De'oyerepa I̱siye
8
De'oji.
Yure Maija'quë do'ijë,
mësarute quëaye yëyë,
Maija'quë oi coa i̱sise'epi Macedonia pa'icohua'i sehuosicohua'i yo'o i̱ñoñere.
2 Ja̱ohua'i teaye co'amaña peocohua'ita'a ë̱seye peoyerepa sihuajë i̱sihuë,
yecohua'ire co̱cai ja̱'ñere.
Jaiye co'amaña pacohua'i i̱siyeje̱ pa'yerepa i̱sihuë.
Cui'ne jaiye neñañe pa'ina,
tëto sainije sihuacohua'i pa'iyë.
3 Cui'ne yë'ëpi ñahuë,
i̱ohua'i de'oyerepa cuasajë ë̱seye peoyere papi i̱ohua'i payere cui'ne i̱ohua'i paye jerepa i̱sijëna.
4 Ja̱je yo'ojë yëquëje̱ Maija'quë pa̱ire co̱caiye yëyë,
ë̱sema'pë cajë ai se̱i'ë,
yëquëre.
5 Se̱sicohua'ipi coa curiquëse'e i̱siye pa̱jë coa ai jerepa yo'ohuë.
Yo'ojë du'ru macarepa Ëjaëna i̱ohua'i pa'iyere i̱sihuë.
Ja̱ jeteyo'je i̱sihuë,
yëquëna,
Maija'quë yëyeje̱.
6 Ja̱je pa'ina,
Titore i̱ ja̱'në yo'o huëose'ere yo'oquë mësaru quë'roje̱ iye de'oye cuasajë co̱cai curi i̱siye tsi'so saoja̱quë cajë se̱i'ë.
7 Mësaru si'aye de'oyerepa pa'icohua'ipi pa'iyë:
Pa'ire paji cuasacohua'ipi,
ta̱ñe coca cacohua'ipi,
ta̱ñë asacohua'ipi,
de'oye yecohua'ire necaicohua'ipi,
cui'ne yëquëre ai oicohua'ipi.
Ja̱je pa'icohua'ipi iyereje̱ cuasajë yecohua'ire tëto saisicohua'ipi yo'ojë pa'ijë̱'ë,
peocohua'ire co̱cai i̱siyere.
8 Mësarute tse̱poje̱ pa'iore i̱siyë,
mësarupi yecohua'i de'oye yo'oyere ñani mësaruje̱,
mësaru nuñerepa pa̱ire oicohua'i pa'iyere i̱ñojajë cajë.
Ja̱je pa'ina,
mësarute cua̱ñema'pë pa'iyë.
9 Ja̱je pa'ina,
mësaru cato tsoe asayë,
mai Ëjaë Jesucristo maire de'oye coa i̱sisi'i caquë,
jaiye co'amaña paquëpi,
co'amaña peoquë de'ose'e,
mësaru do'ire.
Mësarupi i̱ co'amaña peoquë de'osi do'ipi,
jaiye pacohua'i pa'ija̱jë caquë yo'opi.
10 Mësaru de'oye pa'iyere caquë,
iye yo'oye aye mësarute cahuë,
yë'ë cuasaye mësarupi ja̱'në tëto saisi o̱metëcahuë ai sihuajë de'oye yo'o huëohuë,
iye i̱siye ayere.
11 Ja̱je yo'osicohua'i sëte yureje̱ sao macaja̱'a,
ja̱re o̱cue pa'i maca cuasajë,
sihuajë i̱sijë yo'ojë̱'ë,
mësaru paye ja'ye.
12 Ja̱je pa'ina,
pa̱ipi Maija'quëre i̱siye yëre paquë i̱ paye ja'ye i̱sito,
Maija'quë sihuaquë ñacaiquë api.
Maija'quë co'amaña peoquëni ñaquëta'a,
i̱sijë̱'ë caquë se̱ma'quë api.
13 Cama'ë pa'iyë,
yecohua'ire co̱cai do'ire,
mësarupi co'amaña caraja̱ni,
ai yo'oja̱jë caquë.
14 Yë'ë cato cayë,
si'aohua'i si'a yë'quë maca co'amaña payere caquë.
