Pablo Cui'ne Coa Cacohua'i
11
Quëcojë dahuëre asajë̱'ë,
yë'ë caye,
a'ri maña cuepe cocaje̱ pa'ye,
catoje̱.
2 De'oji,
yë'ë cato mësarute oi ai ë̱seyë,
Maija'quë oi ë̱seye ayepi,
mësarute Cristona te'ire huejosi'i ca nëosi do'ire ë̱seyë.
Ja̱je pa'ina,
nomi tsi̱o ë̱mëre yo'oma'core paje̱ pa'iohua'ini,
i̱na i̱sisi'i caquë yo'oyë.
3 Ja̱je pa'iquëta'are ca'rayë,
a̱ñapi i̱o ta̱'ñe cayepi,
Evare cosose'eje̱ pa'ye,
mësarute cosocona.
Cristore nuñerepa cuasajë sihuayere mësarupi je̱oma'cohua'ini caquë.
4 Ja̱je ca'raquë ñaquëna,
mësaru,
yecohua'ipi daijë yëquë quëase'eje̱ pa'ye quëama'pë coa ti̱ñe pa'i Jesuni quëajëna,
coema'pë asayë,
mësaru.
Cui'ne ja̱'në i̱si cua̱ñose'eje̱ pa'i joyo peoyere coa ti̱ñe pa'i joyore i̱si cua̱ñojë,
cui'ne mësaru ja̱'në asase'eje̱ pa'ye peoyere ti̱ñe pa'i huaso cocare quëajëna,
sehuojë pa'ija̱cohua'i a'ë,
ti̱ñe pa'iye.
5 Ja̱je pa'itoje̱ yë'ë cato ja̱ohua'i Jesús jëjo saocohua'i a'ë coa cacohua'i huë'ehuëre pa'iye pa̱ñë.
Ja̱re cuasayë.
6 Yë'ëpi de'oyerepa coca ca ti̱'ama'quë pa'itoje̱,
yë'ë ta̱'ñe asaye cato jaiye a'ë.
Ja̱ asayere mësarute i̱ñohuë,
si'aye yëquë yo'ojë pa'iyepi.
7 ¿Co'aye yë'ë yo'ore mësarute,
huaso coca quëa do'ire curi se̱ma'ë,
cui'ne mësarute ñese mëoñere caquë yë'ëpi teaye pa'i maca de'oni yo'ore?
Pa̱ni,
co'aye yo'oye pa̱huë.
8 Ja̱je pa'ina,
yequë sehuosicohua'i tsisosi curire jiohuë,
mësarute necasi'i caquë.
9 Mësaru ja̱'re pa'i maca yë'ëre jopo carayere,
co̱caijë̱'ë caquë mësarute se̱ma'ë paë'ë.
Pa̱quëna,
Maija'quë do'ijë Macedonia daisicohua'ipi co̱caë'ë,
co'amaña i̱sijë yë'ëre caraye.
Mësarute jo̱sa yo'oye pa̱si'i cuasahuë,
ja̱re ja̱jese'e yo'oquë pa'ija̱'quë a'ë.
10 Yë'ë cato Cristore pa do'ire nuñerepa cayë.
Ja̱je pa'ina,
yë'ë si'a Acaya yeja pa'icohua'ire curiquë se̱ma'ë quëase'ere sihuaye sioye ti peoji.
11 ¿Me yo'oquë ja̱je caye'ni,
mësaruni oima'ë,
ja̱je caye?
Pa̱ni Maija'quëpi ñaji,
yë'ë mësarute oiye.
12 I̱ohua'i yo'oyere i̱tire pa'ë cajë sihuajë maije pa'iohua'i a'ë cañu'u cajë yo'oyere,
i̱ohua'i quëco payere jiosi'i caquë yë'ë curi se̱ma'ë yo'oyere yo'oquë pasi'i.
13 Ja̱ohua'i cato Cristo jëjo daocohua'irepa peoye coa i̱ jëjo daocohua'ije̱ pa'iohua'i de'oni cosojë yo'ocohua'i a'ë.
14 ¿Me yo'ojë ja̱je yo'oye'ni,
ai cuasama'pë?
Ja̱re i̱ huati ëjaëpi hui̱ñaëje pa'irepa miaquërepa de'oni yo'oquë api.
15 ¿Ja̱je yo'oquëre sëte me pa̱ñe'ni,
i̱te necaicohua'ije̱?
Ja̱je pa'ina,
de'o pa̱ije pa'iohua'i de'oni yo'ojë cosoyë,
pa̱ire.
Ja̱je pa'iquëta'are i̱ohua'i yo'ose'e pa'iyeje̱ sa̱i cua̱ñoñe pa'iji.
Pablo Ai Yo'ose'e Jesús Jëjo Saoquëpi
16 De'oji,
ti̱jupë mësarute ca co̱ñë,
te'ije̱ yë'ëre cuepequë caji,
cuasacohua'i pani coa asajë̱'ë,
yë'ë mësarute cuepequë cayeje̱ caquëna,
yë'ëje̱ a'ri maña casi'i jerepa pa'i a'ë cuasaquë.
17 Iye yë'ë jerepa pa'i a'ë cuasaquë casi'i caye cato cama'ë pa'iyë,
mai Ëjaërepa cua̱ñese'epi.
Ja̱ cato cayë,
coa cuepei cayepi.
