6
Ja̱je pa'ina,
yure maipi Maija'quë co'amaña co̱ necaicohua'ipi pa'iyë.
Pa'ijë mësarute se̱ñë.
Maija'quë oiye mësarute coa i̱sise'ere coa asani pa'ima'pë nejë pa'ijë̱'ë cajë cayë.
2 Ja̱je pa'ina,
i̱pi caji,
toyase'ena:
Ai de'o maca pa'iji.
Ja̱je pa'ina,
asahuë,
më'ë caye.
Huaso mu'se pa'i maca më'ëre co̱caë'ë.
Ja̱je pa'ina,
yure a'ë,
huaso cua̱ño'ñe pa'i sa'ro cui'ne i̱ huaso mu'se a'ë.
3 Yecohua'ipi yëquë co'amaña yo'oyere co'aye cacaima'cohua'ini cajë yecohua'ire co'aye yo'o i̱ñoñe peoyerepa de'oyepi i̱ñojë yo'ojë pa'iyë.
4 Ja̱je pa'ina,
si'aye ai yo'oye pa'ina,
quëcojë yo'oyepi yëquë Maija'quëre necaicohua'i pa'iye i̱ñoñë.
Co'amaña caraquëna,
cui'ne jai ca̱quipëje̱ pa'ye ai yo'oye pa'ina,
quëcojë tëto saiye i̱ñoñepi cui'ne,
5 si'sejëna,
co hue̱'ñana cojëna,
jai pa̱i sa̱ñope cuijë yo'ojë cajëna,
jëa co'amaña neñe,
si'a ñami ñajë ñataye,
cui'ne a̱o ëaye tëto saiye quëcoyepi i̱ñoñë.
6 Cui'ne yëquë de'oye nuñerepa pa'iyepi,
yëquë nuñerepa coca ta̱'ñe asayepi,
yëquë quëcoyepi,
yëquë de'oye yo'oyepi,
yëquë ja̱'re Maija'quë joyo pa'i do'ipi,
yëquë pa̱ire oire pajë yo'o do'ipi,
7 yëquë nuñerepa cocare quëa do'ipi,
yëquë ja̱'re Maija'quë tutu pa'i do'ipi i̱ñohuë.
Ja̱je pa'ina,
nuñerepa yo'o uihua ja̱'ñepi ñese nehuë,
cui'ne ja̱re i̱tipi sa̱ñope yo'oyeje̱ jëahuë.
8 Ja̱je pa'iquëta'a yecohua'ipi yëquëre sihuasicohua'ipi,
yëquëre ñañe coesicohua'ipi yecohua'ipi yëquëre de'o pa̱i a'ë casicohua'ipi,
yëquëre co'acohua'i a'ë casicohua'ipi yo'ojë.
Ja̱je pa'iquëta'are yëquë cato nuñerepa pa'icohua'ipi,
cui'ne nuñerepa cacohua'i a'ë,
yecohua'ipi cosocohua'i a'ë catoje̱.
9 Yecohua'ipi yëquëre ñama'cohua'ire yo'oyeje̱ pa'ye yo'oyë,
noni ñacohua'ita'are.
Yecohua'ipi yëquëre ju̱'ijacohua'i a'ë cacohua'i a'ë.
Cajëta'a huajëcohua'ipi pa'iyë.
Si'seyë,
yëquëre.
Ja̱je pa'iquëta'are huani je̱oñere pa̱ñë.
10 Oiyere pajë pa'iyë.
Ja̱je pa'iquëta'are si'anëpi sihuajë pa'iyë.
Ti peocohua'ije̱ pa'iohua'i ña cua̱ñoñë.
Ja̱je pa'iquëta'are jai pa̱ire jaiye co'amaña paye necaë'ë.
Co'amaña peocohua'i ña cua̱ñoñë.
Ja̱je pa'iquëta'are si'aye payë.
11 Maija'quë do'ijë Corinto pa'icohua'i mësarute yëquë nuñerepa cahuë,
ti yëquë joñoa cuasaye yahuema'pë.
12 Ja̱je pa'ina,
yëquë mësarute yahuese'e ti peoyë.
Ja̱je pa'iquëta'are mësaru a'ë,
yëquëre yahuese'e pacohua'i.
13 Ja̱je pa'ina,
mësarute mamajëre pëca ja'quë se̱ñeje pa'ye se̱ñë,
mësaru cuasayepi yë'ëre nuñerepa cajë̱'ë caquë,
yë'ë mësarute yo'oyeje̱ pa'ye.
Mai Cato Maija'quë Huë'e A'ë
14 Tsioma'pë pa'ijë̱'ë,
sehuoma'a pa̱ire.
Ja̱je pa'ina,
ñajë'ë,
nuñerepa yo'oye ti tsioye peoji,
nuñe yo'o ma'ñe ja̱'re co̱ni.
Cui'ne miañeje ti tsioye peoji,
neañena co̱ni.
15 Cristopi huati ja̱'re te'e yo'oye pa̱ji.
Sehuosiquëpi sehuoma'quë yo'oyeje̱ cui'ne te'e yo'oye pa̱ji.
16 Ja̱je cui'ne Maija'quëre se̱ huë'e ti̱o pa'ina,
cui'ne ti̱o pa'iji,
coa de'huasi diusure se̱ huë'eje̱,
te'e cui'ne yo'oyeje̱ peoji.
Ja̱je pa'ina,
Maija'quë huajëquërepa huë'e a'ë,
mai.
Ja̱je pa'ina,
i̱pi capi,
ñeje:
I̱ohua'i ja̱'re co̱ni pa'i,
i̱ohua'i ja̱'re cusi'i.
Yë'ëpi i̱ohua'i Diusu pa'ija̱quë a'ë.
Cui'ne i̱ohua'ipi yë'ë pa̱irepa pa'ija̱'cohua'i a'ë.
17 Ja̱je pa'ina,
mai Ëjaëpi caji:
Ja̱ohua'i jopo pa'icohua'ipi etani,
ja̱ohua'ire tsioma'pë,
cui'ne si'sije̱ pu̱'pema'pë pa'ijë̱'ë.
Ja̱je pa'ijëna,
yë'ëpi mësarute sihuaquë i̱masi'i.
18 I̱mani mësaru ja'quë pasi'i.
Pa'ina,
mësarupi ë̱mëohua'i cui'ne nomiohua'i yë'ë mamajë pa'ija̱'cohua'i a'ë.
Ja̱je caji,
Ëjaërepa si'aye tutu paquëre papi.