Pablo Cristo Jëjo Daoquë Sëte I̱ Tutu Payere Case'e
10
Yë'ë Pablopi mësarute Cristo a̱'jiñe yo'oyepi cui'ne i̱ oiyepi cuasaquë,
mësarute se̱ñë.
Yë'ëre cayë,
mësaru ja̱'re pa'ini tutu caye caraquëta'a cayë.
Ja̱je pa'iquëta'a so'ore pa'i toyase'eja̱'a i̱repa cayeje̱ tutu cayë.
2 Ja̱je ca do'ire mësarute quëayë,
yë'ë mësarute ñasi'i caquë sai maca ja̱ yë'ta'api de'oye pa'iye pa̱jë,
mësaru acohua'ipi pa̱i yëyepi yo'oji cacohua'ire cato tuturepa caja̱'quë a'ë.
3 Ja̱je pa'ire paji yëquë cato pa̱i a'ë.
Ja̱je pa'iquëta'are iye yeja pa̱i sa̱ñope yo'oyeje̱ pa'yepi yo'oye pa̱ñë.
4 Mai uihua co'amaña cato,
Maija'quë tutu quë'i uihua co'amaña'ë.
Si'aye co'a tutu quëco pa pa'i huë̱'ñare nejo co'amaña'ë.
Ja̱je pa'ina,
mai uihuama'pë pa'iyë,
iye yeja pa̱i uihua co'amañaje pa'yepi.
5 Ja̱je pa'ina,
ja̱ uihua co'amañapi,
si'aye Maija'quë ta̱'ñe asaquë yo'oyere,
sa̱ñope ti̱ñe pa'ye cuasayere nejoñe pa'iji.
Cui'ne ja̱ uihua co'amañapi,
si'aye mai cuasayere tsi'soni Cristona i̱siye pa'iji,
maipi i̱te de'oyerepa sehuo ja̱'ñere cajë.
6 Ja̱je pa'ina,
si'aohua'i mësaru de'oye sehuocaicohua'ise'e pa'i maca,
yëquëpi si'aye de'oye sehuo ma'ñere si'seye tsoe cui'ñasicohua'ipi pa'iyë.
7 Mësaru cato coa ë̱mëje'e pa'iyese'e ñañë.
Ja̱je pa'ina,
yë'ë nuñerepa Cristo aquëre pa'ë asaquë pani,
yëquëreje̱ nuñerepa Cristo acohua'i a'ë cuasaquë ñasipi.
8 Ja̱je pa'ina,
yë'ëpi yëquë yo'oye pa'iquëta'are se̱ña maca mësarute cua̱ñequë yo'osiquë panije,
co'ayerepa yo'ore'ni cuasaquë ca'raye pa̱ñë.
Ëjaëpi mësarute nejoñe peoyerepa,
jerepa joyo pa'iyere ñese mëocaija̱'a tutu i̱siquëre me ca'raye'ni.
9 Ja̱je pa'ina,
yë'ë toya saose'eja̱'a mësarute ca quëcosi'i caquë toyase'eje̱ pa'ye ñama'pë pa'ijë̱'ë.
10 Pa'iyë,
yecohua'i yë'ëre ñeje cacohua'i.
Pa̱i ñato tutu peoquë maca,
cui'ne coca canije,
ëjaërepa cayeje̱ meñerepa pa̱ire cama'quëpi,
ja̱ yë'ta'a toya daoyese'e jëaye caquë cui'ne cua̱ñequë cayeje̱ caquë toyaquë api.
11 Ja̱je cacohua'i maña,
iyere yëquë yo'o ja̱'ñere asani pa'ija̱jë,
yëquë cato ja̱je pa'ina,
yëquë coca case'eje̱ pa'ye,
cui'ne so'ore mësarute pa'ijë toyase'eje̱ pa'ye cui'ne yo'oja̱'cohua'i a'ë,
mësaru ja̱'re pa'i maca.
12 Nuñerepa caye,
yëquë de'ocohua'i a'ë casicohua'ire yëquëpi i̱ohua'ire cue̱cue ñajë cui'ne pa'iohua'i a'ë pa̱nita'a jerepa pa'iohua'i a'ë cuasajë yo'oma'pë pa'iyë.
Ja̱je pa'ijëta'are me pa'i a'ni yë'ë cuasajë sa̱'ñe cue̱cue ñajë pa'icohua'i cato huesëohua'irepa yo'oyepi yo'ojë pa'iyë.
13 Yëquë yo'oye pa'ina,
coa ai jerepa pa'iohua'i a'ë cuasajë sa tëto saipe yo'oye pa̱ja'cohua'i a'ë.
Ja̱je pa'ina,
yëquë co'amaña neja'to Maija'quëpi iye macaja̱'a nejë'ë,
caquë ña nëocaiji.
Ja̱je pa'ina,
i̱pi yëquëre mësaru quë'ro Corinto ti̱'ajë'ë,
caquë ñaquëna,
ti̱'ahuë.
14 Ja̱je pa'ina,
yëquëre nejë'ë,
ca nëosi macaja̱'a yo'oyë.
Jerepa yo'oma'pë pa'iyë.
Ja̱je pa'ina,
yëquëpi ja̱'në mësaru ja̱'re co̱ni pa'ima'pë patu co'ara'pi.
Ja̱je pati'ñe pa'iota'are yëquëpi du'ru sani mësarute Cristo de'o cocare quëahuë.
15 Cui'ne yëquëre ca nëose'ere sa eta sani yecohua'i nese'ere jioni sihuama'pë pa'iyë,
ai jerepa pa'iohua'ipi de'oyerepa nehuë cajë.
Coa ai jerepa yëquëre ca nëose'eja̱'a yo'oyë,
mësarupi Maija'quëre pa'ire paji cuasa ti̱'ajëna.
Mësaru ja̱'re pa'ijë jerepa Maija'quë co'amañare neñu'u cuasajë yo'oyë,
yëquëre Maija'quë ca nëose'eje̱ pa'ye.
16 Cui'ne cuasayë,
mësarupi.
Pa'ire paji cuasa ti̱'ajëna,
mësaru pa'i yeja Corinto jerepa pa'i yejañaje sani huaso coca quëañu'u cajë.
Yecohua'i nese'ere jioni,
yëquëpi jerepa pa'iohua'ipi de'oye nehuë,
cajë sihuayere coejë,
cui'ne yecohua'i Maija'quëre necaiyere neroja̱i hue̱'ña cacaye pa̱ñu'u cuasayë.