18 ¡Jai pa̱i i̱ohua'i yo'oyere ñajë jerepa pa'iohua'i a'ë cuasajë sihuacohua'i pa'iye sëte,
yë'ëje̱ cui'ne yë'ë yo'oyere ñaquë jerepa pa'i a'ë cuasaquë sihuasi'i!
19 Mësaru ai ta̱'ñe pa'iohua'ita'a cuepeohua'i cayere quëcojë ai yëjë asayë.
20 Ja̱je pa'iohua'ipi quëcojë ja̱ohua'ipi jo'ya nerena,
mësaru sihuajë co̱caiyë,
mësarute coa co'acohua'ire ñajë yo'ocohua'ini,
coa cosocohua'ini,
mësarute coe ëaye ñacohua'ini,
yequere tsiana të'cajë yo'ocohua'ini co̱caiyë,
mësaru.
21 Yëquë paë'ë,
ai tutu peocohua'ipi mësarute ja̱je yo'oye pa̱sicohua'i.
Ja̱je caye huajëya'ye nëicota'are cayë:
Ja̱je pa'iquëta'are yecohua'ipi jerepa pa'iohua'i a'ë cuasato yë'ë cui'ne jerepa pa'i a'ë cuasasi'i,
iyere cuepei cayeje̱ caquë.
22 Ja̱ohua'i hebreo pa̱i a'ë,
yë'ëje̱ i̱ a'ë.
Ja̱ohua'i Israel pa̱i a'ë,
yë'ëje̱ i̱ a'ë.
Ja̱ohua'i Abraham tsëcapë acohua'i a'ë,
yë'ëje̱ i̱ a'ë.
23 Ja̱ohua'i Cristore necaicohua'i a'ë.
Yë'ëje̱ ja̱ohua'i necaiye jerepa Cristore necaiquë a'ë.
Ja̱je pa'ina,
ja̱ohua'i neñe jerepa nehuë.
Cui'ne ja̱ohua'i si'se cua̱ñose'e jerepa si'se cua̱ñohuë.
Cui'ne ja̱ohua'i co cua̱ñose'e jerepa co cua̱ñohuë.
Ja̱je yo'oquë si'anëpi ne ju̱'iñere paë'ë.
24 Judío pa̱ipi cinco pa'ye yë'ëre tse̱ajë treinta y nueve pa'ye si'sehuë,
tse̱añerepa si'se mepi.
25 Toaso̱ñe pa'ye tarapi të'cahuë.
Cui'ne te'erepa quë̱na pë̱api je̱ahuë.
Toaso̱ñe pa'ye yë'ë sai yohuë̱api ea dutupi.
Ea du'ina,
duni ju̱ni tëjiquë te'e ñami cui'ne te'e mu'se jai tsiayare coa huahuahuë.
26 Si'anë cu'iyese'e yo'oquë ñasiquë a'ë,
tsiaya duni ju̱ti'ñe pa'ye,
ñaohua'ina huahuo'ñe pa'ye,
cajeohua'ipi huati'ñe pa'ye,
ti̱ pa̱ipi huati'ñe pa'ye,
jai daripë acohua'ipi huati'ñe pa'ye,
tsio huë̱'ña acohua'ipi huati'ñe pa'ye,
jai tsiayana duni ju̱ti'ñe pa'ye,
Maija'quë do'ijë a'ë,
coa cacohua'ipi huati'ñe pa'ye yo'ojëna ñaquë tëto saisiquë a'ë.
27 Cui'ne,
jaiye jë'joye nëina neñe,
cui'ne ai yo'oye tëto saë'ë.
Ja̱je pa'ina,
yequere ti ca̱ima'ë tëtosaë'ë.
Yequere a̱o peoquëna,
cui'ne oco ëa ju̱'i tëtosaë'ë.
Yequere ti a̱ima'quëpi coa paë'ë.
Yequere ca̱ña peoquëna,
sësë ju̱'i ai yo'oquë paë'ë.
28 Iye cui'ne yequë co'amaña jerepa co̱ cuasaquëna mu'seña ñape yë'ëna dëquëyeje̱ pa'ye to̱mequëna,
si'a hue̱'ña sehuosicohua'i me pa'iye'ni cuasaquë co'a ju̱'i pa'iyë.
29 Ja̱je pa'ina,
yequë te'i tutu peoquë pa'ito yë'ëje̱ i̱ ja̱re co̱ni te'e ai yo'oquë tutu peoquë pa'iyë.
Co'ayena ne ta̱osiquë pa'ito yë'ë joyo a'siyerepa oiyë.
30 Jerepa pa'i a'ë cayepi nëiñe pa'ito yë'ë teaye pa'i tutu peoyere i̱ñosi'i,
yë'ë cayepi.
31 Ja̱je pa'ina,
Diusu mai Ëjaë Jesucristo pëca ja'quëpi yë'ë caye nuñerepa caji caquë asaji,
si'anëpi de'oquëre pa'ni cajë sihuaquëre papi.
32 Yë'ë Damascore pa'i maca,
romano pa̱i ëjaë Aretasre co̱caiquëpi,
pa̱i ëjaëpi,
yë'ëre tse̱aja'cohua'ire jai daripë eta sa'noana soldado pa̱ire në'quepi.
33 Ja̱je yo'ouna,
yecohua'ipi yë'ëre do'rohuëna ayani jai daripë tëhuopa etaye ña sa'roja̱'a casarena,
catihuë,
Aretasre.