Ja̱je pa'ina,
yure mësarupi co̱caiye pa'iji,
i̱ohua'ire peoyere.
Co̱catena,
cui'ne yequë mu'se i̱ohua'ipi mësaru peoyere co̱caiye pa'iji,
mësarute.
Ja̱je yo'ojë si'a yë'quë maca paja̱'cohua'i a'ë.
15 Pajëna,
toyase'e cayeje̱:
“Jaiye si'sosiquëre nëañeje pa̱pi,
cui'ne a'ri maña tsi'sosiquëreje̱ caraye pa̱pi.”
Tito Cui'ne I̱te Co̱cohua'i
16 De'oji,
cayë,
Maija'quëre,
Tito joyona yë'ë mësarute ai cuasaquë pa'iyeje̱ pa'ye ai cuasaye necaisiquëre.
17 Ja̱je pa'ina,
Titopi,
yë'ë mësarute sani ñajë'ë caquë se̱ñe,
de'oyerepa sehuocaji'i.
I̱pi mësarute ai cuasaquë ña ëa ju̱'i pa'iye sëte.
Ja̱je pa'ina,
yure i̱ yëyese'epi mësarute ñasi'i caquë saiji.
18 Si'a hue̱'ña sehuosicohua'i pa'icohua'i quë'rona,
huaso coca de'oyerepa necai do'ire de'oquëre pare yëhuoquëni,
Maija'quë do'iquëre te'ire,
Tito ja̱'re co̱ni jëjo saoyë,
mësaru quë'rona.
19 Coa ai jerepa si'a hue̱'ña sehuosicohua'i pa'icohua'ipi i̱te sahuareña,
yëquë ja̱'re cu'i yëquë yo'oye co̱caija̱'quëni.
Ja̱je pa'ina,
yëquë mai Ëjaëre de'oye necañu'u cajë coa i̱si co'amaña tsi'sojë yo'oyere cui'ne yëquë co̱cañu'u cuasaye i̱ñoñu'u cajë yo'oyere,
co̱caija̱'quë api.
20 Ja̱je yo'ojëna,
iye yëquë jaiye co'amaña tsi'soyere,
de'oyerepa huahuesi'i cajë yo'oyë,
yecohua'ipi co'aye cama'pë pa'ija̱jë cajë.
Ja̱je yo'oyë.
21 Ja̱je pa'ina,
yëquë cato de'oyere pase'e yo'oye yëyë,
mai Ëjaë ña hue̱'ña,
cui'ne pa̱i ña hue̱'ñaje.
22 Cui'ne ja̱ohua'i ja̱'re co̱ni te'e jëjo saoyë,
yequëreje̱ Maija'quë do'iquëre.
Ja̱ë cato jaiye de'oye yo'oquë yëquëre i̱ yo'oyepi,
i̱ nuñerepa pa'iye i̱ñoquëpi,
cui'ne yureje̱ mësarute,
nuñerepa pa'icohua'i a'ë cuasaquë api.
Ja̱je pa'ini jëjo saoyë.
23 Ja̱je pa'ina,
yecohua'ipi i̱quei'ni cajë Titore se̱cohua'i pa'ito quëajë̱'ë.
Ja̱ë cato Pablore tsioquë api,
cui'ne i̱ ja̱'re co'amaña nequë api,
mësarute co̱casi'i caquë,
cajë̱'ë.
Cui'ne Maija'quë do'ijë i̱ ja̱'re co̱ni saisicohua'ini se̱cohua'i pa'ito cajë̱'ë.
Ja̱ohua'i cato sehuosicohua'i tsi'sini cuasani jëjo daosicohua'i a'ë.
Cristore de'oye necaicohua'i a'ë cajë̱'ë.
24 Ja̱je pa'ina,
si'a hue̱'ña sehuosicohua'i ñañere cajë,
mësaru i̱ohua'ire nuñerepa oiyere oni i̱ñojë'ë.
Ja̱je pa'ina,
yëquë mësaru ayere case'eje̱ pa'ye sihuayë,
mësarupi ja̱je yo'ore paja̱'cohua'i a'ë cuasajë.