7
Ja̱je pa'ina,
Maija'quë do'ijë maña iye a'ë,
maire ca nëose'e mai paye.
Ja̱je pa'ina,
de'ocohua'irepa pañu'u,
si'aye ca̱pë,
cui'ne joyo si'si neñere yo'oma'pë.
Ja̱ pa'iyere cajë Maija'quëni ca'rajë si'aye mai pa'iye i̱na i̱si saoni pañu'u.
Corinto Pa̱i Po̱nëñe
2 ¡De'oji.
Ja̱je pa'ito yëquëre sihuajë tsiojë̱'ë!
Te'ireje̱ yëquë co'a de'huama'cohua'i a'ë.
Te'ireje̱ yëquë care payeje̱ cajë cosoma'cohua'i a'ë.
3 Ja̱je cani,
mësaruni nuñe yo'oma'cohua'i a'ë caquë cama'ë pa'iyë.
Ja̱je pa'ina,
tsoe mësarute cahuë.
Mësarute yëquë joñoare papi oijë pa'iyë,
yëquë huajëcohua'ipi pa'ijëna,
cui'ne ju̱'itoje̱.
4 Ja̱je pa'ina,
yë'ë mësaru de'oyerepa sehuoja̱jë cuasaquë si'aye yë'ë cuasayere caye payë.
Cui'ne mësaru do'ire ai sihuayeje̱ payë.
Ja̱je pa'ina,
si'aye ai yo'o jopopi ai sihua joyo payë,
mësaru do'ipi.
5 Yëquë Macedonia ti̱'asi macapi ti huajëma'pë paë'ë,
a'ri mañaje.
Si'a hue̱'ña ai yo'oyese'e ti̱'ahuë,
yëquë quë̱no macapi sa̱ñope yo'oyese'e paji'i.
Ja̱je yo'oye pa'ina,
yëquë joñoapi quëquë huesësicohua'i paë'ë.
6 Ja̱je pa'iquëta'are Maija'quë co'a ju̱'icohua'ire yëhuo huasoquëpi yëquëreje̱ cui'ne yo'oquëna,
sihua ëaye nepi,
Tito daiyepi.
7 Ja̱je pa'ina,
i̱ daisi mañase'e sihua ëaye neñe pa̱pi,
mësaru sihua ëaye i̱te yo'ose'e quëaquë,
cui'ne mësaru yëquëre ña ëa ju̱'iñeje quëaquë,
cui'ne mësaru oijë pa'iye se quëaquë,
cui'ne yë'ëre ai cuasajë co'a ju̱'iñe quëaquë yo'opi.
Ja̱je quëaquëna,
si'aye iyepi yë'ëre ai sihua ëaye nëji'i.
8 Yë'ë toyasicopi mësarute ne oesico pa'itoje̱,
i̱tire cuasaquë oima'ë pa'iyë.
Ja̱'në cato oë'ë,
yë'ë toyasicopi mësarute a'ri tëcahuë ne oecona,
ñaquë.
Ja̱je oisiquëje̱ yure cato sihuayë.
9 Sihuama'ë pa'iyë,
mësarute ne oesi do'ire,
yë'ë cato sihuayë,
ja̱ oiyepi mësaru yo'oye je̱oni Maija'quëna po̱nëñe necaisi do'ire.
Ja̱je pa'ina,
Maija'quëpi sihuaquë ñapi,
mësaru oijë quëcojë yo'oye.
Ja̱je pa'ina,
yëquë toyase'epi mësarute co'aye nema'pë paë'ë.
10 Ja̱je pa'ina,
joyo oiye cato ti̱ñe pa'iye po̱nëñena cui'ne huasosicohua'i pa'iyena saye a'ë.
Ja̱je pa'iquëta'are iye yeja pa̱i yo'ojë oiye cato,
ju̱'iñena saye a'ë.
11 Ja̱je pa'ina,
ñajë'ë,
yure Maija'quë yëyeje̱ pa'ye yo'ojë oise'epi etase'ere.
Iye a'ë,
i̱ti etase'e:
Esa co'ayere ne de'hua ëaye nëiñe,
mësaru aquë co'ayere yo'osi do'ire huajëya'ye nëiñe,
co'aye sa̱ñope cama'cohua'ita'are huajëya'ye nëiñe,
co'ayere yo'osiquëpi po̱nëjaquë cajë ai yo'oye nëiñe,
co'aye yo'oquëre si'seye pa'iji cuasaye nëiñe,
mësarupi,
si'ayere de'oyerepa yo'ohuë,
nuñerepa yo'ocohua'ipi.
12 Ja̱je pa'ina,
yë'ë ja̱ toya ja'hua toya maca i̱ti co'aye yo'oquëni pa̱nita'a i̱ti co'aye yo'o cua̱ñoquëni caquë toyaye pa̱huë.
Coa ai jerepa yë'ë cato mësaru yëquëre co'a ju̱'ijë pa'iyepi,
Maija'quë ña hue̱'ñana ñañe pa'ija̱jë caquë toyahuë.
13 Ja̱ cato yëquëre ne yë'huaye pa'iji.
Ja̱je pa'iquëta'are iye asa yë'huase'e jerepa ña huajëhuë,
mësaru de'oye pa'ijë pa'icohua'ire ña do'ire Tito sihuaquë pa'iyere.
14 Ja̱je pa'ina,
mësaru ai de'ocohua'i a'ë caquë Titore tsoe quëahuë.
Titopi yë'ë mësaru ayere quëase'e nuñere pa'ë caquë asa ti̱'api,
mësaru de'oye pa'ijë pa'iyere ñaquë.
Asa ti̱'aquëna,
co'a ju̱'iñe peoyë,
mësaru ayere cato yo'oma' do'ire.
Si'aye mësarute yëquë quëase'e cato nuñerepa quëase'e a'ë,
cui'neje Titopi nuñere pa'ë caquë asa ti̱'api,
yëquë quëase'e.
15 Ja̱je pa'ina,
yureta'a i̱je mësarute ai jerepa yëji,
si'aohua'i mësaru i̱te de'oye dahuëre ñajë pëpani pajë,
i̱ caye si'aye de'oye sehuojë yo'ocaise'ere cuasaquë.
16 ¡Ja̱je pa'ina,
yë'ë mësarute ai sihuayë,
de'oyerepa yo'oja̱cohua'i a'ë caquë!