ja̱'re de'oyerepa mai Ëjaë co'amaña necaiquëpi,
mësarute yë'ë yo'oquë pa'iye quëaja̱'quë api.
8 Ja̱je pa'ina,
mësarute yëquë pa'iye quëaquë cui'ne Maija'quëre jerepa yëjë quëaja̱'quëni mësaru quë'rona jëjo saoyë.
9 Cui'ne i̱ ja̱'re co̱ni saiji,
yëquë oiquërepa,
nuñe pa'iquërepa,
Maija'quë do'iquë Onésimoje̱ mësaru aquëje̱.
Ja̱ohua'ipi quëaja̱'cohua'i a'ë,
i̱ño tëto saijë pa'iye.
10 Aristarcopi yë'ë ja̱'re tse̱a cua̱ñosiquë pa'iquëpi mësarute pëpa saoji,
cui'ne Marcosje̱ pëpaji,
Bernabé mamaëje.
Ja̱ëpi mësaru quë'rona saiquë pa'ito de'oye pëpani ñacaijë̱'ë,
i̱te.
11 Jesús yequë mami Justo hue'equëje̱ pëpaji,
mësarute.
Icohua'i a'ë,
judío pa̱i acohua'ipi sehuosicohua'ipi,
Maija'quë cua̱ñe te̱'te ayere yë'ë ja̱'re nesicohua'i,
ja̱ohua'ipi yë'ëre sihua ëaye necaisicohua'i a'ë.
12 Epafrasje̱ mësarute pëpaji,
mai Ëjaë Jesucristore necaiquëpi.
Ja̱ë cato mësaru aquë api.
Ja̱je pa'ina,
mësaruni cuasaquë si'anëpi Maija'quëre se̱cacaiji,
mësarupi o̱cue pa'i macarepa pa'ijë Maija'quëna mësaru pa'iyere i̱sisicohua'ire papi i̱ yëyere yo'oja̱jë caquë.
13 Yë'ëpi ñaquë a'ë,
Epafras mësarute,
cui'ne Laodicea pa'icohua'ire cui'ne Hierápolis pa'icohua'ire ai cuasaquë Maija'quëre se̱i pa'ina,
ñaquë.
14 Cui'ne Lucas yë'ë oiquë pa̱ire jujuquëpi cui'ne Demaspi co̱ni mësarute pëpayë.
15 Laodicea pa'icohua'ire,
Maija'quë do'ijëre pëpacaijë̱'ë,
cui'ne Ninfasreje̱ pëpacaijë̱'ë,
i̱o huë'ena sehuosicohua'i tsi'sisicohua'ireje̱ pëpacaijë̱'ë.
16 Mësarupi iye toya ja'o ña tëjini jëjo saojë̱'ë,
Laodicea sehuosicohua'ina,
ja̱ohua'ije̱ ñaja'cohua'ire.
Cui'ne mësarupi ñajë'ë,
Laodiceapi yë'ë toya daose'e mësaru quë'ro ti̱'aquëna.
17 Ñeje Arquipore cajë̱'ë:
“Më'ëre mai Ëjaë necaija̱quë caquë cua̱ñe nëose'ere de'oyerepa yo'ojë̱'ë.”
18 Yë'ë Pablopi pëpaquë iye toya e'que yë'ë jë̱të carapëpi toyayë,
hua̱nëyema'pë pa'ijë̱'ë,
yë'ë cosiquëpi pa'iye.
Maija'quë oi ñacaiyepi mësaruni pa'ija̱quë.