4
Ja̱je pa'ina,
yo'o jujaye peoyerepa necaiyë,
Maija'quëpi teaye yëquëre ñani oi iye co'amañare necaijë̱'ë caquë cua̱ñe nëouna.
2 Ja̱je pa'ina,
yëquëpi si'aye yahuerepa huajëya'ye co'are paji cahuë,
ta̱ñe cayepi pa̱ire cosoñu'u cajë.
Cui'ne Maija'quë cocare ta̱ñe po̱nani yeque ye'yañu'u cajë yo'oye pa̱ñë.
Ja̱je yo'oma'pë coa ai jerepa nuñere pase'e asani yo'ojë pa'iyë,
Maija'quë ña hue̱'ña.
Ja̱ yo'oyere si'aohua'i nuñerepa yo'ocohua'i a'ë cuasaja̱jë cajë.
3 Ja̱je pa'ina,
huaso coca yëquë quëayepi yecohua'ire jëaye asa ëa ma'ñe pa'ini ja̱re ne huesësicohua'ini ja̱je pa'iji.
4 Ja̱je pa'ina,
I̱ohua'i sehuoye coe do'ire iye yeja cua̱ñe diusupi i̱ohua'i asayena ne pore huesopi Maija'quë pa'iye aye i̱ñoquë de'oquërepa Cristo de'o coca miañere ña ti̱'ama'pë pa'ija̱jë caquë.
5 Ja̱je pa'ina,
yëquë ayere quëama'pë pa'iyë.
Coa ai jerepa Cristo Jesús ayere quëayë,
mai Ëjaëre pa'ë cuasaja̱jë caquë.
Yëquë cato mësarute necaicohua'i a'ë,
Jesure oi do'ire.
6 Ja̱je pa'ina,
iye yeja miañe nequëpi mai joñoana Maija'quëpi miañe necaji'i,
yecohua'ire i̱ñojajë caquë.
Maija'quë ja̱je necaji'i,
maipi Jesucristo ayere ye'yejë i̱re cui'ne i̱ de'oyere pare asaja̱jë caquë.
Necaiquëre Pare Asajë Pa'iye.
7 Ja̱ asayere jai do'i a'ë.
Ja̱re maina payë,
soto cua'conoa ayayeje̱ pa'ye.
Maija'quëpi maina tutu peocohua'ire i̱sipi,
ja̱ asaye.
Maija'quë tutu a'ë asaja̱jë caquë.
Pa̱ni,
pa̱i tutu.
8 Ja̱ tuture pajë,
jaiye ai yo'oye pa'itoje̱ de'hue yo'o jujama'pë pa'iyë.
Ja̱ tuture pajë jaiye co'a ju̱'iñe pajëta'a me neja'cohua'i a'ni cuasayere peoyë.
9 De'oye pa'iye peoye jo̱sa yo'oyë,
maire.
Ja̱je yo'otoje̱ je̱ocosicohua'i pa'iye pa̱ñë.
Ne ta̱oñë,
maire.
Ja̱je pa'iquëta'are ne huesoye pa̱ñë.
10 Jesús ai yo'osiquëni i̱te huajo yëjë yo'ose'eje̱ pa'yepi si'anë maire huajo yëcohua'ipi pa'ijëna,
ai yo'ojë pa'iyë,
Jesús pa'iyere i̱ñoñu'u cajë mai pa'iyeja̱'a.
11 Ja̱je pa'ina,
mai huajëcohua'i pa'icohua'ipi si'anëpi ju̱'iñena i̱sisicohua'ipi pa'iyë,
Jesús do'ire,
mai ju̱'i ca̱pë̱a hue'eyeja̱'a i̱ pa'iyere i̱ñoñu'u cajë ja̱je pa'iyë.
12 Pa'ijë Maija'quë cocare quëa do'ire ju̱'iñepi ja'ye pa'iji,
yëquë.
Ja̱je pa'ijëta'a cui'ne mësarupi pa'iyepi ti pa'iyena ti̱'ahuë.
13 Maija'quë toya pëpëpi caji ñeje yequë hue̱'ña:
“Pa'ire paji cuasaquë ja̱ do'ire quëahuë”.
Ja̱je pa'ye cui'ne yëquëje̱ pa'ire paji asajë quëayë.
14 Ja̱je pa'ina,
asayë,
Maija'quëpi ju̱'isiquëre Cristore huajëquëre huëopi.
Cui'ne yëquëreje̱ ju̱'isicohua'ini huëoja̱'quë api,
Jesús ja̱'re.
Huëoquë cui'ne mësaruteje̱ huëoni yëquë ja̱'re co̱ni te'e i̱ quë'rona saja̱'quë api,
asayë.
15 Ja̱je pa'ina,
si'aye iye yo'oye pa'iji,
mësaru de'oye pa'iyere caquë.
Ja̱je pa'ina,
Maija'quë jaiye de'oye pa'iye jerepa pa̱ire i̱siyeje̱ pa'yerepa cui'ne i̱te de'oyerepa yo'o u'ni cajë pëpacohua'ije̱ jai pa̱i pa'ija̱jë caquë ja̱je yo'opi.
16 Ja̱je pa'ina,
yëquë coa yo'o jujahuë cuasaye pa̱ñë.
I̱ño ë̱mëje'e ca̱pë cato aiohua'i de'onije jeto sa̱'nahuë cato mu'seña ñape huajëcohua'i de'ojë pa'iyë.
17 Ja̱je pa'ina,
iye yeja yëquë ai yo'oye cato coa da saiye a'ë.
Ja̱je pa'ina,
ja̱ ai yo'oyepi ti pani huesëye ai jerepa de'oyere pa ja̱'ñere necaiji.
18 Ja̱je pa'ina,
yëquë cato cuasama'pë pa'iyë,
ñaco ca̱ ña ti̱'añere.
Coa ai jerepa yëquë cato cuasayë,
ña ti̱'a ma'ñere.
Si'aye ñañe cato coa caraja̱iñe a'ë.
Ja̱je pa'iquëta'are ja̱ yë'ta'a ña ti̱'a ma'ñe cato ti pani huesëye a'ë.