Maija'quë Do'ijëre Tsisocaise'e
9
Mësaru co̱cañu'u cuasayere asa do'ire,
Maija'quë do'ijëre pa'icohua'ire tsi'soni i̱si ja̱'ñeta'a mësarute toyaye pa̱ñë.
2 Si'anë sihuaquë cayë,
Macedonia acohua'ire,
mësaru Acaya pa'icohua'i,
ja̱'në o̱metëcahuë co̱cañu'u cajë cui'ñasicohua'ipi pa'ise'ere pa'ijëna,
mësaru de'oye cuasayere ñani,
jai pa̱i Macedonia acohua'ipi mësaru esa ne ëa ju̱'ijë yo'oyere ñani de'oye yo'oñu'u cajë yo'ose'ere cayë.
3 Ja̱je pa'iquëta'are Maija'quë do'ijëre jëjo saoyë,
iye yo'oye aye,
yë'ë mësarute de'oye yo'ocohua'i a'ë case'epi coa case'e pa'ima'quëni caquë.
Ja̱je cani cayë,
mësarupi yë'ë cuasaquë case'eje̱ pa'yerepa coa i̱siye ne de'huasicohua'ipi pa'ija̱jë caquë cayë.
4 Mësarupi ne de'huama'cohua'ipi pa'ijëna,
yë'ë ja̱'re yeque Macedonia acohua'ipi co̱ni sani ñama'cohua'ini caquë cayë.
Mësarupi tsi'soyere nema'cohua'ipi pa'ito yëquëre ai huajëya'ye pasipi,
mësarute nuñerepa neñë cuasajë sihuajë casi do'ipi,
cui'ne mësaruteje̱ jerepa huajëya'ye nësipi.
5 Ja̱je pa'ina,
mësarute du'ru sani do'i ñaja'cohua'ire,
Maija'quë do'ijëre jëjo saoyë,
ja̱ohua'ipi mësaru coa i̱siñu'u ca nëose'e co̱caijë tsi'so saoja̱jë caquë.
Ja̱je yo'orena,
mësaru coa i̱siyepi ë̱seye peoyere papi de'oyerepa cuasajë yo'oyere i̱ñoñe pasipi.
6 Iyere cui'ne cuasajë̱'ë:
A'ri maña ta̱siquëpi ja̱re a'ri maña tëaye pa'iji,
cui'ne ja̱re jaiye ta̱siquëpi ja̱re jaiye tëaye pa'iji.
7 Ja̱je pa'ina,
pa̱i ñape i̱siye pa'iji,
joyo cuasase'e ja'ye,
i̱sima'pë pa'ijë̱'ë co'aye nëi joyopi,
pa̱nita'a yecohua'ipi cua̱ñejëna.
Ja̱je pa'ina,
Maija'quë cato oi ñacaiquë api,
sihuaquë i̱siquëni.
8 Ja̱je pa'ina,
Maija'quëpi mësarute si'a mu'seña coa si'a co'amaña jaiye i̱sija̱'quë api.
Mësarupi si'aye mësarute caraye pajë nëaquëna,
si'aye de'oye yo'o co'amañare co̱caija̱'cohua'i a'ë.
9 Ja̱je pa'ina,
toyase'e caji:
Co'amaña peocohua'ire ë̱seye peoyerepa i̱sisiquëre cato,
I̱ nuñe yo'ose'e ti pani huesëji.
10 Ja̱je pa'ina,
Maija'quë mai ta̱ ja̱'ñe,
cui'ne a̱i ja̱'ñe i̱siquëpi si'aye mësaru ta̱ ja̱'ñe,
cui'ne mëa ja̱'ñe necaija̱'quë api.
Necaina,
mësaru ë̱sema'pë i̱siyepi jaiye nuñerepa yo'oyere tëaye pasipi.
11 Ja̱je yo'ojëna,
Maija'quë mësarute jaiye co'amaña i̱sija̱'quë api,
peocohua'ire co̱caija̱jë caquë.
Ja̱ tsi'soni jëjo saoyere jai pa̱i Maija'quë do'ijëpi de'oji cajë Maija'quëre pëpaja̱cohua'i a'ë.
12 Ja̱je pa'ina,
iye yëquë Maija'quë do'ijëre co̱cai ja̱'ñe sacaini coa i̱ohua'ire carayese'e co̱cai ja̱'ñere saye pa̱ñë,
coa i̱ohua'ipi ai jerepa Maija'quëre ai de'oji cajë pëpa ja̱'ñere sayë.
13 Ja̱je pa'ina,
iye mësaru co̱caiyepi mësaru Cristo coca de'oye sehuocaiye i̱ñoquëna,
ñajë i̱ohua'ipi Maija'quëre de'oquëre pa'ni cajë sihuaja̱'cohua'i a'ë.
Sihuajë i̱ohua'ije̱ Maija'quëre de'oye yo'oja̱'cohua'i a'ë,
mësarupi i̱ohua'ire cui'ne si'aohua'ire yecohua'ireje̱ ë̱seye peoyerepa co̱caiyere ñajë.
14 Ja̱je pa'ina,
Maija'quëpi i̱ oiyere mësarute i̱ñosi do'ire cuasajë ai yëjë Maija'quëre mësarute se̱cacaija̱'cohua'i a'ë.
15 ¡Ja̱je pa'ina,
Maija'quëre ai de'oji cayë,
iye ai de'oyerepa i̱ i̱sise'ere!