5
Mai cato huë'eje̱ pa'iohua'i a'ë.
Ca̱'ni huë'eje̱ pa'iohua'i a'ë.
Coa esa tëto saicohua'i a'ë.
Ja̱je pa'iopi iye huë'e ne huesëto,
Maija'quëpi ti pani huesë huë'erepa ne de'huasiconi payë,
jeto ma'tëmo,
pa̱i jë̱ñapi nema'a huë'ere.
2 Ja̱je pa'ina,
ma'tëmo huë'ere pa'i ëa ju̱'iñë,
ja̱ yë'ta'a iye yeja huë'ere pa'ijë.
3 Ja̱je pa'ina,
ja̱ huë'epi maire ca̱ña su̱ña to̱caiyeje̱ pa'ye su̱ñaja'coa,
ca̱pë pejë peoñoaje̱ pa'ye pa̱ja'cohua'ire.
4 Ja̱je pa'ina,
yure cato iye ca̱pë caraja̱i huë'ere payë.
Pa'ijëta'a ma'tëmo huë'ere ti pa'i ca̱përe pa'i ëa ju̱'iñe.
Coa iye yeja ca̱'nipi huë'e nesico ne huesëyere caye pa̱ñë.
Coa ai jerepa ti ne huesëma' huë'ere pa̱jajë cajë cayë,
iye ju̱'ija ca̱përe ti pa'iyena ne huesëja̱quë caquë.
5 Ja̱je pa'ina,
iye pa ja̱'ñe cato Maija'quëpi ne de'huacaji'i.
Cui'ne ja̱re i̱pi i̱ de'o joyo maina i̱sipi,
yequë mu'se i̱si ja̱'ñe i̱ñoñe.
6 Ja̱je pa'ina,
i̱tire cuasajë ca'raye pa̱ñë,
yëquë.
Ja̱je pa'iquëta'are asayë cui'ne,
iye ca̱përe ja̱ yë'ta'a pa'iye cato so'ore pa'iyë,
mai Ëjaëre.
7 Ja̱je pa'ina,
yure i̱te ñañe pa̱ñë.
Ja̱je pa̱jëta'a pa'ire paji cuasayeja̱'a asajë pa'iyë.
8 Ja̱je pa'i do'ire i̱tire cuasajë ca'raye pa̱ñë.
Ja̱je pa'ina,
coa ai jerepa iye ca̱pë pa'iyere je̱oni etani sani Ëjaë quë'rona i̱ ja̱'re pa'iye yëyë.
9 Ja̱je pa'ina,
si'anë Ëjaë yëyese'e yo'oyere yëyë,
iye ca̱pë pa'iyere je̱onije,
pa̱nita'a i̱ni ja̱ yë'ta'a tuinije iye yejare pa'ijë.
10 Ja̱je pa'ina,
iye yeja ja̱ yë'ta'a pa'i maca de'oye pa̱nita'a co'aye yo'ose'eje̱ pa'ye pa̱i ñape i̱si cua̱ñoñere cajë,
si'aohua'i Cristo pa̱i ñape iye yeja ca̱pëpi yo'ose'e ne de'hua hue̱'ñana saiye pa'iji.
De'oye Pa'i Coca
11 Ja̱je pa'ina,
Ëjaëre pare ai ca'raye asayë,
yëquë.
Ja̱je asa do'ire pa̱ire yëhuoyë,
sehuoja̱jë cajë.
Si'aye yëquë pa'iye Maija'quë ñaji.
Ja̱je cui'ne mësaruje̱ yëquë pa'iye asa ti̱'ajajë cajë uteyë.
12 Ja̱je cani cama'pë pa'iyë,
ti̱jupë yëquëja̱'a co'ye jerepa pa'iohua'i a'ë cuasajë.
Coa ai jerepa yëquë cato i̱siyë,
mësarute sa'roje̱ pa'iore mësarupi yëquëre de'ocohua'ire pare pajë sihuaja̱jë cajë.
Sihuacohua'ipi yecohua'ire joyorepa pa'iyepi yo'oma'pë coe ë̱mëje'ese'e yo'oyere sihuacohua'ire sa̱ñope caja̱jë cajë cayë.
13 Ja̱je pa'ina,
yëquëpi cuepeohua'ije̱ pa'iohua'i ña cua̱ñoni Maija'quëni necai do'ire ja̱je ña cua̱ñoñë.
Ja̱je pa'iquëta'are cuepeohua'i ña cua̱ñoñe pa̱ni mësaruni necaijë pa'iyë.
14 Ja̱je pa'ina,
te'i Cristopi si'aohua'i do'ina ju̱cacaji'i asasi macapi Cristo oiyepi yëquë pa'iye cua̱ñequëna,
pa'iyë.
Ja̱je pa'iye sëte si'aohua'i i̱ ja̱'re co̱ni ju̱'isicohua'ipi pa'iyë.
15 Ja̱je pa'ina,
Cristopi si'aohua'ire caquë ju̱cacaji'i,
coa ai jerepa huajëcohua'ipi i̱ni pacacaija̱jë caquë,
pa̱ni i̱ohua'ija̱'a co'ye cuasaye.
Ja̱re cuasaquë ju̱ni huëji'i.
16 Ja̱je pa'ina,
yëquë iye yeja pa̱i yecohua'ire cuasajë ñañeje pa'ye cuasajë ñañe pa̱ñë.
Ja̱je pa'ina,
ja̱'nëre iye yeja pa̱i cuasajë Cristore ñañeje pa'ye cuasajë ñasicohua'ita'a yure cato ja̱je cuasajë ñañe pa̱ñë,
i̱te.
17 Ja̱je pa'ina,
Cristona tsioni pa'iquë cato huajë pa̱i api.
Ja̱je pa'ina,
ai co'amaña cato tsoe nejose'e a'ë,
yure pa'iye cato huajëye a'ë.
18 Ja̱je pa'ina,
si'aye iye Maija'quë yo'oye a'ë.
Ja̱je pa'ina,
Cristo do'ija̱'a maire i̱ cajeohua'ire nepi.
Neni maire cua̱ñe nëopi,
yecohua'ini i̱ ja̱'re cajeohua'i de'oyere quëacaijë̱'ë caquë.
19 Jesucristoja̱'a iye yeja pa'icohua'ire yë'ë cajeohua'i de'oja̱jë caquë Maija'quëpi nepi,
i̱ohua'i co'aye yo'o do'ire tsoe sa̱i to̱siquëpi.
Ja̱je yo'osiquëpi Maija'quë cajeohua'ire ne cocare i̱sipi,
maire,
yecohua'ire quëaja̱jë caquë.
20 Ja̱je pa'ina,
yëquë Cristo jëjo daocohua'i a'ë.
Ja̱ cato Maija'quëpi yëquëja̱'a co̱ni mësarute se̱ñeje pa'ye a'ë.
Ja̱je pa'ina,
mësarute se̱ñë,
Cristo mamipi Maija'quë ja̱'re cajeohua'i de'oë'ë cajë.
21 Cristo ti co'aye yo'oma'quë paji'i.
Ja̱je pa'iquëta'are Diusupi co'ayere yo'oyeje̱ pa'yerepa Cristore yo'opi,
mai do'ire.
Ja̱je yo'opi,
Cristo do'ija̱'a jai do'i mai i̱te sa̱ñope pase'ere peo hue̱'ña nejocasi'i caquë.