3
Mësaru Cristo ja̱'re huëisicohua'i sëte ma'tëmo co'amañare co'ejë̱'ë,
Maija'quë ëja të'huire Cristo ñu'i hue̱'ña ayere.
2 Ma'tëmo ayere ai yëjë pa'ijë̱'ë,
iye yeja co'amañare cuasama'pë.
3 Mësaru cato,
tsoe Cristo ja̱'re co̱ni ju̱'isicohua'i a'ë.
Ja̱je pa'ina,
mësaru pa'iye yure Cristo ja̱'re Maija'quëna yahuese'epi pa'iji.
4 Ja̱je pa'ina,
Cristo mësaru pa'iyepi ñai co̱ maca mësaruje̱ i̱ de'oyere pare ti̱mësicohua'ipi ñaija'cohua'i a'ë,
i̱ ja̱'re co̱ni.
Tsoe Pa'iye Cui'ne Huajëye Pa'iye
5 Ja̱je pa'iye sëte si'aye mësaru iye yeja aye yëyere ne hue̱a saojë̱'ë:
yequë nomiore,
pa̱nita'a yequë ë̱mëre yo'oyere,
ëa ña huesëyere,
si'sire yëyere,
co'amaña ai tsi'so ti̱mëñe cuasayere.
Ja̱ cato de'huasi diusure se̱ñeje pa'ye a'ë.
6 Ja̱je yo'ocohua'ire Maija'quë pë̱i nejoñepi daija̱'coa,
i̱te de'oye sehuocaima'cohua'ire.
7 Ja̱'në mësaruje̱ ja̱re yo'ojë pa'a̱huë'ë.
8 Ja̱je pa'iquëta'are yure mësarupi si'aye iyere je̱ocojë̱'ë,
pë̱tire,
ëa ña huesëyere,
co'ayere yecohua'ire tea ju̱'ijë tutu cayere,
cui'ne mësaru yë'opopi si'si coca cayere.
9 Ja̱'në pa'ise'ere je̱osicohua'i sëte,
yure yecohua'ire cosoye pa̱jë'ë.
10 Huajë pa'iyena,
su̱ñasicohua'ire ja̱ pa'iyepi si'a mu'señapi po̱naquë saiji,
maire de'huasiquëje̱ pa'iohua'i pa'iyena i̱te de'oyerepa asa ti̱'a macaja̱'a,
yo'o tëjiyere caquë.
11 Ja̱je pa'ina,
huajë pa'iye pacohua'ire cato peoji,
griego pa̱i a'ë,
judío pa̱i a'ë,
caye peoyë,
ca̱'ni tëacohua'i,
tëama'cohua'i,
jo'yaohua'i cui'ne jo'ya ne cua̱ñoma'cohua'i.
Coa si'a pa̱i te'e pa̱i pa'iyë,
Cristo tse̱cohua'i,
i̱pi si'aohua'ire pa'i do'ire.
12 Maija'quëpi mësarute ai oi sahuani i̱ pa̱i pa'ija̱jë caquë soipi.
Ja̱je pa'iye sëte pa̱ire teaye ñani oiyena,
de'oye necaiyere pana,
ai jerepa pa'iyë cuasama'cohua'i pa'iyena,
a̱'jicohua'i pa'iyena,
cui'ne yo'o jujama'cohua'i pa'iyena,
su̱ñasicohua'irepa pa'ijë̱'ë.
13 Co'aji,
quëco jujahuë caye peoyerepa.
Sa̱'ñe de'oye yo'ojë pa'ijë̱'ë.
Cajeipi sa̱ñope yo'ose'e paquë pa'ito,
i̱ co'aye yo'ose'ere oni yejejë̱'ë,
Ëjaërepa mësarute oi sa̱i de'huacaise'eje̱ pa'ye.
14 Pa̱ire oiyena su̱ñasicohua'irepa pa'ijë̱'ë,
ja̱ oiyepi de'oyerepa.
Te'ije̱ pa'iohua'i tsioni pa'iye pa'iji.
15 Ja̱je pa'ina,
mësarute,
Maija'quë jo'cua de'oye pa'iyepi,
mësaru joñoa de'oye cuaja̱quë caquë Maija'quëpi soini te'e ca̱pë acohua'ire nepi.
Ja̱re de'oji cajë pëpajë pa'ijë̱'ë.
16 Ja̱je pa'ina,
si'anë Cristo cocapi mësaru joyo ti̱mëse'erepa pa'ija̱quë.
Pa'ina,
yecohua'ire ye'yajë cui'ne yëhuojë̱'ë,
ta̱ñe pa'i cocare papi.
Mësaru joyore papi i̱ necaise'ere pëpajë sihuajë jë̱jëjë'ë,
tsoe toyase'epi,
yure toyase'epi cui'ne joyo etayepi.
17 Cui'ne coa si'aye mësaru caye pa̱nita'a yo'oye pa'ito,
mai Ëjaë Jesucristore necaiyë cuasajë Jesús do'ija̱'a Maija'quëre de'oji cajë pëpajë̱'ë.
Huejasicohua'i Pa'iye
18 Nëjohua'i mësaru ë̱jëohua'ire ëjaohua'ire cuasajë de'oye yo'ojë pa'ijë̱'ë,
ja̱'ë,
Cristore sehuosi nomiohua'i yo'ojë pa'iye.
19 Cui'ne mësaru ë̱jëohua'ije̱ mësaru nëjohua'ire oijë pajë̱'ë,
co'arepa jëaye tutu caye peoyerepa.
20 Mamajë mësaruje̱ si'aye mësaru ja'quëohua'i caye de'oye sehuocaijë̱'ë,
ja̱'ë,
Maija'quë sihuaquë ñañe.
21 Ja'quëohua'i mësaruje̱ mësaru mamajëre de'oye oijë ye'yajë̱'ë,
jerepa de'oye yo'oye yëja̱'cohua'ire,
tea ju̱'iñeje yo'ojëna,
co'a de'ojë.
22 Ëjaohua'ire pacohua'i,
jo'yaohua'i maña mësaruje̱ mësaru ëjaohua'ire de'oye sehuocaijë nejë'ë.
I̱ohua'i ña macase'e i̱ohua'ini de'oye i̱ñoñu'u cajë yo'oma'pë.
Coa ai jerepa nuñerepa cuasa joyopi ëjaëre pare pa do'ire yo'ojë̱'ë.
23 Ja̱je pa'ina,
pa̱ini necaiyë cuasaye peoyerepa co'amaña nejë'ë sihuajë,
Ëjaë Jesure necaiyeje̱ pa'ye cuasajë.
24 Ja̱je pa'ina,
mësaru nuñerepa Ëjaëni Cristore necaisi do'ire,
i̱ mësarute i̱ paye ayere i̱sija̱'quë api,
nesi do'ire.
Ja̱re mësaru tsoe asajë yo'oyë.
25 Ja̱je pa'iquëta'are,
co'aye yo'oquë cato,
ja̱re i̱ co'aye yo'ose'eje̱ pa'ye sa̱i cua̱ñoja'quë api.
Ja̱je pa'ina,
Maija'quëre cato peoji iquëse'ere de'oye yo'ocasi'i cayeje̱.